कोरोना अपडेट

नगरको आइसोलेसन व्यवस्थापन देखेर स्थानीयले प्रशंसा गरेका छन्

ज्ञानेन्द्र सुवेदी मंगलबार, भदौ २३, २०७७ १९:४६

काठमाडौं- कुनै ट्राभल हिस्ट्री नभएका मानिसमा कोरोना संक्रमण देखिएपछि समुदायमा कोरोना पुगेको अनुमान नगरपालिकाले गरेको थियो। शुरुशुरुमा नगरभित्र यसरी संक्रमित देखिन थालेपछि निकै गम्भीर भएका थियौं। नगरभित्र भयावह हुने हो कि भन्ने डर लागेको थियो।

छिमेकी झापा जिल्लामा पनि भारतबाट आउने मानिसहरुको ओहोरदोहोर बढेकाले यो नगरमा पनि संक्रमित बढ्ने अनुमानका साथ नगरले तयारी थालेको थियो। हाम्रो तयारी र नगरवासीको सर्तकता र सहयोगले अहिले कोरोना नियन्त्रणतिर रहेको छ।

हालसम्म नगरमा ३२ जनामा कोरोना संक्रमण पुष्टि भएको छ। यी मध्ये अब सक्रिय संक्रमित १२ जना रहेका छन्। २० जना कोरोना संक्रमणमुक्त भएर घर फर्केका छन्। नगरका एक जनाले ज्यान गुमाउनुपर्दा दुख लागेको छ। भदौ १२ गते उनको मृत्यु भएको हो। ५६ वर्षीय मृतक मृगौलाको बिरामी थिए।

हाल नगरको क्वारेनटाइनमा २१ जना बाहिरबाट आएका मानिसहरु रहेका छन्। होम आइसोलेनमा तीन जना छन्। नगरले उनीहरुको अवस्था दैनिक अनुगमन गरिहेको छ। अहिलेसम्म संक्रमितहरुलाई कुनै पनि लक्षण छैन। लक्षण नभएका र समान्य अवस्थाका संक्रमित भएकाले नगरले निर्माण गरेको आइसोलेनमा राखिएको हो।

नगरले कन्ट्याक ट्रेसिङमा जोड दिँदै आएको छ। सबै संक्रमित कन्ट्याक ट्रेसिङकै आधारमा पत्ता लागेका हुन्। अब नयाँ संक्रमित नदेखिएका परीक्षण गर्न परेको छैन।

१३ महिने शिशुको परिवारमा संक्रमण
नगरमा सबैभन्दा कम उमेरको संक्रमित १३ महिने शिशु छन्। उनलाई छिमेकबाट संक्रमण भएको कन्ट्याक ट्रेसिङमा पाइयो। उक्त परिवारमा ती शिशुका हजुरआमा र काकामा पनि कोरोनो पोजेटिभ भयो। उनका छिमेकी तीन जनामा शुरुमा संक्रमण पुष्टि भएको थियो। उनीहरु अहिले उपचारपछि निको भएर घर फर्केका छन्।

१३ महिने शिशुको परिवार अहिले होम आइसोलेनमा छ। नगरले हालसम्म ९ सय ५६ जनामा पिसिआर परीक्षण गरेको छ। थप परीक्षणको आधार नभएकाले अहिले परीक्षण गरिएको छैन। नयाँ संक्रमित फेला परेमा फेरि नगरले तीव्र गतिमा कन्ट्याक ट्रेसिङ गर्नेछ।

आइसोलेसनमा वाइफाइ पनि
समुदायस्तरमै कोरोनाको संक्रमण फैलिन थालेसँगै बेलबारी नगरपालिकाले संक्रमितलाई राख्ने सुविधायुक्त आइसोलेसन बनाएको छ। बेलबारी नगरपालिका वडा नम्बर-२ को बागदेवी सामुदायिक वन उपभोक्ता समूहको भवनमा २५ शय्याको आइसोलेसन बनाएको हो।

लक्षण नदेखिएका संक्रमितलाई चौबिसै घण्टा स्वास्थ्यकर्मीको निगरानीमा राख्ने व्यवस्था मिलाइएको छ। केही स्थानीय तहले भने क्वारेन्टाइनलाई हटाएर आइसोलेसन बनाइरेहको बेलामा बेलबारी नगरपालिकाले भने आफ्नै लगानीमा क्वारेन्टाइनसमेत सञ्चालन गरिरहेको छ। विभिन्न देशबाट आएकाहरुलाई ४ महिना पहिलेदेखि क्वारेन्टाइनमा राख्दै आएको छ।

