काठमाडौं- कोरोना संक्रमणको हटस्पट देखिएको बाँकेको नरैनापुर गाउँपालिकाले प्रधानमन्त्री तथा मन्त्रीपरिषद्को कार्यालयलाई पत्र लेख्दै तत्काल चिकित्सकसहितको टोली पठाउन माग गरेको छ।
शनिबार एक पत्र लेख्दै गाउँपालिकाले समुदाय स्तरसम्म संक्रमण फैलिने र स्थिति भयावह हुने सम्भावना देखिएको भन्दै तत्काल चिकित्सकसहितको टोली खटाउन माग गरेको हो।
‘स्थिति नियन्त्रणभन्दा बाहिर जाने अवस्था देखिएकोले तत्काल उच्चस्तरीय चिकित्सक टोली सहित थप सुरक्षाकर्मी परिचालन गरी नियन्त्रण कार्यलाई अगाडी बढाउने व्यवस्थाको लागि निर्णय अनुसार अनुरोध छ,’ गाउँपालिकाले लेखेको पत्रमा उल्लेख छ।
अझै पनि भारतबाट आउनेको संख्या हजारौँ हुने अनुमान गर्दै उसले स्थिति नियन्त्रणमा लिन गम्भीर बन्न सरकारलाई आग्रह गरेको छ। भारतबाट आउने क्रमन नरोकिएको र महाराष्ट्र र दिल्लीबाट आउनेको संख्या बढी रहेकोले थप संक्रमित देखिन सक्ने भएकाले स्थिति नियन्त्रणमा लिन उच्चस्तरी चिकित्सक टोलीको माग गाउँपालिकाले गरेको हो।
गाउँपालिकाले जिल्ला प्रशासन कार्यालयमार्फत् प्रधानमन्त्रीलाई पत्र लेखेको हो। नरैनापुरमा हालसम्म ११४ जना कोरोना संक्रमित भेटिएका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
