फोटो: सूर्य थापाको ट्विटर
काठमाडौं- सत्तारुढ दल नेपाल कम्युनिस्ट पार्टी (नेकपा) को पाँचौं स्थायी कमिटी बैठक सुरु भएको छ। बिहान ११ बजेका लागि बोलाइएको बैठक प्रधानमन्त्री निवास बालुवाटारमा केही बेरअघि सुरु भएको हो।
बैठक सुरु हुनुअघि सार्वजनिक एजेन्डामा सरकारका काममा कोभिड १९ को नियन्त्रण, उपचार र रोकथाम सीमाका समस्या र समाधानका विषयमा छलफल हुनेछ।
सरकारको कामको समीक्षा पछि पार्टी एकताका बाँकी कामका विषयमा छलफल हुनेछ। उक्त छलफलपछि मात्रै नेकपाभित्र निकै विवादित विषय एमसिसीले प्रवेश पाउनेछ।
स्थायी कमिटी बैठकको सुरुवातमा अध्यक्षद्वय केपी शर्मा ओली र पुष्पकमल दाहाल प्रचण्डले मन्तव्य राख्नेछन्।
पार्टीमा उठिरहेका अन्य विविध विषयमा पनि कमिटीमा छलफल हुने बताइएको छ।
मुख्यगरी नेकपामा एमसिसीको विषय पेचिलो बनिरहेको छ। एक वर्षदेखि यही विषयमा पार्टीभित्र औपचारिक/अनौपचारिक बहस भइरहेका छन्, तर निष्कर्ष निस्किएको छैन। एमसिसीसँगको सम्झौता संसदबाट पारित गर्नुपर्ने अध्यक्ष केपी शर्मा ओली र उनी पक्षका नेताहरुको भनाई छ। अर्का अध्यक्ष पुष्पकमल दाहाल ‘प्रचण्ड’ तथा माधव नेपाल पक्षका नेताहरुले संशोधन नगरी एमसिसी सम्झौता लागू गर्न नहुने बताइरहेका छन्।
जारी बैठकमा पनि अन्य विषयका अतिरिक्त एमसिसीकै विषय छलफलको मुख्य एजेन्डा बन्ने स्थायी समिति सदस्यहरुको भनाई छ।
एमसिसीका सन्दर्भमा नेकपाले कस्तो धारणा बनाउला भन्ने आम चासोको विषय बनेको छ। यही बैठकले नै नेपालमा एमसिसी अन्तर्गतको कार्यक्रम लागू हुने वा नहुने भन्ने निर्क्यौल गर्ने सम्भावना छ।
.jpg)
एमसिसीको विषय यसअघि पनि सचिवालय, स्थायी कमिटी तथा केन्द्रीय कमिटीमा छलफल भइसकेको छ। गत माघ १५ देखि १९ सम्म चलेको केन्द्रीय कमिटी बैठकले एमसिसीबारे अध्ययन गर्न झलनाथ खनाल, प्रदीप ज्ञवाली र भीम रावल सदस्य रहेको कार्यदल गठन गरेको थियो। सो कार्यदलले संशोधन गरेर मात्रै एमसिसी सम्झौता कार्यान्वयन गर्नुपर्ने सुझाब दिएको थियो। ज्ञवालीले भने फरक मत राखेका थिए।
गत वैशाखमा सरकारले दल फुटाउन सहज हुनेगरी ल्याएको अध्यादेश विवादित बनेपछि स्थायी कमिटी बैठकको माग उठ्दै आएको थियो। वैशाख १० मा २० स्थायी कमिटी सदस्यले लिखित रुपमै बैठकको माग गरेका थिए। सचिवालय बैठकमा पनि स्थायी कमिटीको माग भएपछि वैशाख २५ गतेका लागि बैठक बोलाइएको थियो। तर, प्रतिवेदन लेखनको जिम्मेवारी पाएका अध्यक्ष प्रचण्ड र महासचिव विष्णु पौडेलले प्रतिवेदन लेख्न नसकेपछि २४ गते बैठक स्थगित भएको थियो।
.jpg)
आफ्नो आलोचना बढ्दै गएको र राजीनामाको समेत माग उठिरहेको त्यस बेला अध्यक्ष ओलीले बैठक राख्न चाहेका थिएनन्।
त्यतिबेला वैठकको माग गरिहरेका नेताहरुले एक व्यक्ति एक पद, अध्यादेश, कोरोना संक्रमण रोकथामका लागि सरकारको प्रयास लगायतका विषय उठाएका थिए।
वैशाख ३१ गतेका लागि बोलाइएको बैठक पनि अन्तिम समयमा स्थगित भएको थियो।
स्थायी कमिटीको चौथो बैठक गत मंसिर-पुसमा बसेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
