फाइल तस्बिर
काठमाडौं- नेकपाभित्रको विवाद केन्द्रीय कमिटीसम्म पुग्ने भएको छ। सचिवालय र स्थायी कमिटीबाट विवाद समाधान नहुने देखिएपछि केन्द्रीय कमिटीमा पुग्ने भएकाे हाे। पार्टीमा विवादले उत्कर्ष रुप लिएपछि केन्द्रीय कमिटी बेठककाे माग गरिएकाे छ।
गत बैशाखमा पार्टी अध्यक्ष एवं प्रधानमन्त्री केपी ओलीलाई दुवै पदबाट राजीनामा मागिएपछि नेकपामा विवाद सुरु भएको हो। सचिवालय बैठकमा अर्का अध्यक्ष पुष्पकमल दाहाल ‘प्रचण्ड’ र वरिष्ठ नेता माधवकुमार नेपाल, झलनाथ खनाललगायत बहुमत सचिवालय सदस्यले राजीनामा मागेका थिए।
पार्टी विभाजनसम्मको अवस्थामा पुगेपछि विवाद साम्य भएको भन्दै नेकपा सचिवालय बैठकबाट एक भएको नेताहरुले सार्वजनिक गरेका थिए। असार १० गतेदेखि सुरु भएको स्थायी कमिटी बैठकमा अध्यक्ष प्रचण्डसहित सचिवालयका ६ जना सदस्यलगायत ३० जनाभन्दा बढी स्थायी कमिटी सदस्यहरुले प्रधानमन्त्री ओलीको राजीनामा मागेपछि विवाद उत्कर्षमा पुगेको हो। प्रधानमन्त्री ओली दुवै पद छाेड्न तयार नभएपछि नेकपामा चर्किएकाे विवादले स्थायी कमिटी बैठक पटक पटक सरेकाे छ।
बैठक लगातार सरिरहँदा नेताहरुमा असन्तुष्टि पनि बढ्न थालेकाे छ। पार्टीमा देखिएकाे विवादकाे समाधान बहुमतका आधारमा स्थायी कमिटी र केन्द्रीय कमिटीले निर्णय गर्नुपर्ने नेताहरुकाे माग छ। ‘पार्टीमा चलेको विवाद सत्ताको लेनदेन मात्रै हो भन्ने गरी पट्कै नबुझौ। पार्टीलाई विधि विधान र सैद्धान्तिक कसरी बनाउने भन्ने विषयमा लडाइँ हो, संघर्ष हो,’ नेकपा स्थायी कमिटी सदस्य युवराज ज्ञवालीले नेपाल लाइभसँग भने, ‘अहिले पार्टीमा देखिएमा समस्या सहमतिमा भयो भने ठीकै छ। यदी सहमति भएन भने अल्पमत बहुमतका आधारमा स्थायी कमिटी र केन्द्रीय कमिटीले निर्णय गर्छ।’
पार्टीभित्र देखिएको विवाद स्थायी कमिटी बैठकले निर्णय गर्न नसके केन्द्रीय कमिटीमा पुग्ने ज्ञवालीले बताए। बिहीबार अध्यक्ष प्रचण्डसहित वरिष्ठ नेता झलनाथ खनाल, माधवकुमार नेपाललगायत बहुमत सचिवालय सदस्यहरुको खुमलटार भएकाे भेलाले एक महिनाभित्रै केन्द्रीय कमिटी बैठक बस्ने निर्णय गरेकाे थियाे।
स्थायी कमिटी बैठक जारी भएकै बेला केन्द्रीय कमिटी बैठक बोलाउने निर्णय भएकाले विवाद केन्द्रीय कमिटी बैठकमा सर्ने पक्का भएको हो। पार्टीभित्रको विवाद शीर्ष नेताहरुले व्यवस्थापन गर्न नसक्दा पार्टी भित्रकाे असन्तुष्ट छताछुल्ल भएकाे छ।
विवादका कारण सातौं पटक बैठक सर्यो
नेकपा स्थायी कमिटी बैठक पटक पटक सरेपछि स्थायी कमिटी सदस्य सुरेन्द्र पाण्डेले असन्तुष्टि व्यक्त गरेका छन्। उनले बैठक सरेको सर्यै गर्दा लाजैमर्दो भएको बताए।
कति बैठक सारेको? भन्दै प्रश्न गर्दै उनले शुक्रबार ट्विटमा लखेका छन्, ‘नेकपा स्थायी कमिटी बैठक ११ बजेबाट ३ बजेलाई सरेछ। अब कति सर्ने हो? लाजैमर्दो भो अब त।’
पार्टी विभाजनसम्मको अवस्थामा पुगेपछि स्थायी कमिटी बैठक पटक पटक सर्दै आएको हो। गत असार १८ गते एक दिनका लागि भन्दै २० गते बैठक बोलाइएको थियो। असार २० गते बैठक बस्न नसेपछि असार २२ गतेका लागि सारिएकाे थियाे।
असार २२ गते बैठक बस्न नसकेपछि २४ गतेका लागि बोलाइयाे। फेरि असार २४ गते पनि बैठक बस्न नसकेपछि असार २६ गतेका लागि तय भएकाे थियाे। असार २६ गते बाढी पहिरो आएको भन्दै साउन २ गते बिहान ११ बजे बैठक बोलाइयो। शुक्रबार बिहान ११ बजे बैठक बस्न नसकेपछि दिउँसो ३ बजेका लागि बैठक सारियाे। ३ बजे पनि बैठक बस्न नसकेपछि आइतबारसम्मका लागि स्थगित भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
