बुटवल– बुटवल उपमहानगरले भौगोलिक सूचना प्रणालीका आधारमा नगर प्रोफाइल बनाउने काम सुरु गरेको छ।
यसका लागि विशेषज्ञसहितको टोलीले अहिले उपमहानगरपालिकाको भौगोलिक अवस्थाको अध्ययन गरेर अन्तिम प्रतिवेदन तयार पारिरहेको छ।
उपमहानगरपालिकाको आवधिक र दीर्घकालीन गुरुयोजनाका लागि आवश्यक पर्ने तथ्यांकलाई हाइटेक प्रणालीबाट संकलन गरिरहेको जानकारी दिँदै प्रमुख शिवराज सुवेदीले यसैका आधारमा योजनाको प्रभावकारी कार्यान्वयन गरिने बताए।
भौगोलिक सूचना प्रणालीका माध्यमबाट बुटवलको भौगोलिक आकृति तथा भू–भागलाई आधुनिक प्रविधिमार्फत तयार पारिन्छ। बुटवलले अहिले विभिन्न ८ प्रकारका यस्ता हाइटेक तथ्यांक संकलन गरिरहेको छ।
उपमहानगरपालिकाको आवासीय, व्यावसायिक, शैक्षिक, स्वास्थ्य, आर्थिक, धार्मिक, स्वास्थ्य तथा सञ्चारका आधारमा प्रारम्भिक चरणको तथ्यांक संकलनको काम पूरा भइसकेको प्रमुख सुवेदीले जानकारी दिए।
६ जना विषय विज्ञसहितको २० जनाको टोली विगत ४४ दिनदेखि यही काममा दैनिक खटिइरहेको छ। जीआइएस विज्ञहरु इञ्जिनियर भरतप्रसाद बञ्जारा र डिल्लीराज अधिकारीले नेतृत्व गरेको यो टोलीले उपमहानगरको हाइटेक मानचित्रको प्रारम्भिक खाका तयार पारिसकेको छ।
पहिलो चरणको काम सकेर नगरप्रमुख सुवेदी, उपप्रमुख गुमादेवी आचार्य, प्रमुख प्रशासकीय अधिकृत राजनकुमार बिसी, प्रवक्ता रामप्रसाद रेग्मीलगायत कार्यपालिका सदस्यलाई जानकारी गराई सुझाव लिने कामसमेत भइरहेको इञ्जिनियर बञ्जाराले जानकारी दिए।
संकलित विवरणका आधारमा उपपमहानगरले योजना बनाउन सजिलो हुने भएकाले कुनै पनि ठाउँको विवरणलाई नछुटाउन र छुटेका भए तत्कालै अद्यावधिक गर्न उपप्रमुख आचार्यले निर्देशन दिइन्। बाँकी रहेका विवरण उपमहानगरका योजना÷प्राविधिक शाखासमेतको सुझावका आधारमा अद्यावधिक गरिने इञ्जिनियर बञ्जाराले जानकारी दिए।
यसका आधारमा उक्त टोलीले अहिले उपमहानगरमा ४० हजार १ सय ६० घरधुरीमा यही प्रणालीका आधारमा हाइटेक कोड प्रदान गरिसकेको छ। उपमहानगरमा सबैभन्दा धेरै घर वडा नम्बर ११ मा रहेका छन्। त्यहाँ ९ हजार १ सय ४७ र सबैभन्दा कम वडा नम्बर ५ मा रहेका छन्।
वडा नम्बर ५ मा ३ सय ९६ मात्रै घरधुरी रहेको विवरण उक्त टोलीले उपमहानगरलाई दिएको छ। टोलीले ३६ हजार ६ सय ६२ घरको प्राविधिक नामाकरण गरिसकेको छ भने बाँकी ३ हजार ४ सय ९८ घरधुरी प्रक्रियामा छन्। यसका आधारमा त्यहाँका सबै तथ्यांकलाई हाइटेक प्रविधिमा रुपान्तरण गर्न सकिनेछ।
उपमहानगरको कुनै पनि स्थानका कुनै पनि घर वा भवन र त्यहाँका संरचनाका बारेमा कार्यालयमा जडित प्रविधिसहितको कम्प्युटरमा बसेर हेर्न सकिने गरी प्रविधि जडानको तयारी भइरहेको प्रवक्ता रामप्रसाद रेग्मीले बताए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
