देशमा अनेक थोक भइरहेको छ। राजनितीक माहोल ठीक छैन। स्वास्थ्यको माहोल ठीक छैन। यसैसँग जोडिएर अन्य क्षेत्रको माहोल पनि यतिखेर ठीक छैन। मनोरञ्जन क्षेत्र पनि मनोरञ्जन दिनसक्ने अवस्थामा छैन। यति हुँदाहुँदै पनि कलाकारहरु नव सामान्यिकरणका लागि जुटिरहेका छन्। यहि क्रममा गायिका इन्दिरा जोशीले आफ्नो नयाँ गीत ‘बेग हानी गाको’ ल्याएकी छन्। नेपाल आइडलकी 'जज'समेत रहेकी गायिका इन्दिरा जोशीसँग नेपाल लाइभका डिबी खड्काले गरेको संवाद:
करिब नौ महिनापछि फेरि पहिलेकै अवस्थामा फर्किन खोजिरहेका छौं। तपाईंलाई नयाँ समयमा प्रवेश गरेजस्तो लाग्दैछ?
कोरोना नयाँ रोग भयो हामी सबैका लागि। तर पनि हामीले यससँग जुध्यौं र जुधिरहेका छौं। फर्केर हेर्ने हैन, अगाडी नै बढ्ने हो। मान्छेको प्रकृति भनेको पनि सधैं अगाडि बढ्ने नै हुन्छ। जहाँबाट हामी रोकिएका थियौं, त्यहीँबाट निरन्तरता दिने हो। तर तरिका फरक होला। जस्तो कि, पहिले सामाजिक दूरी कायम गर्नुपर्ने थिएन, अहिले छ। आफू र आफ्नाहरुको स्वास्थ्यको ख्याल राख्दै काम गर्नुपर्ने समय अहिले आएको छ।
नौ महिना अर्थात् कोभिड भरको अवधि कसरी कटाउनुभयो त ?
त्यस्तो सकसपूर्ण भएन। एकदम सक्रिय जिन्दगी बाँचिरहेको मान्छेलाई केही समय त मज्जा आयो। मन लागेको कुरा गर्न पाइयो, मन लागेको खानेकुरा पकाएर खान पाइयो। म त केटी मान्छे, छालालाई स्याहार गर्ने मौका पाइएको थिएन, कपालमा तेल लगाउने समय मिलेको थिएन, त्यो पाइयो। अडियो बुक, मन लागेको फिल्म, सिरिज हेर्न पाएँ। परिवारसँग समय बिताउन पाउँदा मज्जा आयो। तर बिस्तारै मान्छे मरेका समाचार सुन्न थालियो अनि नराम्रो लाग्न थाल्यो। अहिले त अब सामान्य अवस्थातिरै जिन्दगी अगाडी बढ्दैछ।
भर्खरै बाहिर आएको नयाँ गीत त छँदै छ, त्यो बाहेक केके गर्नुभयो यो नौ महिनाको समयमा?
नौ महिनाको विश्रामपछि मैले कार्यक्रम गरेकै अंग्रेजी नयाँ वर्षको दिन हो। त्यसमा पनि अडियन्सबाट निकै टाढा थिएँ, निश्चित अडियन्सको साथमा।
डर त लागेन नि, कोभिडपछि पहिलोपल्ट मासमा जाँदा?
लागेन। म त निकै एक्साइटेड थिएँ। स्टेजको न्यास्रो लागेको थियो। लामो समयपछि कन्सर्ट गर्न पाउँदा निकै मज्जा आयो।
तपाईंका रोमान्टिक गीत धेरै थिए। अहिले फरक विधामा 'बेग हानी गाको' ल्याउनुभयो। स्टेजमा नाच्ने गीत मात्रै गाउँछे भन्ने छवि मेटाउन यस्तो गीत गाउनुभयो कि?
अँ, मेरो निकै रहरले जन्मिएको गीत हो यो। यस्तो प्रकारको गीतमा मेरो निकै रुची थियो। फरक शैलीको अर्को गीत पनि अब छिट्टै आउँदैछ, त्यो मैले रेकर्ड गराइसकें। मार्च २५ मा मेरो १० बर्ष पुग्छ गायन क्षेत्रमा प्रवेश गरेको। तर अहिलेसम्म मैले आफूलाई रुची भएको काम गर्न पाएको थिइन, त्यसैको फलस्वरुप 'बेग हानी' ल्याएँ। अहिले सबैले यसलाई मन पराइदिनुभएको छ।
अभिनय पनि गर्नुभएछ। यो पनि रहरकै हो कि ?
मलाई हाम्रो निर्देशक एलिन श्रेष्ठले अभिनयका लागि उक्साउनुभएको हो। नत्र हामीले त अर्कै नायिका खोज्नेबारे सोचेका थियौं। अडियो लकडाउन अगाडि नै तयार भएपनि कोभिडले ढिलो गरायो। नियम परिवर्तन भएको भयै गरेर हैरान परेका थियौं। त्यसैले मात्रै यसमा मैले अभिनय गरें। अहिले सबैले मन पराइदिनुभएको छ, रमाइलो लागिरहेको छ।
अब इन्दिरा जोशीलाई तीन मिनेटमा हैन, तीन घण्टामा देख्न सकिन्छ?
