काठमाडौं–भारतबाहेक तेस्रो मुलुकमा समस्यामा परेका १० हजार ४ सय १६ नेपाली स्वदेश फर्काइएको छ। कोरोनाका कारण समस्यामा परेका उनीहरुलाई जेठ २२ देखि असार १२ गतेसम्ममा विभिन्न २० मुलुकबाट स्वदेश फर्काइएको हो ।
कुन देशबाट कति फर्काइए ?
लकडाउनका कारण विदेशमा ३ महिनादेखि अड्किएका नेपालीहरुलाई चार्टर जहाजमार्फत् स्वदेश फर्काइएको हो। रोजगारी गुमाएका, भिसा अवधि सकिएका, गर्भवती, कोरोना बाहेकका अन्य बिरामी, व्यवसायीक कामका लागि गएर अलपत्र परेका, पर्यटक भिसामा गएर रोकिएका लगायतलाई प्राथमिकताका आधारमा स्वदेश फर्काइएको हाे।
हालसम्म सबैभन्दा बढी कुवेतबाट १३ वटा उडानमार्फत् २००२ नेपाली स्वदेश फर्किएका छन्। त्यसपछि युएईबाट ११ वटा उडानमार्फत् १,८७१, मलेसियाबाट ७ वटा उडानमार्फत् ९२३, बगंलादेशबाट ४ वटा उडानमार्फत् ८१५, साउदीबाट ५ वटा उडानमार्फत् ८१० र कतारबाट ५ उडानमार्फत ६३८ नेपाली स्वदेश फर्किएका छन् ।
यस्तै, माल्दिभ्सबाट ४ वटा उडानमार्फत् ६०४, जापानबाट ४ वटा उडानमार्फत् ४९२, बहराइनबाट ३ उडानमार्फत् ४२३, थाइल्याण्डबाट २ उडानमार्फत् ३२६, ओमानबाट दुई उडानमार्फत् ३१३, अमेरिकाबाट २८२, अस्ट्रेलियाबाट २ वटा उडानमार्फत् २६९, दक्षिण कोरियाबाट २२८, सिंगापुरबाट १४६, बेलायतबाट १४६, पाकिस्तानबाट ७२, म्यानमारबाट २६, , अफगानिस्तानबाट १८, हङकङबाट ७ र श्रीलंकाबाट ५ जना गरी १० हजार ४१६ नेपाली स्वदेश फर्किएका हुन् ।
अस्पतालमा २१ जना
विदेशबाट फर्काइएकामध्ये २१ जना अस्पताल भर्ना भएका छन्। तीमध्ये कतिपयमा कोरोनाको आशंका गरिएको छ । केहीमा कोरोना पुष्टि भइसकेको छ भने कोरोनाबाहेक विभिन्न जटिल अबस्थाका बिरामीसमेत स्वदेश फर्किएर अस्पताल भर्ना भएका छन्।
अस्पताल भर्ना हुनेहरुमा कुवेत र युएईबाट फर्किएका ५/५ जना, जापान र साउदीबाट फर्किएका ४/४ जना मलेसिया, कतार र अमेरिकाबाट फर्किएका १/१ जना छन् ।
शुक्रबारसम्म स्वदेश फर्काइएका १० हजार ४ सय १६ मध्ये पैसा तिरेर होटलमा बस्नेलाई होटल क्वारेन्टाइनमा राखिएको छ । होटलमा बस्न नसक्ने अवस्थाका नागरिकहरुलाई प्रदेशस्तरीय क्वारेन्टाइनमा पठाइएको छ ।
सम्बन्धित गन्तव्य मुलुकबाट पिसिआर परीक्षणको नेगेटिभ रिपोर्ट लिएर फर्किएकाहरुलाई सिधै होम क्वारेन्टाइनमा पठाइएको छ ।
सरकारले कोरोनाका कारण समस्यामा परेका विभिन्न ३० मुलुकबाट तत्काल २४ हजार नेपाली स्वदेश फर्काउन सूची तयार पारेको छ ।
साे सूचीमा रोजगारी गुमाएका, खान बस्न समस्या परेका, बिरामी, गर्भवती, भिजिट भिसामा गएर अलपत्र परेका, जेष्ठ नागरिक, बालबालिका, आफन्तको मृत्यु भई काजकिरियाका लागि स्वदेश फर्कनुपर्ने अवस्थाका व्यक्तिहरुलाई प्राथमिकताका आधारमा स्वदेश फर्काइएको हो ।
तर हालसम्म स्वदेश फर्कनेहरुमा अधिकांश रोजगारदाताले हवाई शुल्क बेहोरिदिएका तथा खर्च आफैँ बेहोर्न सक्नेमात्र छन् । प्रायःजसो खाडी मुलुकमा बेखर्ची भएर अलपत्र परेका नेपालीहरु स्वदेश फर्कन सकेका छैनन् ।
सर्वोच्च अदालतले श्रम स्वीकृति लिएर विदेश गएका श्रमिकहरु समस्यामा परी आफ्नै खर्चमा स्वदेश फर्कन नसक्ने अवस्था सिर्जना भएमा त्यस्ता व्यक्तिहरुलाई वैदेशिक रोजगार कल्याणकारी कोषको रकम प्रयोग गरी स्वदेश फर्काउन आदेश दिएको छ। सो आदेशको कार्यान्वयनका लागि श्रम मन्त्रालयले कार्यविधि तयार गरिरहेको जनाएको छ ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।