फाइल तस्बिर
काठमाडौं- सत्तारुढ दल नेपाल कम्युनिस्ट पार्टी स्थायी कमिटी बैठमा पेस गरिने एजेन्डा तय गर्न नेकपाका अध्यक्षद्वय केपी शर्मा ओली र पुष्पकमल दाहालबीच भेटघाट भएको छ। प्रधानमन्त्री निवास बालुवाटारमा भएको छलफलमा करिब डेढ घन्टा दुई अध्यक्षबीच छलफल भएको प्रधानमन्त्री निवास बालुवाटार स्रोतले जानकारी दिएको छ।
स्थायी कमिटी बैठक यही असार १० गते पार्टी कार्यालय धुम्बाराहीमा बस्ने तय भएको छ। यसअघि पनि पटकपटक स्थगित हुँदै आएको बैठकमा पेस गर्ने एजेन्डाबारे पनि एकमत भएको छैन।
यसअघि सबै स्थायी कमिटी सदस्यको कोरोनाको पिसिआर परीक्षण नगरिएको भन्दै प्रधानमन्त्रीसमेत रहेका केपी शर्मा ओलीले बैठक स्थगित गरेका थिए।
बैठकमा मिलेनियम च्यालेन्ज कर्पोरेसन (एमसिसी), कोरोना भाइरस नियन्त्रणमा सरकारले खेलेको भूमिका, सरकार ल्याएको बजेटको समीक्षा, नयाँ नक्सा जारी भएपछिको राजनीतिक तरंग लगायतका विषयमा छलफल हुने एक सचिवालय सदस्यको भनाई छ।
यस्तै बैठकको एजेन्डामा नसमेटिए पनि पार्टी विधान बमोजिम एक व्यक्ति एक पदको एजेन्डा कतिपय नेताहरुले उठाउने तयारी गरेका छन्। एमसिसी र सरकारको कामको आलोचना नै मुख्य विषय हुने कतिपय नेतहरुको बुझाइ छ।
यसअघि २० स्थायी कमिटी नेताहले २५ वैशाखमा अध्यक्ष प्रचण्डलाई भेटेर बैठकका एजेन्डाहरु बुझाएका थिए। तर, ३१ वैशाखको स्थायी कमिटी बैठक नै स्थगित भएपछि ती एजेन्डा सेलाएका थिए।
त्यतिबेला समेटिएका कतिपय एजेन्डा असार १० मा बस्ने बैठकमा उठ्न सक्ने आकलन गरिएको छ। त्यतिबेला तयार एजेन्डमा एमसिसी, एक व्यक्ति एक पद, दललाई फुटाउन सजिलो हुनेगरी ल्याएको अध्यायदेश, कोरोना नियन्त्रणमा सरकार असफल हुनुका साथै मन्त्रीहरु नै अनियमिततामा मुछिएको विषय थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
