जुम्ला- पछिल्लो समय जुम्लाका किसान ओखरखेतीप्रति आकर्षित हुँदै गएका छन्। जिल्लामा ओखर भण्डारण गर्न समस्या नभएको र हावापानी निकै अनुकूल हुँदा उनीहरुका लागि राम्रो आम्दानीको स्रोत बनेको हो। चन्दननाथ नगरपालिका–८ का कालीबहादुर भण्डारीले ओखरखेतीबाट मनग्ये आम्दानी हुने जानकारी दिए।
तिला गाउँपालिका–१ का रमा बुढाले आफूहरु व्यावसायिकरुपमा ओखरखेतीमा लागेको र आयआर्जनसमेत वृद्धि गरेको बताए। उनले भने, ‘स्थानीय सरकारले किसानका लागि राहत हुने गरी काम गर्नुपर्छ र अनुदानको व्यवस्था मिलाउनुपर्छ।’ आगामी वर्ष ओखर बेचेर २ लाखसम्म कमाउन सक्नेगरी बगैँचा व्यवस्थापनमा आफूहरू जुटेको हरिकला रोकायाले जानकारी दिइन्। सुरुको चरणमा हुुर्काउन दुःख हुने गरेको छ। पछि हुर्केपछि ओखरमा खासै दुःख नहुने यहाँका किसान बताउँछन्।
कम मेहनतमै बढी आयआर्जन हुने खेती ओखर भएको किसानको अनुभव रहेको छ। खरिद गर्न व्यापारी गाउँमै आउने गरेका छन्। यहाँका आठवटै स्थानीय तहमा यसको खेती हुँदै आएको छ। एकै बोटमा पाँच हजार रूपैयाँसम्मको ओखर फल्ने गरेको उनीहरुको भनाइ रहेको छ।
अहिले खलङ्गा बजारका विभिन्न चोकमा ओखर बेच्ने किसानको भीडभाड हुने गरेको छ। जिल्ला कृषि विकास कार्यालयका प्रमुख बालकराम देवकोटाले ओखरखेती गर्नेको सङ्ख्या जिल्लामा बढेको जानकारी दिए। कार्यालयका अनुुसार जिल्लामा १९० हेक्टरमा ओखरखेती हुने गरेको छ। उनले भने, ‘एक वर्षमा १५ टनसम्म ओखर फल्ने गरेको छ। अधिकांश किसानले ओखर कोसेलीघरमा पुगेर प्याकेजिङ गरी बिक्री गर्ने गरेका छन्।’ बजारमा अहिले ओखरको मूल्य प्रतिदाना १० रूपैयाँका दरले बिक्री हुने गरेको धिताल अर्गानी पसलका सञ्चालक टीकाराज धितालले जानकारी दिए।
काठमाडौं, पोखरा, नेपालगञ्ज र सुर्खेतलगायतका जैविक पसलमा यहाँको ओखर खपत हुने गरेको छ। मागअनुसार यहाँका किसानले सहजै पुर्याउन नसकेको बताइएको छ। तीन रोपनी जग्गा एकै क्लष्टरमा भएका किसानको समूह बनाएर बिरुवा, काँटछाट, रोगकिरा नियन्त्रण र सिँचाइका क्रियाकलाप उपलब्ध गराइएको कार्यालयले जनाएको छ।
ओखर बेचेर जिल्लामा करोडभन्दा बढी भित्र्याउने गरिएको कोसेली घरकासञ्चालक गोविन्द आचार्यले जानकारी दिए। यहाँ आउने आन्तरिक तथा बाह्य पर्यटकको एकमात्र रोजाइ ओखर हुने गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
