प्रतिनिधि सभा विघटनविरुद्धको मुद्दामाथि सर्वोच्च अदालतको संवैधानिक इजलासमा निरन्तर सुनुवाइ भइरहेको छ। अहिले नेकपाको केपी ओली पक्ष प्रतिनिधि सभा विघटन सही भएको भन्दै देशैभर निर्वाचनको माहोल बनाउन लागेको छ। उता नेकपाकै पुष्पकमल दाहाल ‘प्रचण्ड’ र माधवकुमार नेपाल पक्ष प्रतिनिधि सभा पुनःस्थापना हुनुपर्ने भन्दै सडक संघर्षमा छ। ओलीले प्रतिनिधि सभा विघटन गरेपछिको राजनीतिक परिदृष्यका विषयमा उनी निकट मानिने स्थायी कमिटी सदस्य सत्यनारायण मण्डलसँग नेपाल लाइभकर्मी वीरेन्द्र ओलीले गरेको कुराकानीको सारसंक्षेपः
प्रधानमन्त्री केपी शर्मा ओलीले वैशाखमा निर्वाचन घोषणा गरि सक्नुभएको छ। तपाईंहरु निर्वाचनको तयारीमै हुनुहुन्छ?
हामी पूरै निर्वाचनको अभियानमा जुटिसकेका छौं। निर्वाचन हुनेमा कुनै शंका छैन। निश्चिन्त ढंगले निर्वाचन हुन्छ। हरेक जिल्ला जिल्लामा अगुवा कार्यकर्ता र जनभेला गरेर एकस्तरको माहोल बनाइसक्यौं। केही दिन अघि मात्रै सप्तरीमा कार्यक्रम राखिएको थियो। प्रतिकूल समयका बाबजुद पनि धेरै राम्रो उपस्थिति देखिएको छ। पार्टीको स्थानीय तहका कमिटीहरु र वडा कमिटीहरुलाई पनि त्यसैअनुसार निर्देशन दिइसकिएको छ।
विभिन्न राजनीतिक दल सहित लेखक, पत्रकार, नागरिक अगुवा, बुद्धिजीवी लगायतले प्रधानमन्त्री ओलीको कदम असंवैधानिक भनेर आन्दोलन गरिरहेका छन्। प्रधानमन्त्री ओलीले निर्वाचन गराउनका लागि मिति तोकेका पनि होइनन् भनिरहेका छन् नि?
हेर्नुस्, नेपालका नागरिक समाज, मानव अधिकारकर्मी, सञ्चारकर्मीहरु सबै उस्तै हुन्। उनीहरु एनजिओ/आइएनजिओबाट सञ्चालित छन्। डलर, यूरो र भारुको करामतले विश्लेषण गरिरहेका छन्। यहाँका धेरै प्राध्यापक, डाक्टरहरु, विश्लेषकहरु नचाहिने विश्लेषण गर्छन्। स्वतन्त्र रुपले निष्पक्ष भई राष्ट्र र राष्ट्रिय राजनीतिका बारेमा विश्लेषण भए उचित हुन्छ। कमीकमजोरी केपी ओलीका पनि हुन सक्छन्। तर, यहाँ पूर्वाग्रही ढंगले विश्लेषण गरिरहेका छन्।
अदालतमा विचाराधीन मुद्दाको सवालमा चार/चारवटा पूर्वप्रधानन्यायाधीशले एकपक्षीय रुपमा बोलेका छन्। त्यो कसरी न्याय भयो? यसले न्यायमूर्तिहरुको न्यायिक चरित्रमाथि नै प्रश्न उठ्दैन? जसले नागरिक समाजका अगुवाहरु भन्छन्, उनीहरुमा पनि स्वतन्त्र चरित्र देखिएन।
जनताबाट पराजित भएकाहरु (माधव नेपाल) राज्यको ओहोदा (प्रधानमन्त्री) हुँदा कुनै नागरिक समाज र पत्रकारले लेखे? दुई/दुई ठाउँबाट निर्वाचन हारेको मान्छे, पार्टीलाई तेस्रो पोजिसनमा पुर्याएको मान्छे माधव नेपाल कसरी संविधान सभामा पुगे? कसरी संवैधानिक समितिको मस्यौदा समितिको सभापति भए? त्यहाँबाट कसरी छलाङ मारेर प्रधानमन्त्री हुन पुगे? यो कत्तिको लोकतान्त्रिक पद्धति थियो? किन कोही नागरिक समाजले त्यसमा आवाज उठाएन? त्यसमा कुनै मानव अधिकारवादी वा न्यायाधीशहरुले कुरा उठाए त? माधव नेपालले चुनाव हारे, अहिले आएर प्रचण्डले अध्यक्ष बनाइदिँदा सहर्ष स्वीकार गरे। देखिन्छ नि, कसले कोमाथि रिस पोखिरहेको थियो? को केका लागि पार्टीमा लडिरहेका थिए?
