काठमाडौं- बैंक तथा वित्तीय संस्थाले आफ्ना ग्राहकलाई पुर्याएको असुविधाको गुनासो सुनुवाई गर्न छुट्टै समितिको गठन हुने भएको छ। नेपाल राष्ट्र बैंकले वित्तीय ग्राहक संरक्षण तथा गुनासो व्यवस्थापन कार्यविधि २०७७ जारी गर्दै बैंक तथा वित्तीय संस्थाले ग्राहकसँग निष्पक्ष, विश्वसनीय र पारदर्शी ढङ्गबाट बैंकिङ सुविधा दिनुपर्ने व्यवस्था गरिएको छ।
यदि बैंक तथा वित्तीय संस्थाले आफ्ना ग्राहकलाई निष्पक्ष, विश्वसनीय र पारदर्शी सेवा प्रवाह नगरे नेपाल राष्ट्र बैंकले सुनुवाई गर्ने व्यवस्था मिलाएको हो। ग्राहकको गुनासो व्यवस्थापन मार्फत वित्तीय ग्राहकको हित संरक्षण गर्न यस्तो कार्यविधि बनाइएको राष्ट्र बैंकले जनाएको छ।
यदि बैंक तथा वित्तीय संस्थाले आफ्ना ग्राहकहरुलाई वित्तीय सेवा प्रवाह गर्दा असहयोग, ढिलासुस्ती, बेवास्ता, पक्षपात, गैर जिम्मेवारी, लापरवाही, झुठो, गलत सूचना संप्रेषण, अपारदर्शी कारोवार जस्ता नकारात्मक व्यवहारलाई न्युनीकरण गरिने राष्ट्र बैंकले जनाएको छ।
वित्तीय सेवा प्रदायकले आफूले प्रदान गर्ने सेवा सम्बन्धमा न्यूनतम मापदण्ड पुरा गरी वित्तीय ग्राहकलाई निष्पक्ष र समान वित्तीय मध्यस्थता सेवा प्रदान वा प्राप्त गर्न वा गराउन प्रोत्साहन गर्नुपर्नेछ।
ग्राहकलाई वित्तीय सेवा प्रदान गर्दा नीति निर्देशनविपरीत निक्षेप संकलन, कर्जा प्रवाह, कर्जा असुलीलगायत अन्य वित्तीय मध्यस्थता सेवा प्रवाहमा गरिने विभेद तथा क्षतिलाई न्यूनीकरण गर्ने कार्यविधिको उद्देश्य रहेको छ।
यस कार्यविधिअनुसार डेपुटी गभर्नरको संयोजकत्वमा गुनासो व्यवस्थापन समिति गठन हुनेछ। यसमा नेपाल बैंकर्स संघ, अर्थ मन्त्रालयका सहसचिवलगायतको उपस्थिति रहनेछ। ग्राहकको गुनासो सुनुवाई गर्न वित्तीय ग्राहक संरक्षण इकाईको गठन हुनेछ। यसको व्यवस्थापन बैंक तथा वित्तीय संस्था नियमन विभागका कार्यकारी निर्देशकले गर्नेछन्।
बैंकप्रतिको गुनासो सुनुवाइका लागि ग्राहकले गुनासो निवेदन इकाईमा स्वयं उपस्थित भई अथवा पत्राचार वा फोन वा इमेलमार्फत् पेश गर्न सक्नेछन्। गुनासोकर्ताले आफ्नो पुरा नाम, सम्पर्क ठेगाना, मोबाइल नम्बर, इमेल ठेगाना दिनुपर्ने हुन्छ। गुनासो गर्दा आर्थिक तथा गैर आर्थिक हानी नोक्सानीको विस्तृत विवरण, गुनासो सम्बन्धमा अदालत वा अन्य निकायमा उजुरी गरे/नगरेको विवरण र त्यस्तो उजुरी गरेको भए निर्णय तथा कारवाहीको अवस्था, र गुनासोसँग सम्बन्धित अन्य तथ्यसहितका आवश्यक कागजात पेश गर्नुपर्नेछ।
इकाईले गुनासोकर्ताबाट प्राप्त निवदेन र वित्तीय सेवा प्रदायकबाट प्राप्त जवाफ विश्लेषण गरी गुनासो समाधानका लागि आवश्यकतानुसार दुवै पक्षसँग थप छलफल गरी समस्या समाधानको लागि पहल गर्न सक्नेछ। समितिले गुनासो सुनुवाई गरी अन्तिम निर्णय गर्न सक्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1789631269.jpg)
