काठमाडौं-नारायणी अस्पताल भर्ना भई उपचार गराइरहेका वीरगञ्ज महानगरपालिका ३० बस्ने ५४ वर्षीय पुरुषलाई गत साताको सोमबार कोरोना पुष्टि भयो। थप उपचारका लागि उनलाई सोही दिन वीरगञ्ज हेल्थ केयरको आइसोलेसन वार्डमा पुर्याइयाे। श्वासप्रश्वासमा समेत समस्या रहेका ती पुरुषको सोमबार (हिजाे)दिउँसो १ बजे मृत्यु भयो।
कोरोना 'हटस्पट' पर्सा जिल्लामा सोमबार साँझ ४ बजेसम्म २ हजार ४ सय १ (१८ सय ६५ पुरुष र ५ सय ३६ महिला ) जनामा संक्रमण पुष्टि भइसकेकाे छ भने ४२ जना कोरोना संक्रमितको निधन भएको जिल्ला प्रशासन कार्यालय पर्साले जनाएको छ।
तर सुरुको अवस्थामा भन्दा कोरोना संक्रमणदर विस्तारै घट्दो अवस्थामा रहेको पर्साका प्रमुख जिल्ला अधिकारी अस्मान तामाङले बताए।
सुरुमा दैनिक १ सयको हाराहारीमा कोरोना संक्रमित भेटिने पर्सा जिल्लामा पछिल्लो समय ४०, ३०, २० हुँदै दैनिक ६ जनाको हाराहारीमा संक्रमित भेटिन थालेको प्रजिअ तामाङले जानकारी दिए।
‘हामीले पहिलो प्राथमिकतामा कन्ट्याक्ट ट्रेसिङ राखेका छौँ। त्यसपछि कोरोनासँग मिल्दोजुल्दो लक्षण देखिएका तथा जनसम्पर्कमा रहने व्यापारी, रिक्साचालकलगायत दैनिक ५ सयको हाराहारीमा पिसीआर गराइरहेका छौँ । स्वाभाविक रुपमा कोरोना नियन्त्रण हुने क्रममा छ’ प्रजिअ तामाङले नेपाल लाईभसँग भने।
हट्ला निषेधाज्ञा ?
पर्सामा भदौ २५ गते राति १२ बजेसम्मका लागि निषेधाज्ञा घोषणा गरिएकाे छ। केही समयको कडाइपछि प्रशासनले पछिल्लो समय कोरोना नियन्त्रणसँगै आर्थिक गतिविधिलाई समेत सञ्चालन गरिरहेको छ ।
‘हामीले कोरोना नियन्त्रणसँगै आर्थिक गतिविधिलाई पनि सँगै लगेका छौँ। तरकारी तथा फलफूल पसलहरु बिहान ५ बजेदेखि ८ बजेसम्म र अन्य पसलहरु बिहान ११ बजेदेखि दिउँसो ४ बजेसम्म खुल्ला गराएका छौँ’, प्रजिअ तामाङले भने।
संयुक्त अनुगमन टोलीद्वारा वीरगंज राधेमाई र विन्दवासिनीमा रहेका विभिन्न खाद्यान्न तथा किराना पसलहरुमा अनुगमन गरिँदै।
उनका अनुसार स्वास्थ्य मापदण्ड पालना गर्दै उद्योगधन्दाहरु पनि सो समयमा सञ्चालन गर्न दिइएको छ। बैंकहरु खुल्ला छन् । अत्यावश्यक वस्तुहरुको सहज आपूर्ति भइरहेको जिल्ला प्रशासन कार्यालयले जनाएको छ ।
प्रजिअ तामाङ भन्छन्, ‘यो निषेधाज्ञामा बजारलाई खुकुलाे बनाउने हाम्रो कन्सेप्ट हो। यो २५ गतेसम्म कायम रहन्छ त्यसपछि यसलाई पुनरावलोकन गर्ने अथवा निरन्तरता दिने भन्ने निर्णय गर्न अझै हामीसँग ३ दिन समय छ । कोरोना संक्रमणको अबस्था हेरेर मात्रै हामी यसबारे निर्णय गर्न सक्छौँ ।’
कस्तो छ संक्रमितको अबस्था ?
