सांसद गुरुङद्वारा तनहुँमा ४५ करोड रकम विनियोजन

अर्थ समाचार

रासस शनिबार, मंसिर २०, २०७७ २०:३९

तनहुँ- तनहुँ क्षेत्र नं १ ‘क’ को समष्ठीगत विकासका लागि चालु आर्थिक वर्षमा करिब ४५ करोड खर्च हुने भएको छ। प्रदेशसभा सदस्य रामबहादुर गुरुङको पहलमा गण्डकी प्रदेशले मोटरेबल पुलका लागि करिब ३२ करोड र सडकमार्गका लागि १३ करोड गरी कूल ४४ करोड ८४ लाख रकम विनियोजन भएको छ। पूर्वाधार विकास कार्यालय तनहुँमार्फत उक्त योजनाको लागि बजेट विनियोजन गरिएको गण्डकी प्रदेशसभा सदस्य गुरुङले बताए।

सात मोटरेबल पुल र १० वटा सडकमार्गका लागि उक्त बजेट विनियोजन गरिएको हो। उनले भने, ‘जनतासमक्ष गरेका प्रतिबद्धता पूरा गर्ने गरी पाँच वर्षसम्म विकास निर्माणका कामलाई जोड दिइएको छ।’ व्यास नगरपालिका–१ र ३ देउराली नगर जोड्ने बुल्दीखोला सडक पुल निर्माणका लागि अनुमानित नौ करोड ५० लाख, व्यास नगरपालिका–८ स्थित रिस्तीखोला मोटरेबल पुलका लागि चार करोड ८० लाख ९५ हजार र सोही खोलामा अर्को पुल निर्माणका लागि पाँच करोड तीन लाख ५२ हजार रूपैयाँ विनियोजन गरिएको छ।

त्यसैगरी बुल्दीखोला पुल निर्माण घाँसीकुवा व्यास–११ फराकचौरका लागि चार करोड, दमौली बीसघरे झापुटारका लागि चार करोड ५० लाख र गोरखा पालुङटार र भानु नगरपालिका जोड्ने मर्स्याङ्दी नदी सडक पुलका लागि चार करोड रकम विनियोजन गरिएको छ।