काठमाडौं- शनिबार राती आएको बाढीले रसुवा जिल्लाको टिमुरेमा निर्माणाधीन १ सय ११ मेगावाट उत्पादन क्षमताको रसुवागढी जलविद्युत आयोजनामा क्षति पुर्याएको छ।
आयोजना प्रमुख छवि गैरेका अनुसार बाढीले आयोजनामा पुर्याएको क्षति आंकलन भई नसकेपनि आयोजनाको पहुँचमार्ग र निर्माण सामग्री बगाएको छ। अस्थायी रुपमा निर्माण गरिने कफरड्याममा पनि पूर्ण रुपमा क्षति भएको छ।
‘आयोजनामा बाढीले भौतिक क्षति पुर्याएपनि क्षतिको अनुमान अझै आइसकेको छैन। पुलमा क्षति नभएपनि नदि आफ्नो बहनमार्गभन्दा बाहिर गएको छ। जसका कारण आयोजनाको पहुँच मार्ग बन्द भएको छ। कफर ड्याम पूर्ण रुपमा बगाएको छ भने अरु अस्थायी संरचना पनि बगाएको छ। हेडवर्क्समा प्रयोग हुने डण्डी, सिमेन्ट, फर्मा, पानी तान्ने पम्प मेसिनलगायत सामग्री पनि बगाएको छ।’ आयोजना प्रमुख गैरेले भने।
रसुवागढी जलविद्युत आयोजनाको क्याम्पभन्दा १ सय मिटरमाथिबाट बाढी मोडिएपछि सुख्खा बन्दरगाह क्षेत्रमा बढी असर पारेको छ। आयोजनाका लागि बनायएको पहुँच मार्गमा प्रयोग भएको बेलिब्रिजमुनिबाट जानुपर्ने पानी पुललाई छोडेर बायाँबाट बहन सुरु भएको आयोजना प्रमुख गैरेले जानकारी दिए।
पुललाई छलेर सुख्खा बन्दरगाहपट्टि बाढी गएपछि रसुवागढी जलविद्युत आयोजनाभन्दा बन्दरगाहमा बढी क्षति भएको छ। सो क्षेत्रमा भारी वर्षाका कारण लेन्दे खोला उर्लिएपछि सशस्त्र प्रहरीले राती नै बन्दरगाहका क्याम्प तथा त्यहाँ रहेका मानिसहरुलाई अन्यत्र राखेको थियो।
गत वर्षपनि रसुवागढी आयोजनामा बाढी पहिरोले क्षति पुर्याएपछि आयोजनाको काम लम्बिएको थियो। यसवर्ष फेरि बाढी आएपछि आयोजनाको काम लक्षित समयभित्र सम्पन्न भइसक्नेमा चुनौती थपिएको गैरेले बताए। ‘बाढीका कारण समयमा काम नसकिने अवस्था देखिएको छ। गतवर्ष साउन अन्तिम सातामा बाढी आएका कारण तत्काल काम शुरु भएको थियो। तर यसवर्ष वर्षातको सुरुमै बाढी आयो। त्यसकारण यो वर्षा अवधिभर आयोजनाको काममा निरन्तरता दिन चुनौती देखियो’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
