काठमाडौं- प्रधानमन्त्री केपी शर्मा ओलीले कोरोना नियन्त्रणका लागि भएको खर्चको हिसाब माग्दै सडकमा प्रदर्शन गर्नेहरूलाई संसदबाट जवाफ दिएका छन्।
राष्ट्रिय सभाको बिहीबारको बैठकमा प्रधानमन्त्री ओलीले भने, ‘१० अर्ब‚ १० अर्ब भन्ने हल्ला चल्यो, उक्त रकम केही निकायमा पठाइयो। त्यसको मसिनो गरी हिसाब आलेप, मलेप हुन्छन्। ती कुराका प्रतिवेदन संसदमा आउँछन्।’
रुजु, बेरुजु अनियमितता यी सबै कुरा आउने भन्दै उनले अनियमितता हुन नदिने प्रतिबद्धता व्यक्त गरे। ‘हरेक व्यक्तिलाई देशभर भएका खर्च चाहिएको छ? यहाँ मान्छे काममा लागेका छन्, यहाँ कसैलाई खर्चको हिसाब चाहिएको छ’ प्रधानमन्त्री ओलीले भने‚ ‘काममा ध्यान छैन, कामप्रतिको प्रशंसा छैन। हिसाबकिताब चाहिएको छ, खोइ पैसा भनिएको छ।’ प्रधानमन्त्रीले सबै खर्चको विवरण संसदमा प्रस्तुत गर्ने जवाफ दिए।
‘अहिले यो रकमको मात्रै होइन १४ खर्बभन्दा बढीको बजेट प्रस्तुत गरिएको छ। त्यसको महालेखा परीक्षकको वर्षिक प्रतिवेदन मार्फत सदनमा आउँछ‚’ प्रधानमन्त्रीले भने‚ ‘त्यसमा अनियमितता गरियो भने विभिन्न निकाय छन् अनुगमन गर्ने। यस्तो ठान्न भएन कि म बाहेक सबै भ्रष्ट छन्। यस्तो ठान्न भएन कि यस देशमा भ्रष्टबाहेक कोही जन्मिँदै जन्मिन्न।’
केही व्यक्तिहरू सरकारमा रहेकाहरूलाई जसरी पनि बदनाम गर्नुपर्छ भन्नेमा लागेको प्रधानमन्त्रीले टिप्पणी गरे। आफूले भ्रष्टाचार नगर्ने र गर्न पनि नदिने उनले बताए।
स्वास्थ्य सामग्री टेन्डर गरेर ल्याउँदा ढिलो गरेको भन्ने र छिटो प्रक्रियामार्फत ल्याउँदा मिलेर भ्रष्टाचार गरेको भन्ने आरोप लाग्नु दुःखद् भएको प्रधानमन्त्रीले टिप्पणी गरे। सरकारले कोरोना नियन्त्रणमा १० अर्ब खर्च भएको भन्ने समाचार सार्वजनिक भएपछि काठमाडौंलगायतका ठूला सहरहरूमा केही युवाहरू प्रदर्शनमा उत्रिएका थिए।
उनीहरूले क्वारेन्टाइन व्यवस्थापन गर्नुपर्ने, पिसिआर परीक्षण बढाउनुपर्ने र १० अर्बको हिसाबकिताब सार्वजनिक गर्नुपर्ने माग गरेका थिए। प्रतिनिधि सभामा पनि यो विषयमा जोडतोडले उठेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