पार्टीमा अप्ठ्यारो पारे भन्दैमा प्रधानमन्त्रीले संविधानमै हुँदै नभएको अधिकार प्रयोग गरेर प्रतिनिधि सभा विघटन गर्न पाइन्छ? प्रतिनिधि सभा विघटनलाई धेरैले घरमा झगडा परेपछि घरमै आगो लगाउने काम भयो भन्दै टिप्पणी गरेका छन्!
नेपालको संविधानको व्याख्याता सर्वोच्च अदालत हो। प्रधानमन्त्रीले संविधानको कुनचाहिँ धारालाई निलम्बन गरेर निर्वाचन घोषणा गरे? त्यो त जग हँसाउने टिप्पणी भयो। घरमा झगडा भयो भन्छन् त किन दलको बैठक बोलाएर केपी ओलीलाई हटाउन सक्दैनन्? किन अविश्वासको प्रस्ताव दर्ता गर्न खोजे? विदेशीको बुइँ चढेर उनीहरुको चाकडी गरेर नेपालको अस्तित्व मेटाउन पाइन्छ? माधव र प्रचण्डको नेपाललाई भारतमा विलय गराउने योजना हो। के यिनीहरुमा देशभक्ति छ? देशको माया छ?
अदालतमा विचाराधीन मुद्दाको सवालमा चार/चारवटा पूर्वप्रधानन्यायाधीशले एकपक्षीय रुपमा बोलेका छन्। त्यो कसरी न्याय भयो?
अहिले कतिपय मान्छेहरुले भन्न थालेका छन्- लोकतान्त्रिक गणतन्त्र ल्याइयो, त्यसको राजा प्रचण्ड भइरहेका छन्। प्रचण्डले दाबी गर्छन्, मैले सबैलाई प्रधामन्त्री बनाएँ। तर आफ्नो छोरीज्वाइँ, नातेदार विभिन्न पदमा आसिन गराएका छन्। यत्रो जनयुद्धमा लागेर १७ हजारको ज्यान लिए। कति अहिले घाइते र अपांग छन्। प्रचण्डले तिनीहरुको लागि के गरे? यो कुरा बुझ्दैनन्। तर, प्रचण्डले जे भन्छन्, त्यही ठिक। माधवले जे भन्छन्, त्यहीँ ठिक?
माधवलाई भारतको इतिहासमा देखिने ५ गद्दारहरु मध्ये एउटा गद्दार जस्तै भन्ने गरेको छु। माधव नेपाल भनेको कुनै बेला भारतका राजा जयचन्द हुन्। मोहम्मद गोरीसँग मिलेर राष्ट्रघाती काम गरे। नेपालको अवस्थामा माधव नेपाल त्यही जयचन्द हुन्। मैले दुई पात्रलाई लिएको छु। अर्को मुगल साम्राज्यका अन्तिम बंगालको राजा थिए, सिराजुदौला। त्यसको प्रधानसेनापति थिए, निर जाफर। उनले ५० हजार सेनाको नेतृत्व गरेका थिए। त्यो बेला इस्ट इन्डियामा ३५ सय सेना थिए। जब खटपट सुरु भयो। पलासी भन्ने ठाउँमा युद्ध भयो। युद्ध हुँदा सिराजुदौला कमाण्डरले सेनापति बन्न अंग्रेजसँग दोस्ती गरेर सम्झौता गरे। त्यसपछि ३५ सय सेनाको जित भयो। ५० हजार सेनाको हार भयो। त्यहाँको राजालाई हटाइयो। त्यसको केही समयपछि निर जाफरको हत्या गरेर त्यसको भतिजो मिर्जा सिंहलाई राजा बनायो। मिर्जा सिंहलाई हटाएर इस्ट इण्डिया कम्पनीले २ सय वर्षसम्म आफ्नो झण्डा फहरायो। प्रचण्ड र माधव नेपाल भनेका नेपालको इतिहासमा निर जाफर हुन्।
सर्वोच्च अदालतको निर्णय मान्न हामी तयार छौं। सर्वोच्चले जे फैसला गर्छ त्यसलाई सबैले मान्नु नै पर्ने हुन्छ। जुन किसिमले प्रभावित गर्ने काम भइरहेको छ, त्योचाहिँ ठीक भएन। पूर्वप्रधानन्यायाधीश सुशीला कार्की न्यायाधीश हुँदा महाअभियोग लगाइयो। केपी ओली नै उभिएका थिए उनको पक्षमा। हामी पनि थियौं, संविधान सभाको सदस्य थियौं। बचायौं। यसैगरी अनूपराज शर्माले कति अर्ब घुस खाए एनसेलको कर काण्डमा? तपार्इं खाली मिलाएर बोल्ने भन्नुहुन्छ। मैले के मिलाएर बोल्ने? उनीहरुले गरेकै हो नि त। अहिले उनीहरु जथाभावी बोल्न पाउँछन्? जनताभन्दा माथि हुन पूर्व प्रधानन्यायाधीशहरु?