लक्षण नदेखिएका संक्रमतिहरुलाई आइसोलेनसनमा राख्ने र लक्षण देखिएका बिरामीलाई भने कोभिड अस्पताल रेफर गरिने गरेका छौं। आइसोलेसन तथा क्वारेन्टाइनमा बस्नेहरूलाई नगरपनलिकाले खाने व्यवस्था गरिरहेको छ।

अहिले निर्माण भएको आइसोलेसनमा वाईफाई तथा सिसी क्यामेरा समेत जडान गरिएको छ । २४ घन्टा नै बत्ती नजाने व्यवस्था समेत मिलाइएको छ। नगरपालिकाको यो कार्यलाई स्थानीयवासीले खुलेर प्रशंसा गरेका छन्। यसअघि पनि नगरपालिकाको नयाँ भवनमा जिल्लाकै पहिलो पटक आईसोलेसन वर्ड निर्माण गरेको भनेर प्रशंसा कमाएको थियो।

२२ गतेदेखि नियमित लकडाउन
कोरोना सक्रमण नरोकिएपछि बेलबारी नगरपालिकाले श्रावण २२ गतेदेखि लगातार रुपमा लकडाउन गरिरहेको थियो। भदौ ७ गते आइतबार बसेको कोरोना नियन्त्रण समन्वय समिति, बेलबारीको बैठकले संक्रमण नघटेको ठहर गर्दै लकडाउन निरन्तरता दिने निर्णय गरेको थियो।

कोरोना सङ्क्रमणको अवस्था सामान्य नभएको, लकडाउन नै एकमात्र भरपर्दाे विधि भएको ठहर गर्दै लकडाउन बढाउने निर्णय गरेकोमा अब पुर्नविचार गर्ने समय हुन लागेको छ।

लकडाउन अवधिभर नगरभित्र अत्यावश्यक सेवाबाहेकका सबै कुरा बन्द रहने, यातायातका साधन पूर्णरुपमा बन्द रहने, साप्ताहिक हाटबजार, सम्पूर्ण सरकारी कार्यालय, बैंक तथा वित्तिय कार्यालय,सहकारी संस्थाहरु,नगरपालिका तथा सो अन्तर्गतका वडा कार्यालयको दैनिक प्रशासनिक सेवा बन्द गरिएको थियो।

लकडाउन अवधिमा पनि औषधि पसल, अस्पताल, क्लिनिक, दूध डेरी, पेट्रोल पम्प, पानीजन्य उद्योग, पशु स्वास्थ्य केन्द्र भेटनरी सेवा सहज रुपमा सञ्चालन गर्ने व्यवस्था मिलाएको थियो। त्यसो त लकडाउन मात्र भरपर्दाे विधि नभएको, लकडाउनभन्दा भोकमारीले मानिसलाई जिउन कठिन बनाइरहेकोले भरपर्दाे सुरक्षाका विधि अपनाएर लकडाउन खोलेर जनजीवनलाई सामान्य बनाउनु पर्नेमा नगरले योजना बनाइरहेको छ। नगरले अब आम जनताको यो आवाज अनुसार फरक शैलीमा जाने तयारी गरेको छ।

मास्क र भौतिक दूरी पालना गराउन कठिन
नगरमा सबैभन्दा धेरै समय खर्चेको र चुनौती रहेको भनेको मानिसहरुलाई बुझाउनु हो। मानिसहरुले कोरोना संक्रमणबाट बच्न भौतिक दूरी कायम गर्ने, मास्क लगाउने कार्य गर्न निकै अप्ठेरो मान्ने गरेका छन्। नगरले शुरु शुरुमा मास्क लगाउने अभियान नै शुरु गरेको थियो। कोरोना रोकथामा अहिले नगरले आफ्नै खर्चमा काम गरिरहेको छ। प्रदेशसँग पनि समन्वयनमा काम गरिरहेका छौं। संघको सहयोग आएको छैन।

(सुवेदी मोरङको बेलबारी नगरपालिकाका मेयर हुन्।)

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।