काठमाडौं– माल्दिभ्सबाट महेश अधिकारीसहित १५४ जना मंगलबार बेलुका साढे ८ बजे त्रिभुवन अन्तर्राष्ट्रिय विमानस्थल ओर्लिए।
उनीहरुमध्ये ७ जनासँग पिसिआर परीक्षणको नेगेटिभ रिपोर्ट थियो। बाँकीसँग आरडिटी वा पिसिआर परीक्षणको रिपोर्ट थिएन। फिट फर ट्राभल (ज्वरो, रुघाखोकी वा कोरोनासँग मिल्दोजुल्दो कुनै लक्षण नभएको) भन्ने रिपोर्टमात्र थियो।
विमानस्थलमा सेनाले पिसिआर रिपोर्ट नेगेटिभ भएकालाई बोलायो । ‘पिसिआर रिपोर्ट नेगेटिभ भएकाहरु सिधै होम क्वारेन्टाइनमा जान मिल्ने भन्ने कुराहरु पनि आइरहेका थिए । उनीहरुलाई के गरियो। तर हामीलाई तपाईंहरुसँग दुवै रिपोर्ट नभएकाले जान मिल्दैन, पठाउँदैनौँ भनेर आधा घण्टा विमानस्थलमै रोकियो,’ माल्दिभ्सबाट फर्किएका अधिकारी भन्छन्, ‘सरकारको व्यवस्थापन कस्तो हो अचम्म लाग्यो । नमिल्ने भए हामीलाई किन स्वदेश फर्कन अनुमति दिइयो त ?’
आधा घण्टापछि उनीहरुलाई प्रदेशस्तरीय होल्डिङ सेन्टरमा पुर्याइयो। उनी गण्डकी प्रदेशका व्यक्तिका लागि तोकिएको होल्डिङ सेन्टरमा गए।
‘खाना नखाएको धेरै समय भएको थियो । निकै भोक लागेको थियो। होल्डिङ सेन्टरमा खानाको व्यवस्था नभएपछि हामीले कुरा राख्यौं। तर १५/२० जनालाई पुग्ने खाना ल्याएर टक्रक्क राखियो। भाग पुग्ने जतिले खाए। नपुग्ने भोकै,’ उनले होल्डिङ सेन्टरको कथा सुनाए।
दूतावासले होल्डिङ सेन्टरमै आरडिटी वा पिसिआर परीक्षण हुने भनेर उनीहरुलाई बताएको थियो। तर भनेअनुसार भएन। उनीहरुको परिचय खुल्ने सबै कुरा टिपोट गरियो । सिमकार्ड निः शुल्क उपलब्ध गराइयो।
यत्तिकैमा होल्डिङ सेन्टरको काम सकियो। अब रह्यो क्वारेन्टाइनको कुरा ।
सरकारले तोकेको प्रदेशस्तरीय क्वारेन्टाइनमा जाने कि होटल क्वारेन्टाइनमा जाने? उनीहरुसँग दुृई विकल्प थिए।
छिट्टै पिसिआर परीक्षण भइहाल्छ। रिपोर्ट आउन केही दिन लागे पनि होटलमा बढीमा ५ दिन त बस्नुपर्ला, त्यसपछि त रिपोर्ट नेगेटिभ आएपछि पक्कै होम क्वारेन्टाइन जान पाइन्छ भन्ने सोचका साथ उनले होटल क्वारेन्टाइन रोजे ।
उनीजस्तै सबै साथीहरुले होटल क्वारेन्टाइन रोजे ।
केहीले सरकारले तोकेका अन्य क्वारेन्टाइनको अवस्था राम्रो भए हेरेर त्यहीँ बस्नेसमेत सोच बनाए।
हेरेर फर्कन नपाइने, गएपछि त्यहीँ बस्नुपर्ने सेनाको जबाफ आएपछि उनीहरु होटलमै बस्न तयार भए।
‘हामीले होटलको लिस्ट हेर्यौं, तर जम्मा ३ वटामात्रै होटल थिए । त्यसमा हाम्रो क्षमताअनुसारको सबैभन्दा सस्तो होटल भनेको २ वटा बेड भएको कोठाको एकदिनको शुल्क ४ हजार रहेछ,’ माल्दिभ्सबाट फर्किएका अर्का गोविन्द रेग्मी भन्छन्, ‘दुई जना साथीसँगै बस्ने गरी हामी होटल एयरपोर्ट जान तयार भयौँ ।’
‘दुई दिनभित्र हाम्रो पिसिआर परीक्षण भएन भने हामीसँग होटलमा बसेको तिर्न पैसा पुग्दैन। पिसिआर परीक्षण २ दिनमा जसरी पनि हुनुपर्छ’ सबैजसोको एउटै गुनासो थियो।
माल्दिभ्सबाट फर्किएकाहरु प्रायः ३ महिना ‘सेल्फ क्वारेन्टाइन’ मा बसेर फर्किएका थिए। कतिपयलाई सामान्य अबस्था नहुन्जेलसम्मका लागि भनेर कम्पनीले टिकट काटेर पठाएको थियो भने कतिपय रोजगारी गुमाएका अथवा भिसा अवधि सकिएका पनि थिए।
