काठमाडौं- दक्षिण कोरियाली कार उत्पादक कम्पनी हुन्डाईले उत्पादन गरेको विद्युतीय कार कोनामा आगलागी समस्या देखिएको छ। कम्पनीले कोरियासँगै युरोप, अमेरिका, चीन तथा अन्य बजारमा बिक्री भएका हजारौँ कोना विद्युतीय कार फिर्ता लिने निर्णय गरेको छ।
नेपाली बजारमा पनि हुन्डाईका विद्युतीय कार कोना बिक्री हुँदै आएको छ। हुन्डाईको नेपालका लागि आधिकारिक बिक्रेता लक्ष्मी इन्टरकन्टिनेन्टलले २०७५ फागुनमा कोना इलेक्ट्रिक कार सार्वजनिक गरेको थियो। नेपाली बजारमा त्यसयता २२३ वटा कोना बिक्री भएको तथ्यांक छ।
लक्ष्मी इन्टरकन्टिनेन्टलले हुन्डाईका दुई इलेक्ट्रिक कार आयोनिक र कोना नेपाल भित्र्याएको हो। २०१८/१९ मा १३ वटा र २०१९/२० मा १० वटा आयोनिक कार नेपाल आएका थियो। आयोनिक सेडान सेगमेन्टको इलेक्ट्रिक कार हो। यसमा समस्या देखिएको छैन।
तर कोनामा भने आगलागीको उच्च जोखिम भएको निष्कर्ष कोरियाली मन्त्रालयले निकालेको हो। नेपाली बजारमा २०१८/१९ मा ४३ वटा हुन्डाई कोना भित्र्याइएको तथ्यांक छ। पहिलो वर्ष कम ल्याएको भए पनि दोस्रो वर्ष २०१९/२० मा १ सय ८० वटा कोना आयात भएको तथ्यांक छ। नेपाल आयात भएको कोनामा समस्या छ वा छैन हालसम्म यकिन भएको छैन।
हुन्डाईको कोना भारतमा भन्दा निकै अघि नेपाल भित्रिएको हो। सरकारले आर्थिक ऐन २०७७ मा निजी प्रयोजनका विद्युतीय कारमा भन्सार बढाउने र अन्तःशुल्क लगाउने निर्णय गरेसँगै कुनै पनि विद्युतीय कार भन्सार जाँचपास भएर नेपाल भित्रिएका छैनन्।
मन्त्रिपरिषद्ले केही साताअघि निजी प्रयोजनका लागि ल्याइने विद्युतीयका कारमा लाग्ने अन्तःशुल्क ८० प्रतिशतसम्म छुट दिने निर्णय गरेपछि भने विद्युतीय कार आयातकर्ताहरू भन्सार जाँचपास गराउन तातेका छन्। भारतीय बजारमा हुन्डाईका कोना २०१९ को जुलाईमा मात्र सार्वजनिक भएको थियो।
हुन्डाईले २०२० जुन ३० सम्ममा विश्वभर १ लाख ३ हजारभन्दा बढी कोना बिक्री गरिसकेको छ। आगलागीको उच्च जोखिममा रहेको कोरिया सरकारको विवरण प्राप्त भएपछि हुन्डाईले सोमबार उत्तर अमेरिका, युरोप, चीन र अन्य बजारबाट समेत फिर्ता ल्याउने बताएको थियो। अघिल्लो साता हुन्डाईले कोनामा प्रयोग भएको ब्याट्रीका कारण आगो लाग्ने उच्च जोखिम देखिएको भन्दै कोरियामै बिक्री भएका कोना फिर्ता लिने घोषणा गरेको थियो।
हुन्डाईले उत्तर अमेरिका, युरोप, चीन तथा अन्य बजारबाट करिब ५१ हजार वटा कोना फिर्ता लिने बताएको थियो। त्यस्तै कोरियामा बिक्री भएका २५ हजार ५ सय ६४ वटा कोना इलेक्ट्रिक कार फिर्ता लिन निर्णय गरेको थियो।
दक्षिण कोरियाको यातायात मन्त्रालयका अनुसार कोना कारमा प्रयोग भएका हाई–भोल्टेज ब्याट्रीमा आगो लाग्ने जोखिम उच्च रहेकाले कम्पनीले फिर्ता मगाएको हो। हाई भोल्टेज खराब ब्याट्री प्रयोग भएकाले कारमा आगलागीको जोखिम बढाउने हुन्डाईले जनाएको छ। आगलागीको जोखिम बढ्नुका कारण पत्ता लगाएर उपभोक्तालाई सम्बोधन गरिने हुन्डाईको भनाइ छ।
कोना इलेक्ट्रिकमा आगलागीका १३ वटा कारण औंल्याइएको छ। हुन्डाई कोनामा एलजी चेमले बनाएको ब्याट्री प्रयोग गरिँदै आएको छ। तर ब्याट्री उत्पादकले भने ब्याट्री सेलका कारण आगलागीको जोखिम नबढाएको दाबी गरेको छ। यसको कारण पत्ता लगाउन भविष्यमा हुन्डाईसँग अनुसन्धानमा लाग्ने एलजी चेमले जनाएको छ। हुन्डाईले सेप्टेम्बर २०१७–मार्च २०२० मा बनेका कोनामा आगलागीको उच्च जोखिम देखिएपछि फिर्ता लिने बताएको हो।
नेपाली बजारमा भित्रिएका सबै २ सय २३ वटा कोना इलेक्ट्रिक सोही अवधिमा बनेका हुन्। २ सय २३ कोना इलेक्ट्रिकका उपभोक्ता कत्तिको सुरक्षित छन् भन्ने प्रश्न उठेको छ। कम्पनीले चीनलगायत बजारमा बिक्री भएका कार फिर्ता गर्ने भनेकाले ‘लगायत' शब्दले नेपाल पनि समावेश हुने बताइएको छ।
हुन्डाईले युरोपबाट ३७ हजार ३ सय ६६ वटा र उत्तर अमेरिकाबाट ११ हजार १ सय ३७ वटा कोना इलेक्ट्रिक फिर्ता लिने जनाएको छ। चीनलगायत अन्य बजारबाट फिर्ता लिने कोना इलेक्ट्रिकको संख्या भने हुन्डाईले खुलाएको छैन। नेपाल आयात भएका कारहरू फिर्ता भएको पाइँदैन।
विश्व बजारबाट ठूला कार उत्पादकहरुले आफूले उत्पादन गरेका सवारी साधनमा समस्या देखिए फिर्ता मगाएर मर्मत गरेर पुनः पठाउने गरेका छन्। तर नेपाल आएका कारमा समस्या नै नहुने गरेको हो वा कार आयातकर्ताले उपभोक्ताको जिउज्यानमा खेलवाड गरेका हुन् त्यो यकिन रूपमा भन्न सकिने अवस्था छैन।
विद्युतीय कारमा आगो लाग्नेसम्मको उच्च जोखिम देखिएको कोरियाली मन्त्रालयले बताइसकेको र त्यस लगत्तै कार उत्पादक हुन्डाई मोटर कम्पनीले ७७ हजारभन्दा बढी कोना इलेक्ट्रिक फिर्ता लिने निर्णय गरिसकेको छ।
नेपालमा बिक्री भएका २२३ वटा हुन्डाई कारमा आगलागीको जोखिम के-कति भनेर निर्धारण नभएकाले यी कार फिर्ता हुने हुन् वा होइनन् यकिन छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1695028561.jpg)
-1786602170.png)
