काठमाडौं- नेपाल एकद्वार प्रणाली (सिंगल विन्डो सिस्टम)को सुरुवात भएको छ। भन्सार दिवसको अवसरमा अर्थमन्त्री विष्णुप्रसाद पौडेलले यो प्रणालीको सुरुवात गरेका हुन्। व्यापार सहजीकरण र व्यवसायिक लागत घटाउने उद्देश्यले यो प्रणाली कार्यान्वयनमा ल्याइएको छ।
कार्यक्रममा अर्थमन्त्री पौडेलले भन्सारमा हुने न्यून बिजकीकरण र राजस्व चुहावट रोक्न निजी क्षेत्रले सरकारलाई सहयोग गर्नुपर्ने बताएका छन्। पौडेलले भन्सारमा हुने गलत काम नियन्त्रण गर्न प्रशासन र निजी क्षेत्र एक हुनुपर्ने उल्लेख गरे।
मन्त्री पौडेलले निजी क्षेत्र र भन्सार प्रशासनबीच जीवन्त र घनिष्ट सम्बन्ध रहनुपर्ने बताए। भन्सारसँग सम्बन्धित विषयमा निजी क्षेत्रका गुनासा आउने गरेको भन्दै त्यसलाई व्यवहारिक र कानुनी तवरबाट समाधान गर्दै जानुपर्नेमा पनि जोड दिएका छन्।
मन्त्री पौडेलले निजी क्षेत्र विना भन्सार र भन्सार विना निजी क्षेत्रको अस्तित्व नहुने भएकाले आपसी समस्या समाधान गर्दै जानुपर्ने उल्लेख गरे। पौडेलले कोभिड खोप लगाउने अभियान अब निरन्तर अघि बढ्ने भएकाले त्यसले आर्थिक कृयाकलापमा भन्सार प्रणालीलाई आधुनिकीकरण गर्ने प्रक्रिया निरन्तर कायम रहेको र त्यसका लागि नवीनतम प्रविधिको प्रयोग भइरहेको कोभिढ-१९ को महामारीमा पनि आपूर्ति श्रृङ्खला नियमित राख्न सफल भएको बताएका छन्।
विश्व भन्सार संगठनको स्थापना दिवसको अवसरमा मनाइने अन्तर्राष्ट्रिय भन्सार दिवसको अवसरमा बोल्दै अर्थसचिव शिशिर ढुंगानाले भन्सारलाई सुदृढ गर्नका लागि सरकार लागिपरेको बताए। सूचना प्रविधिमा आधारित प्रणाली विकासमा सरकारले भन्सार प्रशासनमा लगानी बढाउँदै गएको र त्यसको परिणाम देखिन थालेको ढुंगानाको भनाइ छ।
कार्यक्रममा उद्यो, वाणिज्य तथा आपूर्ति मन्त्रालयका सचिव डा बैकुण्ठ अर्यालले भन्सारलाई राजस्व संकलन गर्ने कार्यालयका रूपमा मात्रै भन्दा व्यापार सहजीकरणको प्रमुख निकायको रूपमा हेर्नुपर्ने बताए। उनले तीव्ररूपमा भन्सारले प्रविधिको अवलम्वन गरिरहेको पनि उल्लेख गरे।
अर्थ मन्त्रालयका राजस्व सचिव रामशरण पुडासैनीले भन्सार विभागले कोभिड-१९ को संकटमा पनि आपूर्ति व्यवस्था सहज बनाउन भन्सारले खेलेको भूमिकाको प्रसंसा गरेका छन्। उनले भविष्यमा पनि उत्कृष्ट कार्यसम्पादनका लागि निर्देशन दिए।
भन्सार विभागका महानिर्देशक सुमन दाहालले योपटकको दिवस विशेष भएको बताए। कोभिड-१९ को महामारीका क्रममा विभागले वस्तु आपूर्तिमा गरेको सहजीकरण तथा डिजिटाइजेसन सुरु गरेको उनको भनाइ छ। गएको वर्षदेखि महामारीका क्रममा अभ्यासमा आएका कतिपय प्रणालीले नेपालको भन्सार प्रशासनमा उल्लेख्य योगदान गर्ने उनले बताए।
नेपाल उद्योग वाणिज्य महासंघका अध्यक्ष शेखर गोल्छाले भन्सारले पछिल्लो समय ल्याएका सुविधाहरु अझै सुदृढ हुनुपर्ने बताए। पूर्वादेश र एकद्वार सेवा प्रयोगका लागि अझ सरल नीति लिनुपर्ने उनको भनाइ छ। अझै पनि व्यापार लगात धेरै तथा प्रक्रियागत झन्झट कायमै भएकाले सुधार हुनुपर्ने उनको भनाइ छ।
नेपाल उद्योग परिसंघका कार्यबहाक अध्यक्ष विष्णु अग्रवालले भन्सारले डिजिटाइजेशनका क्षेत्रमा उदाहरणीय काम गरिरहेको बताए। सेवा प्रावाहको क्षेत्रमा आधुनिक प्रणालीको विकास र विस्तार हुँदै गएकाले आफूहरुलाई काम गर्न पनि सहज हुँदै गएको र यसबाट व्यापार लागत न्यून हुँदै गएको उनको भनाइ छ।
यस्तै नेपाल चेम्बर अफ कमर्शका अध्यक्ष राजेशकाजी श्रेष्ठले सरकारले आफूले नीतिमा लेखेको कुरामात्र कार्यान्वयन गरिदिए अन्तर्राष्ट्रिय व्यापारको लागत घट्ने बताए। नाकामा २० प्रतिशतमात्र रेड च्यानल बनाउने सरकारको घोषित नीति कार्यान्वयन हुनुपर्ने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
