काठमाडौं– राज्य तथा सुशासन व्यवस्था समितिका सदस्य तथा सांसद विजय सुब्बाले नेपाली नागरिक महिलासँग विवाह गरेका पुरुषलाई कुनै पनि शर्तमा नागरिकता दिन नहुने बताएका छन्। यसबाट नेपाली राष्ट्रियता खतरामा पर्ने भएकाले त्यसो गर्न नहुने उनको दाबी छ।
नेपाललाइभको समय संवादमा बोल्दै उनले नेपाली नागरिकसँग विवाह गरेर आउने महिलाले पनि नागरिकताका लागि ७ वर्ष कुनुपर्ने प्रावधान सही रहेको बताएका छन्।
संवादका केही हाइलाइट्स:
- नेपाली महिलासँग विवाह गरेर आउने विदेशी पुरुषलाई नागरिकता दिने गरी नागरिकता विधेयकको प्रतिवेदनमा एउटा बुँदा समेटिएको छ। त्यसो गरिनु भनेको घात हो। माननीय साथीहरुले कुन रुचिले ल्याउनुभयो थाहा भएन।
- ज्वाइँलाई नागरिकता दिनु नेपालको संविधानविपरीत हुन्छ।
- विदेशी पुरुषलाई नागरिकता दिनु किन घातक हुन्छ भने तीनतिर भारत छ, उत्तर चीन। भारतसँग हाम्रो रोटीबेटीको सम्बन्ध छ। धेरै भारतीय नेपालबाट विवाह गरेका छन्। नेपाली महिलासँग विवाह गरेकै आधारमा नागरिकता दिने व्यवस्था गरियो भने हालसम्म जिवित भारतीय ज्वाइँले नागरिकता लिन्छन्। नेपालमाथि भारतको दमनकारी र विस्तारवादी नीति छ, भारतले उनीहरुमार्फत् त्यो नीति झन् मजबुत बनाउँछ। नेपालको नागरिक भएर नेपालमै उथलपुथल गर्न सहज हुन्छ भारतलाई।
- भारतमा नेपाली ज्वाइँको संख्या हजार र लाखौंमा छ। उनीहरुले नेपाली नागरिकता पाए जनसंख्याका आधारमा निर्वाचन क्षेत्र बढाउने लबिङ हुन्छ। मधेशबाट धेरै माननीय जिताउने काम भारतले गर्छ । नेपालको संसद कब्जा हुन्छ । त्यसैले विदेशी ज्वाइँलाई नागरिक बनाउनु हुँदैन।
- यसैगरी तिब्बतीयन शरणार्थी हजारौं छन्। धेरै नेपाली छोरीसँग विवाह गरेका छन्। उनीहरुले पनि नागरिकता पाउँछन्। चीन विरोधी गतिविधि नेपाली नागरिकले गरेजस्तो हुन्छ।
- नेपाली पुरुषसँग विवाह गरेर आएकी विदेशी महिलाका हकमा ७ वर्ष ठीक छ। यो भारतअनुकूल छ । धेरै व्यवहार हाम्रो भारतसँग हुन्छ। भारतमा नागरिकता लिन नेपाली चेलीले ७ वर्ष पर्खिनुपर्छ।
- २०६३ नेपाली नागरिकता ऐन बन्नुको कथा छ। म पनि संसदमा थिएँ। नागरिकता दिने प्रावधान खुुकुलो बनाउन नहुनेमा हामी त्यतिबेला जमेर लागेका हौं। पार्टी–पार्टीमा असहमति भयो। भारतको जबरजस्त दबाब र मधेश आन्दोलनका कारण फितलो भयो।
- त्यो भारतीय रुचिअनुसार भएकाले अहिले पनि त्यो कायम हुनुपर्छ भनेर कांग्रेस र मधेशवादी दलका साथीहरु लागिरहनुभएको छ।
- २०६३ को नागरिकता ऐन भयंकर घातक छ, त्यसलाई यतिबेला हामीले धेरै ठाउँ संशोधन गर्नुपर्छ, गरिरहेका छौं।
- २०६३ सालमा जुन शक्तिले जसरी बोल्यो। आज पनि बोल्दैछ।
- नेपाली सांसदहरु नेपाली भएर बोल्नुपर्नेमा त्यसो भइरहेको छैन।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
