काठमाडौं- कीर्तिपुर नगरपालिकाले आफ्नो आधिकारिक फेसबुक पेज ‘हेलो कीर्तिपुर नगरपालिका’मार्फत् गत शुक्रबार एउटा सूचना सार्वजनिक गर्यो। सो सूचनामा रातो रङको अक्षरले लेखिएको छ, ‘घर भाडामा चाहियो।’
त्यसको तल कालो अक्षरले लेखिएको छ, ‘कीर्तिपुर नगरमा कोरोना संक्रमित बढिरहेको सन्दर्भमा कोरोना नियन्त्रण, रोकथाम तथा उपचारमा खट्ने स्वास्थ्यकर्मीहरूका लागि क्वारेन्टाइनको व्यवस्था गर्न १० देखि १५ वटासम्म कोठा भएको उपयुक्त घर भाडामा चाहिएकाले निम्न लिखित कागजातसहित वडा कार्यालय वा नगरपालिकामा एक हप्ताभित्र सम्पर्क राख्न अनुरोध छ।' तर त्यस्तो घर बस्तीभन्दा कम्तीमा ५० मिटर टाढा हुनुपर्ने सर्त राखिएको छ।
घरपरिवार त्यागेर कोरोना संक्रमितहरुलाई जोगाउन डटिरहेका स्वास्थ्यकर्मीहरुमाथि असामाजिक तथा अमानवीय व्यवहारका घटना बाहिरिइरहेका छन्।कतिपय स्थानीयहरू स्वास्थ्यकर्मीलाई आफ्नो टोलमा राख्न नदिने भन्दै नाराबाजी गरेका घटनासमेत बाहिरिरहेका छन्। यस्तो बेला नगरपालिकाले नै स्वास्थ्यकर्मी राख्नका लागि खोजेको क्वारेन्टाइन बस्तीभन्दा कम्तीमा पनि ५० मिटर टाढा हुनुपर्ने सर्त राखेपछि यो सूचना झट्ट हेर्दा नगरपालिकाले नै स्वास्थ्यकर्मीहरुमाथि राम्रो नजर नराखेको हो कि भन्ने लाग्न सक्छ। तर यसको वास्तविकता भने फरक छ।
दिनभर कोरोना रोकथाम तथा नियन्त्रणमा खटिएर थकित अवस्थामा फर्कने स्वास्थ्यकर्मीहरूका लागि 'शान्त तथा फराकिलो ठाउँ होस्' भनेर नगरपालिकाले त्यस्तो घर भाडामा लिन खोजेको नगरपालिककी उपमेयर सरस्वती खड्काले बताइन्।
‘कतिपय स्थानीयले नबुझ्दा फ्रन्टलाइनमा खटिने स्वास्थ्यकर्मीप्रति अमानवीय व्यवहार गरिएका घटना बढेका छन्। यस्तो घटना हुन नदिन समुदाय सचेत गराउन आवश्यक छ। नगरवासीहरुलाई हामी सचेत गराइरहेका छौँ,’ उनले भनिन्, ‘उहाँहरू दिनभर थकित भएर फर्कने हुँदा फ्रेस भएर बस्ने ठाउँ होस् भनेर बाक्लो बस्तीभन्दा थोरै टाढा क्वारेन्टाइन व्यवस्थापन गर्न खोजेका थियौँ। तर त्यस्तो कतै भेटिएको छैन।’
स्वास्थ्यकर्मीका लागि नगरपालिका कार्यालयमा नै क्वारेन्टाइन
नगरपालिकाले स्वास्थ्यकर्मीहरूलाई नगरपालिकाको कार्यालयमै क्वारेन्टाइन तयार गरी राखेको छ। स्वास्थ्यकर्मीहरूलाई नगरपालिकाकै भवनमा सुरक्षित तरिकाले राखिएको नगरपालिकाका स्वास्थ्य संयोजक सन्तमान मानन्धरले बताए।
‘स्वास्थ्यकर्मी जनप्रतिनिधि, तथा माथिल्लो निकायमा नै सहकार्य गरेर हामी कोरोना रोकथाम तथा नियन्त्रणमा खटिएका छौँ। नगरपालिकाले स्वास्थ्यकर्मीहरूलाई काममा प्रोत्साहन गर्नुका साथै सुरक्षित भएर काम गर्ने व्यवस्था मिलाइदिएको छ,’ स्वास्थ्य संयोजक महर्जनले भने।
कोरोना रोकथामका लागि के गर्दैछ नगरपालिका?
