फाइल तस्बिर
काठमाडौं– नेकपा अध्यक्ष पुष्पकमल दाहाल 'प्रचण्ड'ले आफू र बाबुरामलाई इतिहासको कर्मले एकै ठाउँ तानिरहने बताएका छन्। पूर्वप्रधानमन्त्री तथा राष्ट्रिय जनता पार्टीका नेता डा बाबुराम भट्टराईद्वारा लिखित पुस्तक ‘गुमनाम आमाहरुको कथा’को विमोचन कार्यक्रममा बोल्दै प्रचण्डले यस्तो बताएका हुन्।
‘बाबुरामजी र मेरो अहिले पार्टी एउटै त होइन। इतिहासको कर्मका कारणले अलग हुन खोज्दा पनि चुम्बकले तानेजस्तो तानिरहन्छ। अलग हुन दिँदैन,’ कार्यक्रममा उनले भने। उनले हजारौं बेपत्ता, घाइते र योद्धाले आफूहरुलाई एकै ठाउँ ल्याइरहने बताए।
यसैगरी, कुनै समयका उद्धात्त विचार, उच्चतम मानवीय संवेदना, उच्चता छोएका ती दिन (सशस्त्र युद्ध)ले एकै ठाउँमा ल्याइरहने बताए।
आफूलाई निमन्त्रणा गरिनु र आउनैपर्छ भनेर जोड दिइनुलाई एउटा प्राविधिक घटनाका रुपमा नलिएको पनि बताएका छन्। उनले भने, ‘यसलाई सामान्य प्राविधिक घटनाका रुपमा लिएको छैन। संस्मरण, पात्र र पात्रका विषयमा बाबुरामजीले गरेका विश्लेषणले गम्भीर आत्मसमीक्षा गर्ने दिशातिर, संश्लेषण र विमर्श गर्नुपर्ने अवस्थातर्फ डोहोर्याएको महसुस गरेको छु।’
उनले फेरि एकपल्ट बाबुरामसँग मोर्चा कस्नुपर्ने अवस्था आएको बताएका छन्। त्यो आफूले मात्रै नभई सबैलै यो अनुभूति गरेको उल्लेख गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