म आफैं फिल्म मन पराउने मान्छे हो। पहिले पनि अफर आएको थियो। चुलबुली र फास्ट गीत गाउने देखेर त्यस्तो आएको हुनसक्छ। अब भने मेरो सिरियस गीत र अभिनय हेरेर यदि राम्रो भुमिकामा अप्रोच गर्नुभयो भने पक्कै पनि गर्छु होला।
म्युजिक भिडियोमा अन्तरजातीय प्रेम देखाउन खोजिएको छ। यो नयाँ कुरा होइन रिलका लागि, रियलका लागि पनि। किन यही कथावस्तु रोज्नुभयो?
कथा वियोगान्त छ। जति समाज विकसित भएपनि हाम्रा दिमागमा यो कुरा अझै छ। अहिलेको जमानामा आइपुग्दा जातीय बिभेद नहुनुपर्ने थियो तर छ। हाम्रो जेनेरेसनले अब हटाउनुपर्छ। मलाई पनि संयोगान्त अन्त गर्न र रमाइलो गीत मात्रै गाउन मन छ। यस्ता वियोगान्त र समाजको तितो यथार्थ चित्रण गरेका गीत संगीतमा काम गर्न मन छैन। तर समय जति बिकास भएपनि हाम्रो सोच विकसित हुन सकेको छैन। विज्ञानले समेत दुई जातको जिन मिसियो भने राम्रो बच्चा जन्मन्छ भन्छ तर हामी अझै किन जातमा अल्झिरहेका छौं। मनबाटै यो कुरा फिल भएरै मैले यस्तो भिडियो बनाएको हो।
कमेन्टमा पनि आएको थियो, इन्दिराको पनि अन्तरजातीय प्रेम नै छ कि क्या हो भनेर !
म यस्तो कुरा पक्कै हेर्दिनँ। पर्दामा आउने मान्छे, धेरैले गायिकाको रुपमा लिने मान्छे भएकाले जात हेर्दिनँ। जुन जातसँग प्रेम हुन्छ, उसैसँग बिहे गर्छु।
रमाइलोसँगै सामाजिक उत्तरदायित्व पनि पूरा गर्नुभयो त्यसो भए म्युजिक भिडियो मार्फत्?
हामीलाई सधैं मनोरञ्जन गर्ने मान्छेहरुसँग मात्रै तुलना गर्न मिल्दैन नि त।
गायनको जज अर्थात् जाँचकी पनि हुनुहुन्छ। अर्काको गायनलाई जाँचिरहँदा कस्तो अनुभव हुनेरहेछ ?
म निकै राम्रो स्रोता हुँ। पहिलेदेखि नै अन्य सहकर्मीलाई सल्लाह सुझाव दिइरहेको हुन्थे। त्यही भएर यो कुनै नौलो कुरा भएन। बरु नेपाल आइडलमा आएपछि मैले धेरै कुरा सिक्ने मौका पाएँ। अहिलेका जेनेरेशनसँग हामीमा नभएको कन्फिडेन्ट छ। धेरै कुरा सिक्ने र थोरै कुरा सिकाउने मौका पाएकोमा आफूलाई भाग्यमानी ठान्छु।
अहिले चलिरहेको द्वन्द्व छ नि गायक र संगीत उत्पादकको। तपाई पनि हुनुहुन्छ ५७ जनाको टोलीमा?
कोही कलाकारलाई अन्याय हुन्छ भने अहिले मात्रै होइन, पहिलेदेखि नै मेरो समर्थन छ। सम्झौतामा भएका कुरा पालना नगर्ने, गीतमा जस्को अधिकार छ त्यसलाई वास्ता नगर्ने अनि आफू मात्रै कमाइरहने तरिकाले कलाकार मारमा पर्छन्। त्यसैले मेरो साथ समर्थन छ। ५७ जनामा म पनि छु।
डिजिटल अधिकारको बारेमा सरकार र हामी सबै नयाँ छौं। तर नयाँ भनेर अन्याय सहेर बस्नपनि त भएन। हामी नेपालीलाई थाहा छैन, एउटा चलेको गीत भनेको करोडौं रकम हो। त्यो कलाकालाई नदिई एक्लै कुम्ल्याउनु भएन। अहिले युट्युवमा मानिसको लगाव बढ्नुको कारण पनि यही हो। यो पारदर्शी छ। तुरुन्तै डलरमा कमाइ देखाइदिन्छ।
तपाईंलाई थाहा छ, देशको राजनीति के भइरहेको छ?
थाहा छ। तर म कसैको पक्ष र बिपक्षमा बोल्न चाहन्नँ। एउटा नागरिक भएको कारण यी कुरा जान्न जरुरी पनि छ। फेरि चुनाव हुँदैछ रे। कोरोनाले अर्थतन्त्र थिलोथिलो भएको बेला झनै आर्थिक भार किन थपेका छन्। के यसको अर्को विकल्प थिएन होला र? मसँग त प्रश्नै प्रश्न मात्रै छन्। अस्ति एउटा समाचार पढेको थिएँ, सवैभन्दा कमजोर पासपोर्ट भएको देशमा पर्दोरहेछ हाम्रो देश त।
भिडियो कुराकानी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
