काठमाडौं–शनिबार मध्यपुर थिमि नगरपालिकाको आकस्मिक बैठक बस्यो। बैठकले १५ दिनका लागि नगरभित्र अत्यावश्यकबाहेक सेवा बन्द गर्ने निर्णय गरैसँगै सूचनासमेत सार्वजनिक गरिसकेको छ।
समुदायमा नै कोरोना फैलिसकेकाले लकडाउन गर्नुको विकल्प नरहेको महानगरकी उपमेयर अञ्जनादेवी मधिकर्मीले बताइन्।
‘पहिले बाहिरबाट आएका मानिसमा मात्रै कोरोना थियो भने अहिले ट्राभल हिस्ट्री नै नभएका नगरवासीमा देखिन थालेको छ। जसले गर्दा हामी लकडाउन गर्न बाध्य भएका छौं,’ उपमेयर मधिकर्मीले नेपाल लाइभसँग भनिन्।
नगरपलिकाभित्र ४३ जनामा कोरोना
मध्यपुर थिमि नगरपालिकाभित्र आइतबार साँझसम्म ४३ जनामा कोरोना पुष्टि भएको नगरपालिका कार्यालयले जनाएको छ।
कोरोना पुष्टि भएकाहरु अधिकांश व्यापारी, स्वास्थ्यकर्मी, बैंकमा कार्यरत कर्मचारी तथा स्थानीयवासी रहेको नगरपालिकाका प्रमुख प्रशासकीय अधिकृत उद्धवप्रसाद रिजालले बताए।
अत्यावश्यक सेवाहरु बिहान ११ बजेदेखि दिउँसो १ बजेसम्म खुल्ला
नगरभित्र अत्यावश्यक व्यवसायहरु पनि बिहान ११ बजेदेखि दिउँसो १ बजे मात्रै खुल्ला गर्न पाउने व्यवस्था गरिएको छ। अस्पताल तथा मेडिकल बाहेक अन्य खाद्यान्न, तरकारी, फलफूल, दुग्धजन्य पदार्थ, खानेपानी ग्याँसलगायत सामग्रीका पसल सो समयमा मात्रै खुल्ला गर्न पाइने व्यवस्था गरिएको छ। अनावश्यक भिडभाड नगर्न तथा अत्यावश्यक कामबाहेक घर बाहिर ननिस्कन नगरपालिकाले सुझाएको छ।
यातायातसमेत बन्द
राजमार्गबाहेक भित्री सडकमा कुनै पनि सवारी साधन सञ्चालन गर्न पाइँदैन। राजमार्गमा चलेका सवारीले पनि थिमि नगरपालिका परिसरभित्र यात्रु चढाउन र ओराल्न नपाइने नगरपालिकाले जनाएको छ।
मध्यपुर थिमी नगरपालिका क्षेत्रको गुगल म्यापमा लिइएको स्क्रिनसट।
यो निर्णयबाट जनतालाई असुविधा हुने भए पनि कोरोना संक्रमणको अवस्था अति नै जटिल बन्दै गएकाले कठोर भएर यस्तो निर्णय गर्न बाध्य भएको उपमेयर अञ्जनादेवी मधिकर्मीले नेपाल लाइभसँग भनिन् ।
कोरोनाका लागि छुट्याइएको अस्पताल भरिभराउ
कोरोना संक्रमित बढेसँगै अस्पताल भरिभराउ छ। मध्यपुर थिमि नगरपालिकाले आफ्नै स्रोतबाट सञ्चालनमा ल्याएको ६ वटा आइसोलेसन बेड क्षमता भएको नेपाल–कोरिया मैत्री अस्पताल पनि भरिएको नगरपालिकाले जनाएको छ। त्यसमाथि कोरोना मैत्री अस्पतालमा पनि अहिले सुरक्षाकर्मी र नर्स गरी ४ जना कर्मचारीलाई कोरोना देखिएको बताइएको छ। जसले गर्दा यो अस्पतालमा पनि अत्यावश्यक बाहेकका सेवा तत्कालका लागि बन्द गरिएको उपमेयर अञ्जनादेवी मधिकर्मीले बताइन्।
अन्य अस्पतालका बेडसमेत भरिएपछि होम आइसोलेसनमै कोरोनाका बिरामी
भक्तपुर अस्पताल, टेकु लगायत अस्पतालमा पनि बेड भरिन थालेपछि बिरामीलाई होम आइसोलेसनमा राखिन थालिएको छ।
‘उहाँहरुलाई घरमै बसेर तातो पानी र सिटामोल खान सुझाएका छौँ । त्यसो गर्दा स्वास्थ्यमा असहज भयो भनेमात्रै अस्पताल पुर्याउँछौं, बिरामीको अवस्था बुझ्न वडाबाट हामीले स्वास्थ्य टोली खटाएका छौँ,’ उपमेयर अञ्जनादेवी मधिकर्मीले भनिन्।
कुनै स्थानमा कोरोना संक्रमित भेटिए संक्रमितको सम्पर्कमा आएकाहरुको कन्ट्याक ट्रेसिङको जिम्मा वडाको स्वास्थ्य शाखालाई दिइएको नगरपालिकाले जनाएको छ। शाखाले संक्रमित र संक्रमितको सम्पर्कमा आएका व्यक्तिहरु खोजी गर्ने गरेको छ । यसमा नगरपालिकाले सहजीकरण गरिरहेको जनाएको छ।
संक्रमितको चाप बढ्दै गएकाले त्यसको व्यवस्थापनका लागि छुट्टै क्वारेन्टाइन तथा आइसोलेसनको व्यवस्था गर्ने सम्बन्धमा समेत छलफल भइरहेको नगरपालिकाले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