महेश भन्छन्, ‘म अलपत्रै परेर फर्किएको त होइन तर पैसा धेरै भएर होटल क्वारेन्टाइनमा बसेको पनि होइन। पिसिआर परीक्षण छिट्टै भइहाल्छ र रिपोर्ट आएपछि होम क्वारेन्टाइनमा जान पाइन्छ भनेर होटल क्वारेन्टाइन रोजेको पिसिआर परीक्षणको कुनै छाँटकाँट छैन।’
सेनाको जवाफ : पिसिआर रिपोर्ट छिट्टै चाहिए मान्छे बोलाउनूस्, १५ हजार बुझाउनूस्
‘पिसिआर परीक्षण कहिले हुन्छ’ भनेर सोध्दा सरकारको सेड्युल मिलाएर १४ दिनभित्र जहिले पनि हुन सक्छ भन्ने जवाफ उनीहरुले पाएका छन्।
‘सेनाले हामीलाई १५ हजार तिरेर आफैँ पिसिआर परीक्षण गराए छिटो हुने जवाफ पो दियो। मान्छे बोलाएपछि बसेकै ठाउँमा आउँछ रे। तुरुन्त परीक्षण हुन्छ रे,’ महेशले दुखेसो पोखे, ‘भ्रष्ट सरकारले जताततै पैसा असुल्ने सेटिङ मिलाएको रहेछ।’
उनी नयाँ बजारस्थित होटल रिभर होलिडे इनमा साथीसँग बस्छन्। सो होटलमा माल्दिभ्सबाट फर्किएका अन्य साथीहरु पनि छन् ।
कोठा एकदम फोहोर र दुर्गन्धित छ । सादा खाना र कोठाको शुल्क दिनको ३ हजार छ ।
झिँगा र साङ्ला कुद्छन् दैनिक ४ हजारको कोठामा
अबेर भइसकेको थियो। गोविन्द रेग्मीले सबैभन्दा सस्तो होटल कुन छ भनेर लिस्ट मागे। गण्डकी प्रदेशका लागि भनिएको लिस्टमा ३ वटा होटलमात्रै थिए। सबैको शुल्क चर्को।
होटल व्यवसायीहरुले उनीसहित केही साथीहरुलाई होटल एयरपोर्टमा लैजाने सुनाए। तर, सिनामंगलकाे हाेटल तिर लगे।
होटलमा ३ वटा बेड भएको कोठामा बस्ने भए दैनिक ५ हजार, दुई वटा बेड भएको कोठामा बस्ने भए दैनिक ४ हजार, सिंगल बेड भएको कोठामा बस्ने भए ३ हजार दैनिक शुल्क तोकिएको थियो।
गोविन्द र उनका अर्का साथी मिलेर २ वटा बेड भएको कोठा लिए। ढोका खोल्दा होटलको कोठा हो कि फोहोर जम्मा गर्ने ठाउँ हो भन्ने छुट्याउन मुस्किल थियो। कतै साङ्ला कुदिरहेका थिए। झिँगा उडिरहेका थिए।
‘म ४४ वर्षको भएँ त्यस्तो कोठामा ४ हजार तिरेर बसेको पहिलो पटक हो । सरकारले क्वारेन्टाइनको मापदण्डभित्रको व्यवस्थापन नभएका होटललाई कसरी क्वारेन्टाइन बनायो छक्क परेँ,’ गोविन्दले सुनाए।
कोरोनाको चपेटामा परेर फर्किएकाहरुसँग पनि सरकारले चर्को रकम असुल्न सीमित होटलहरुलाई मात्रै क्वारेन्टाइन तोकेको उनको भनाइ छ।
पैसा तिर्न सक्नेलाई राम्रो सुविधा पनि छ : महेन्द्र गुरागाइँ, सचिव, सिसिएमसी
कोरोना संकट व्यवस्थापन केन्द्र (सिसिएमसी) का सचिव महेन्द्र गुरागाँइले होटल क्वारेन्टाइनमा बस्नेहरुको सरकारले पिसिआर परीक्षण गरिदिने तर केही दिन लाग्न पनि सक्ने बताए।
पिसिआर नेगेटिभ आउनेहरु भने होम क्वारेन्टाइनमा जान पाउने उनले बताए।
होटलमा व्यवस्थापन राम्रो छैन भन्ने कुराहरु आइरहेको छ नि? भन्ने प्रश्नमा उनले पैसा अनुसारको व्यवस्थापन भएको बताए।
सचिव गुरागाइँले भने, ‘५ सयका होटल पनि छन्, ५ हजारका पनि छन्। पैसा अनुसारको व्यवस्थापन होला मैले पनि हेरेको छैन । उहाँहरुलाई राम्रो लागेन भने त्योभन्दा अलि बढी रकममा सुविधा भएको होटलमा सिफ्ट गरिदिउँला ।’
पैसा तिर्न सक्छु भन्नेलाई ५ तारे होटलहरुमा पनि राख्न सकिने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789732040.png)
-1786602170.png)
-1789631269.jpg)
