काठमाडौं- नेपाल धितोपत्र बोर्डले नागरिक लगानी कोषलाई स्टक डिलरको अनुमति प्रक्रिया अगाडि बढाउन ताकेता गरेको छ। बोर्डले कोषलाई पत्राचार गर्दै डिलरको अनुमति लिने प्रक्रिया अगाडि बढाउन निर्देशन दिएको हो। कोषले स्टक डिलरको काम सुचारु गर्न 'नागरिक स्टक डिलर लिमिटेड' नामक सहायक कम्पनी खोलिसकेको छ। नेपालको पूँजी बजारमा स–साना लगानीकर्ताको बाहुल्यता रहेको तथा संस्थागत लगानीकर्ताको न्यून उपस्थिति रहेकोले स्टक डिलरलाई आवस्यक प्रक्रिया अगाडि बढाउन भन्दै बोर्डले ताकेता गरेको हो।
धितोपत्रको दोस्रो बजारमा बेलाबखत उतारचढाव आइरहेको सन्दर्भमा संस्थागत लगानीकर्ताले अध्ययन तथा अनुसन्धानमार्फत् गर्ने लगानीसम्बन्धी सुझबुझपूर्ण क्रियाकलापबाट पूँजी बजारमा गतिशीलता आई बजारको विकासमा महत्वपूर्ण भूमिका खेल्ने बोर्डले जनाएको छ।
बोर्डले नेपालको पूँजी बजारमा संस्थागत लगानीकर्ताको प्रवेशलाई प्रोत्साहन गर्न नागरिक लगानी कोष जस्तै विशेष ऐनद्वारा स्थापित वित्तीय संस्थाले बोर्डबाट अनुमतिपत्र प्राप्त गरी धितोपत्र व्यापारीको कार्य सक्ने व्यवस्था समेटी फागुन १ गतेदेखि लागू हुने गरी धितोपत्र व्यवसायी (धितोपत्र दलाल तथा धितोपत्र व्यापारी) नियमावली, २०६४ मा संशोधन गरिसकेको छ। साथै, पूँजी बजारमा संस्थागत लगानी अभिवृद्धि गर्न आगामी आर्थिक वर्ष स्टक डिलरको कार्य सञ्चालनमा ल्याउने नेपाल सरकारको बजेट बक्तव्यमा समेत उल्लेख भएको छ।
उपयुक्त पृष्ठभूमिमा नेपालको पुँजी बजारमा संस्थागत लगानीकर्ताको प्रवेशमा शीघ्रता ल्याउन संस्थागत लगानीकर्ताको रुपमा कार्य गर्न सक्ने तथा पूँजी बजारको विकासमा गतिशिलता ल्याउने उद्देश्यले स्थापित नागरिक लगानी कोषलाई स्टक डिलरको अनुमति प्रक्रिया शिघ्र अगाडि बढाउन बोर्डले असार एक गते पत्राचार गरेको जनाएको छ।
स्टक डिलर नहुँदा स-साना लगानीकर्ताले १०/१० कित्ताले पनि बजार तलमाथी गर्ने गरेका छन्। साना लगानीकर्ताको मनोविज्ञान कमजोर हुँदा संस्थागत लगानीकर्ताले शेयर उठाउने विश्लेषण गरिएको छ। तर कोषले पनि आफुलाई डुवाएर जथाभावी शेयर खरिद बिक्री गर्न सक्दैन।
कोभिड-१९ ले शेयर बजारलाई नकारात्मक प्रभाव पारिरहेको बोर्डले लगानीकर्ताको मनोविज्ञान बढाउन यस्तो पत्राचार गरिएको सूचना जारी गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