संविधानलाई नै भत्काउने, संविधानमै भएको व्यवस्था नमान्नेको नेतृत्वमा अब कसरी निर्वाचन सम्भव हुन्छ भन्दै प्रश्न गर्न थालिएको छ नि त?
यस्ता प्रश्नको कुनै तुकै छैन। कसले प्रश्न गर्छ? कसले संविधान मानेको छैन? संसदीय व्यवस्था हो। जुन राजनीतिक प्रणाली हो, त्यस अन्तर्गत कसरी प्रधानमन्त्रीलाई अधिकार छैन? अझ संविधानको व्याख्या गर्छन्। यहाँका वकिलहरु र न्यायाधीशहरुले कानुनको मौसमी व्याख्या गर्छन्। जाडोमा एउटा, गर्मीमा अर्को व्याख्या गर्छन्। देश सुहाउँदो नेपालको माटो सुहाउँदो व्याख्या गर्नु पर्यो नि! अनि हामीले शीरोधार्य गर्छौ। कुनै एउटा व्यक्तिले भन्दैमा त्यो कुरा मान्ने हुन्छ? यहाँ संविधानको व्याख्या गर्नेहरुले नेपालको हितविरोधी व्याख्या गर्दैछन्।
प्रतिनिधि सभा पुनःस्थापनाको विषयको मुद्दा सर्वोच्च अदालतको संवैधानिक इजलासमा विचाराधीन अवस्थामा छ। सरकार आफैं काम चलाउ भइसकेको छ। झण्डै दुई तिहाई बहुमत प्राप्त प्रधानमन्त्री आफैंले राजनीतिक अस्थिरता निम्त्याउनुभयो है?
तपाईंहरुले प्रश्न गर्न कहाँबाट तालिम लिनुहुन्छ? केपी ओलीले राजनीतिक अस्थिरता निम्त्याएको हो? एक वर्षदेखि पार्टीमा अप्ठ्यारो पार्ने र सरकारलार्ई काम गर्न नदिने काम कसले गरेको हो? यिनीहरु पदका लागि मरिमेटेका होइनन्? मैले अघि भनिसकें, दुई ठाउँबाट पराजित मान्छे लोकतन्त्रमा कहाँबाट प्रधानमन्त्री बन्न पाउथ्यो? भए नि हैन! त्यो कुरा किन मान्छेले सोध्दैनन्। प्रतिनिधि सभा भंग गर्नैपर्ने थियो, केपी ओलीले, गरे।
संविधानको व्याख्या गर्नेहरुले नेपालको हितविरोधी व्याख्या गर्दैछन्।
निर्वाचन आयोगले नेकपा फुटेको छैन भनिसकेको छ। फेरि एउटै पार्टी हुने अवस्था देख्नुहुन्छ?
कसरी रहन्छ सिंगै पार्टी? कि प्रचण्ड र माधव नेपालले माफी मागेर आउनुपर्यो। प्रचण्डले जुन संगीन आरोप लगाएका छन्, १९ पेजको। त्यो पनि फिर्ता लिनुपर्यो। उनीहरुले गल्ती गर्यौं भनेर आत्मालोचना गर्नुपर्यो। त्यस्तो भयो भने सिंगै पार्टी एक हुन पनि सक्छ।
जसले पार्टीको महाधिवेशनबाट जितेर आयो। त्यस्तो मान्छेलाई हारेको माधव नेपालले प्रश्न गर्न मिल्छ? माधव नेपाललाई केपी ओलीलाई साधारण सदस्यबाट निकाल्ने अधिकार कसले दियो? उनीहरुसँग सहकार्य गरेर एक हुन सक्छ? नेपाल कम्युनिस्ट आन्दोलनलाई बदनाम गर्ने उनीहरु नै हुन्। तपाईंहरुको हिम्मत हुँदैन उनीहरुलाई प्रश्न सोध्न? तपाईंहरु खाली केपी ओली र उनका समर्थकलाई यत्तिकै परेसान गर्नुहुन्छ।
प्रचण्ड–नेपाल पक्षले निर्वाचन आयोगलाई सत्ताले अनुचित दबाबमा पारेर सही निर्णय गर्न सकेन भन्छन्?
निर्वाचन आयोग हाम्रो दबाबमा पर्यो रे? उनीहरु किन भारतको दबाबमा परेर यस्तो गर्दैछन्? देश डुबाउन खोज्नेलाई परास्त गर्न सत्ता प्रयोग हुन्छ नि। यो बुझ्नुपर्यो नि!
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
