विदेशबाट फर्काइए ११ सय १० नेपाली, कहाँ छन् उनीहरु?

कोरोना अपडेट

निर्मला घिमिरे सोमबार, असार १, २०७७ २०:२६

म्यानमारबाट फर्किएका नपाली त्रिभुवन अन्तर्राष्ट्रिय विमानस्थलमा।

काठमाडौं- भारतबाहेक तेस्रो मुलुकबाट हालसम्म १ हजार १ सय १० नेपाली स्वदेश फर्किएका छन्। सेनाका अनुसार जेठ २२ गतेदेखि असार १ गतेसम्म १ हजार १ सय १० नेपाली स्वदेश फर्काइएको हो। सबैभन्दा पहिला जेठ २२ गते मलेसियाबाट १ जना नेपाली उद्धार गरिएको सेनाका प्रवक्ता विज्ञानदेव पाण्डेले बताए।

त्यसपछि दोस्रो पटक जेठ २३ गते म्यानमारबाट २६ नेपाली स्वदेश फर्किएका हुन्। जेठ २३ गते नै युनाईटेड अरब इमिरेट्स (युएई) बाट एक बालकसहित १६९ जना र जापानबाट ७ जना , जेठ २७ गते अस्टेलियाबाट ११ जना फर्किएका हुन्।

जेठ २९ गते कुवेतबाट २ वटा फ्लाईट मार्फत (१५० र १४९ ) गरेर २९९ जना, जेठ ३० गते कुवेतबाट १४९ जना, जापानबाट ६ जना, जेठ ३२ गते अपगानिस्थानबाट १८ जना र बंगलादेशबाट २५८ जना स्वदेश फर्किएका हुन्। त्यस्तै असार १ गते ओमानबाट १६६ नेपाली स्वदेश फर्किएका छन्।

हङकङबाट बिना खबर फर्किए ७ जना
असार १ गते सोमबार नै हङकङबाट ७ जना नेपाली स्वदेश फर्किएका छन्। सम्बन्धित निकायलाई जानकारी नै नदिई नेपाल फर्किएका उनीहरुको व्यवस्थापनमा समेत कठिनाई भएको सेना प्रवक्ता विज्ञानदेव पाण्डेले बताए।

कहाँ छन् विदेशबाट फर्किएका ११ सय १०?
गत जेठ २३ गते म्यानमारबाट फर्किएका २६ जनालाई होम क्वारेन्टाइनमा पठाइएको छ। २ जनालाई प्रदेश नम्बर १, बागमती प्रदेशस्थित होम क्वारेन्टाइनमा २१ जना, गण्डकी प्रदेशमा १ र प्रदेश ५ स्थित होम क्वारेन्टाइनमा २ जनालाई पठाइएको छ।

पिसिआर परीक्षणको रिपोर्ट नेगेटिभ भएका उनीहरुलाई विमानस्थलबाट होल्डिङ सेन्टरमा र होल्डिङ सेन्टरबाट होम क्वारेन्टाइनमा पठाइएको हो। २३ गते नै जापानबाट फर्किएका ७ जनामध्ये ३ जना प्रदेश १ को क्वारेन्टाइन तथा ४ जना गण्डकी प्रदेशको क्वारेन्टाइनमा पठाइएको छ।

जेठ २३ एयर अरेबिया जहाज चार्टरमार्फत संयुक्त अरब इमिरेट्स युएईबाट फर्र्किएका एक बालकसहित १६९ मध्ये ३९ जनालाई नम्बर १ को प्रदेशस्तरीय क्वारेन्टाइनमा राखिएको छ।

प्रदेश २ का क्वारेन्टाइनमा २० जना, बाग्मती प्रदेशको क्वारेन्टाइनमा ३८ जना, गण्डकी प्रदेशस्थित क्वारेन्टाइनमा २१ जना, प्रदेश ५ को क्वारेन्टाइनमा २४ जना कर्णाली प्रदेशको क्वारेन्टाइनमा २ जना र सुदुरपश्चिम प्रदेशस्थित क्वारेन्टाइनमा १२ जना राखिएको छ। बाँकी १३ जनालाई उपत्यकाका विभिन्न क्वारेन्टाइनमा राखिएको सीएमसीसीले जनाएको छ।

काठमाडौं मुलपानीस्थित क्वारेन्टाइनमा रहेकी एक महिलामा कोरोना पुष्टि भएको छ। युएईमा आरडीटी परीक्षण गर्दा रिपोर्ट नेगेटिभ देखिएकी महिलामा नेपालमा परीक्षण गर्दा कोरोना देखिएको कोरोना संकट व्यवस्थापन केन्द्रका सचिव महेन्द्र गुरागाँइले जानकारी दिए। उनी हाल पाटन अस्पतालको आइसोलेसनमा उपचाररत छन्।