पर्सामा संक्रमित २ हजार ४ सय १ मध्ये २४ जना भारतीय नागरिक रहेको जिल्ला प्रशासन कार्यालय पर्साले जनाएको छ।
१ सय ३८ जना स्वास्थ्यकर्मी, १ सय २३ सुरक्षाकर्मी, १४ जना मिडियाकर्मी, १ सय ७ जना कैदी, ४९ जना अस्पताल सरसफाइका कर्मचारी, सुरक्षा गार्ड तथा ३ जना एम्बुलेन्स चालक रहेका छन् ।
जिल्लाका विभिन्न अस्पतालका आइसोलेसनमा ६२ संक्रमित छन् । १३ जना आइसीयुमा उपचाररत छन् ।
नारायणी कोभिड अस्पतालको आइसोलेसनमा ३८ पुरुष र ९ जना महिला गरी ४७ जना र वीरगंज हेल्थ केयरमा ११ पुरुष तथा ४ महिलासहित १५ जना आइसोलेसनमा छन्। ७ जना आइसीयुमा उपचाररत छन् । नारायणी अस्पतालको बेड भने खाली रहेको जिप्रकाले जनाएको छ।
होम आइसोलेसनमा ९ सय २६ संक्रमित
अवस्था सामान्य भएका तथा घरमै बस्न मिल्ने वातावरण भएका ९ सय २६ संक्रमितहरु होम आइसोलेसनमा रहेको जिल्ला प्रशासन कार्यालयले जनाएको छ । होम आइसोलेसनमा रहनेमध्ये ७ सय पुरुष तथा २ सय २६ महिला रहेको जनाइएकाे छ।
जिल्लाका विभिन्न स्थानमा ६ सय ८८ बेडको सामुदायिक आइसोलेसन रहेको उल्लेख गरिएको छ। सामुदायिक आइसोलेसनमा २ सय २१ जना संक्रमितहरु रहेको जिल्ला प्रशासन कार्यालयले जनाएको छ। त्यस्तै शंकास्पद ४२ जना (३५ पुरुष र ७ महिला) लाई क्वारेन्टाइनमा राखिएको छ ।
जिल्लाभरि २१ हजार ८ सय १३ जनाको स्वाब संकलन गरिएकोमा ८८ जनाको रिपोर्ट आउन बाँकी रहेको उल्लेख गरिएको छ।
१५ सय ७ ले जिते कोरोना
पर्सा जिल्लाभरि १५ सय ७ जना कोरोना जितेर घर फर्किएका छन्। सोमबारमात्रै विभिन्न उमेर समूहका ४३ जना संक्रमित निको भएको जिल्ला प्रशासन कार्यालयले जनाएको छ। पछिल्लो समय संक्रमितहरु निको हुने क्रम बढ्दै गएको उल्लेख गरिएको छ।
कोभिडसँग जुध्न जिल्ला प्रसासन कार्यालयले केन्द्र, प्रदेश तथा स्थानीय सरकारलगायत सबै सरोकारवालासँग सहकार्य गरेर अगाडि बढेको प्रजिअ तामाङले बताए।
‘कोभिडसँग जुध्न एक्लै सम्भव छैन । जसले गर्दा हामी ३ वटैे तहका सरकार, राजनीतिक दल, नागरिक सामाज, उपभोक्ता समिति, सञ्चारकर्मी, उद्योग व्यवसायी तथा समुदायसँगको सहकार्य र समन्वयमा अगाडि बढिरहेका छौँ’ उनले भने । महामारीमा हुनसक्ने कालोबजारी, तथा अनियमिततालाई मध्यनजर गर्दै अनुगमनलाई समेत कडाइ गरिएको जिल्ला प्रशासन कार्यालय पर्साले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
