काठमाडौं- रामेछापका रोजन श्रेष्ठ मोबाइल किन्न साेमबार बिहान ११ बजेतिर न्यूरोड पुगे। आफूले खोजेको मोबाइल किन्न उनले न्यूरोडका केही पसल चहारे। तर खोजेको जस्तो कतै पाएनन्। ‘रियल मी-६' मोडलको मोबाइल किन्न खोजेको। ४/५ वटा पसल चहारी सकेँ। खोजेको मोडलको मोबाइल नै पाएको छैन,’ रोजनले भने।
कीर्तिपुरबाट मोबाइल किन्न न्युरोड पुगेकी प्रशन्ना थापा 'सामसुङ एम-२१' मोडलको मोबाइल खोजिरहेकी थिइन्। आधा घण्टासम्म मोबाइल खोज्दै हिंड्दा पनि उनले खोजेको मोबाइल भेटिनन्। ‘पुरानो मोबाइल रहर पुग्यो। नयाँ बोकौँ भनेको। खोजेजस्तो भेटेकै छैन,’ थापाले नेपाल लाइभसँग गुनासो गरिन्।
४ महिना ठप्प भएर खुलेका मोबाइल पसलमा पछिल्लो समय उपभोक्ताहरु बाक्लिएका छन्। तर उनीहरुले खोजेजस्तो मोबाइल बजारमा पाउन मुस्किल पर्न थालेको छ। न्युरोडका मोबाइल व्यापारी प्रदीप बानियाँ लकडाउनपछि मोबाइल उपभोक्ताहरु बढेको बताउँछन्।
सामान्य अवस्थामा दैनिक जसो उनको सोरुमबाट १० देखि १५ वटासम्म मोबाइल बिक्री हुन्थ्यो भने अहिले दैनिक २५ देखि ३० वटासम्म मोबाइल बिक्री भइरहेको छ। ‘पछिल्लो समय विद्यार्थीहरुलाई अनलाइन कक्षाका लागि मोबाइल नभई नहुने भयो। त्यसले गर्दा मोबाइलको व्यापार पनि बढ्यो। तर, खोजेको सबै सामान छैन,’ उनले सुनाए।
उनको मोबाइल सोरुममा एमआई ब्रान्डको मोबाइल खोज्न धेरै ग्राहक आउँछन्, तर त्यो ब्रान्डको कुनै मोडलको मोबाइल पनि उनको सोरुममा छैन। ‘एमआई ब्रान्डको मोबाइल खोज्न आउने सबैलाई फर्काउनु परेको छ। नयाँ मोडलको मोबाइल छैन। पहिले ल्याएर राखेको मोबाइलहरु बेच्दैछु,’ व्यापारी बानियाँले नेपाल लाइभसँग भने। अन्य ब्रान्डका पनि उपभोक्ताहरुले खोजेजस्तो मोडलको मोबाइल आफ्नो सोरुममा नभएको उनले बताए।
न्यूरोडकै अर्की व्यापारी आशा धिमाल पनि सामान्य अवस्थाभन्दा अहिले मोबाइल फोनको व्यापार बढेको बताउँछिन्। ‘अरु बेला महिनामा ६० वटा मोबाइल बिक्री हुन्थ्यो। अहिले लकडाउनपछि १४० वटा मोबाइल बिक्री भइसक्यो,’ उनले भनिन्। तर, आफूसँग उपभोक्ताको मागअनुसारको सामान नभएको उनी बताउँछिन्। ‘मेरो सोरुममा रियलमी कम्पनीका मोबाइलहरु मात्रै छन्। तर त्यसमा पनि उपभोक्ताले खोज्ने जति सबै मोडलका मोबाइल छैनन्,’ धिमालले भनिन्।
न्यूरोडका अधिकांश व्यापारीहरुले बजार खुलेसँगै उपभोक्ता बढेको तर बजारमा सामानको अभाव भएको बताएका छन्। अन्तर्राष्ट्रिय उडान ठप्प भएसँगै बजारमा मागअनुसार मोबाइलको आयात हुन नसकेको व्यापारीहरुको भनाई छ। ‘अर्डर गरेको सामान पनि पहिले एक हप्तामा आउँथ्यो भने अहिले एक महिनामा पनि आउँदैन। पुरानो स्टक रहेको सामान बेचेर बस्नुपरेको छ,’ व्यवसायी गोनित शाक्य भन्छन्।
किन बढ्यो मोबाइलको व्यापार?
मोबाइल पछिल्लो समय मानिसहरुका लागि अत्यावश्यक भइसकेको छ। लकडाउनका कारण विद्यालयहरु सञ्चालनमा नआउँदा अनलाइन कक्षाका लागि पनि मोबाइलको प्रयोग हुने गरेकाे छ। यसले पनि मोबाइलका उपभोक्ता बढेको पाइएको छ। त्यस्तै छलफल, वेबिनारसमेत अनलाइनबाटै हुन थालेपछि मोबाइल उपभोक्ता बढेका हुन्। सामान्य अवस्थामा मोबाइल किन्न सीमा पारी पुग्नेहरुलाई पनि अहिले सीमा पारी पुग्न असहज हुँदा मोबाइलको व्यापार बढेको व्यापारीहरु बताउँछन्।
पछिल्ला वर्ष मोबाइलको आयात बढ्दै गइरहेको छ। आर्थिक वर्ष २०७६/७७ मा मा ४३ लाख ६५ हजार ९ सय ९० थान मोबाइल सेट आयात भएको विवरण भन्सार विभागले सार्वजनिक गरेको छ। यसबाट सरकारलाई २ अर्ब ८७ करोड राजश्व आम्दानी भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