नगरपालिकाले कन्ट्याक्ट ट्रेसिङ तथा पिसिआर परीक्षणको दायरा फराकिलो बनाएको बताएको छ। शुक्रबारसम्म ७४६ जनाको कन्ट्याक्ट ट्रेसिङमार्फत् पिसिआर परीक्षण गराएको नगरपालिकाले जनाएको छ।
संक्रमितको संख्या थपिँदै गएपछि क्वारेन्टाइनलाई नगरपालिकाले आइसोलेसनमा परिणत गर्न थालेको छ। कीर्तिपुरस्थित जनस्वास्थ्य केन्द्रीय कार्यालयमा रहेको २ सय २० बेडको क्वारेन्टाइनलाई आइसोलेसनमा परिणत गरिएको नगरपालिकाकी उपमेयर सरस्वती खड्काले जानकारी दिइन्।
त्यसैगरी, त्रिभुवन विश्वविद्यालयको रिसर्च सेन्टरमा २ सय बेडको आइसोलेसन सेन्टर तयार गरिएको नगरपालिको जनाएको छ। त्यहाँ भेन्टिलेटरसहितका २० बेडसमेत राखिएको उपमेयर खड्काले जानकारी दिइन्।
‘नगरपालिकामा आइसोलेसनको अभाव हुन नदिन हामीले कीर्तिपुर अस्पतालमा २० बेडको भेन्टिलेटरसहितको आइसोलेसन बनाउने तयारी गरेका छौँ। त्यस्तै ३० देखि ४० बेडको आइसोलेसन सेन्टर पनि आवश्यक पर्यो भने बनाउने भनेर हामी तयारी अवस्थामा छौँ,’ उपमेयर खड्काले भनिन्।
नगरपालिकाले सुरक्षित भएर होम आइसोलेसनमा बस्न चाहनेहरुको निगरानीमा समेत स्वास्थ्यकर्मी खटाएको जनाएको छ। केही संक्रमित होम आइसोलेसनमा रहेका छन्। धेरैजसो अस्पताल तथा नगरपालिकाले तयार गरेको आइसोलेसनमा रहेको बताइएको छ।
के छ संक्रमणको अवस्था?
शुक्रबारसम्म कीर्तिपुर नगरपालिकामा ४० जनामा कोरोना पोजिटिभ देखिएको छ। २७२ जनाको रिपोर्ट प्राप्त हुन बाँकी रहेको नगरपालिकाले जनाएको छ। कोरोनाका कारण दुई जनाको ज्यान गएको नगरपालिकाका स्वास्थ्य संयोजक सन्तमान मानन्धरले बताए।
नगरपालिकाको वडा नम्बर २, ४ र ६ मा कोरोना संक्रमितको संख्या बढी देखिएको छ। अन्य वडामा एकादुईमा कोरोना देखिएको छ। सुरुमा प्रभावित जिल्लाबाट आएका व्यक्तिहरुमा देखिएको कोरोना हाल समुदायमा फैलिसकेको छ।
‘सुरुमा प्रभावित जिल्लाबाट आएका व्यक्ति, सुरक्षाकर्मी, तथा स्वास्थ्यकर्मीमा देखिएको कोरोना हाल समुदायमा पुगिसकेको छ। अहिलेसम्म चाहिँ थोरै संख्यामा मात्र यहाँका स्थानीयमा कोरोना भेटिएको छैन,’ उपमेयर सरस्वती खड्काले भनिन्।
समुदायमा कोरोनाको भयावह रुपमा फैलन नदिन जनप्रतिनिधि, स्वास्थ्यकर्मी, सुरक्षाकर्मी तथा केन्द्र सरकारसँग पनि समन्वय गरेर नगरपालिकाले सक्दो पहल गरिरहेको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