जेठ २७ गते अस्ट्रेलियाबाट फर्किएका ११ जनामध्ये २ जना प्रदेश ५ स्थित क्वारेन्टाइनमा पठाइएको छ। ९ जना उपत्यकाका विभिन्न होटल क्वारेन्टाइनमा राखिएको छ।

जेठ २९ गते कुवेतबाट फर्किएका २९९ मध्ये ९२ जनालाई प्रदेश १ स्थित स्थानीय क्वारेन्टाइनमा पठाइएको छ, १० जना प्रदेश नम्बर २, ४७ जना बाग्मती प्रदेश १० जना गण्डकी प्रदेश, ५१ जना प्रदेश ५, १५ जना कर्णाली प्रदेश र २ जना सुदुरपश्चिम प्रदेशस्थित क्वारेन्टाइनमा पठाइएको छ। बाँकी ७२ जनालाई उपत्यकाका विभिन्न क्वारेन्टाइनमा राखिएको छ।

कुवेतबाट फर्किएका १४९ उपत्यकाका क्वारेन्टाइनमा
जेठ ३० गते कुवेतबाट फर्किएका १४९ लाई उपत्यकाका विभिन्न क्वारेन्टाइनमा राखिएको छ। उनीहरुमध्ये प्रदेश नम्बर १ का ३७ जना, प्रदेश २ का ३ जना, गण्डकी प्रदेशका ३२ जना, प्रदेश ५ का २६ जना र कर्णाली प्रदेशका ५ जनालाई भक्तपुरस्थित खरिपाटी क्वारेन्टाइनमा राखिएको छ। बागमती प्रदेशका ४५ जनालाई भने सिभिल स्टाफ कलेज जाउलाखेल क्वारेन्टाइनमा राखिएको छ।

सोही दिन फर्किएकी एक महिलामा कोरोना पुष्टि भएसँगै उनी टेकु अस्पतालमा उपचाररत छन्। बाँकीलाई प्रदेश स्तरीय क्वारेन्टाइनमा पठाइएको उल्लेख गरिएको छ। ३० गते नै जापानबाट फर्किएका ६ जनामध्ये २ जनालाई हरिसिद्धि क्यान्सर अस्पताल र बाँकीलाई खरिपाटी क्वारेन्टाइनमा राखिएको छ।

अफगानिस्तानबाट फर्किएका १८ जना होटलमा
अफगानिस्तानबाट जेठ ३२ गते (युएन चार्टर फ्लाईटबाट ) फर्किएका १८ जना लाई बुढानिलकण्ठस्थित होटल पार्क भिलेजमा उनीहरुलाई राखिएको छ।

बंगलादेशबाट फर्किए २५८
जेठ ३२ गते बंगलादेशबाट फर्किएका २५८ मध्ये प्रदेश नम्बर १ का २१ जना, प्रदेश नम्बर २ का ५८ जना, बाग्मती प्रदेशको १३४ जना, गण्डकी प्रदेश १७ जना , प्रदेश नम्बर ५ को १५ जना। कर्णाली प्रदेशको ६ जना, सुदुरपश्चिम प्रदेशको ७ जना रहेका छन्।

बाग्मती प्रदेशका १३४ मध्ये ८ जना उपत्यकाका होटल क्वारेन्टाइनमा १२६ होम क्वारेन्टाइनमा राखिएको छ। गण्डकी प्रदेशका १७ जना मध्ये १० जना सम्बन्धीत प्रदेशमा पठाइएको छ भने बाँकी ७ जना जना काठमाडौंस्थित होम क्वारेन्टाइनमा राखिएको छ। अन्य प्रदेशकालाई होटल क्वारेन्टाइनमा राखिएको छ।

होम क्वारेन्टाइनमा ओमानबाट आएका १६६
सोमबार ओमानबाट स्वदेश फर्किएका १६६ सँग पीसिआर परीक्षणको नेगेटिभ रिपोर्ट भएका कारण होम क्वारेन्टाइनमा पठाइएको सेनाले जनाएको छ।पीसिआर परीक्षणको नेगेटिभ रिपोर्ट साथमा लिएर आउनेहरुलाई होम क्वारेन्टाइनमा लैजाने आदेश प्राप्त भएको सेनाका प्रवक्ता विज्ञान देव पाण्डेले बताए।