बागमती- आज बस्ने भनिएको बागमती प्रदेशको प्रदेश सभा बैठक स्थगनपछि नेपाल कम्युनिष्ट पार्टी (नेकपा) दाहाल– नेपाल समूहका प्रदेश सभा सदस्य आन्दोलित भएका छन्। अष्टलक्ष्मी शाक्यसहित प्रदेश सभा सदस्यले प्रदेश सभा भवनको प्राङ्गणमा नाराबाजी गरेका छन्।
उनीहरूले तत्काल प्रदेश सभा बैठक बोलाउन माग गर्दै नाराबाजी गरेका हुन्। मुख्यमन्त्री डोरमणि पौडेलविरुद्ध दर्ता भएको अविश्वासको प्रस्तावमाथि छलफल गरिनुपर्नेमा त्यसलाई छल्न खोजिएको उक्त समूहको आरोप छ।
नाराबाजीअघि नेकपा दाहाल–नेपाल समूहको संसदीय दलले पत्रकार सम्मेलन गरी बैठक स्थगनको विरोध गरेको थियो। पत्रकार सम्मेलनमा अविश्वास प्रस्तावमा मुख्यमन्त्रीका रुपमा प्रस्तावित शाक्यले सभामुख सानुकुमार श्रेष्ठ सरकारको लाचार छायाँ बनेको आरोप लगाइन्।
प्रदेश सभा सदस्य शाक्यले सबै सदस्य बैठकमा भाग लिन हेटौँडा आइसकेपछि राति विद्युतीय सूचना जारी गर्दै बैठक स्थगनको सूचना आउनु विधि र पद्धति विपरीत भएको जनाउँदै सभामुखलाई उक्त निर्णय फिर्ता लिँदै बैठक राख्नुपर्ने माग गरिन्। उनले भनिन्, “दलको छलफलबिना यसरी बैठक सारिनु गलत छ”, सभामुखले तत्काल बैठक आह्वान गर्नुपर्छ।” उनले बैठक तत्काल बोलाउन पाउने अधिकार सभामुखमा सुरक्षित रहेको जनाउँदै सभामुख सबैको साझा भएकाले सबैसँग छलफल गरेर निर्णय लिनुपर्ने बताउनुभयो।
निवर्तमानमन्त्री शालिकराम जम्कट्टेलले कार्यव्यवस्था परामर्श समितिको बैठकसमेत नबसी बैठक स्थगन भएकामा अपत्ति जनाए। नेकपा बागमती प्रदेश संसदीय दलका उपनेता जम्कट्टेलले मुख्यमन्त्री पौडेलविरुद्ध अविश्वासको प्रस्ताव छलफलका लागि पेश भइसकेकाले तत्काल बैठक राखेर उक्त प्रक्रिया अगाडि बढाइनुपर्ने बताए।
उपसभामुख राधिका तामाङले पनि बैठक स्थगन गर्नेबारे आफूलाई पूर्वजानकारी नभएको बताइन्। बैठक स्थगनको खबरबारे आफू बेखबर रहेको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
