काठमाडौं- दिनदिनै कोरोना भाइरसबाट संक्रमितको संख्या बढ्न थालेपछि कोरोनाविरुद्धको बीमा गराउनेको संख्या पनि बढ्न थालेको छ। आइतबारसम्म २० वटा बीमा कम्पनीले ७ हजार ८ सय ५९ वटा कोरोना बीमा पोलिसी बिक्री गरेका छन्। उक्त पोलिसीबाट ९६ हजार ६ सय १३ जना नेपाली बीमित भएका छन्।
बीमा कम्पनीहरुले कोरोना भाइरस बीमा लेख बिक्री गरेर अहिलेसम्म ५ करोड ३२ लाख रुपैयाँ प्रिमियम संकलन गरेका छन्। सबैभन्दा धेरै शिखर इन्स्योरेन्स कम्पनीले दुई हजार ९१ वटा पोलिसी बिक्री गरेको छ। दिनदिनै संक्रमित थपिँदै गएपछि व्यक्तिगत तथा संस्थागत रुपमा यस्तो पोलिसी खरिद गर्ने संख्या बढ्दै गएको बीमा समितिका कार्यकारी निर्देशक राजुरमण पौडेलले जानकारी दिए।
व्यक्तिगतभन्दा पनि संघ संस्थालगायत विभिन्न कार्यालयले आफ्ना कर्मचारी तथा कामदारको बीमा गराउने प्रचलन बढेको छ। लगभग सम्पुर्ण बैंक तथा वित्तीय संस्थाहरुले आफ्ना कर्मचारीको बीमा गराउँदै आएका छन्। यसले गर्दा पोलिसी थोरै तथा बीमितको संख्या धेरै छ।
बीमा समितिले वैशाख ४ गते कोरोना भाइरस ‘कोभिड- १९’ बीमा लेख जारी गरेको थियो। समितिले कोरोना भाइरस लागेर उपचार गराउन सहज होस् भनेर सस्तो दरको प्रिमियम राखेर यस्तो पोलिसी जारी गरेको हो। हाल विद्यमान घातक रोगसरहको बीमालेखअनुसार हुनेगरी यो पोलिसी जारी गरेको छ।
‘क’ र ‘ख’ दुईवटा श्रेणीमा रहेको यस्तो पोलिसी एक लाख र ५० हजार रुपैयाँको बीमा रहने व्यवस्था गरिएको छ। यस्तो पोलिसी खरिद गरेका बीमितलाई कोरोना भाइरस लाग्ने बित्तिकै उनीहरुले तोकिए बराबरको सुविधा पाउन सक्छन्। एक लाख रुपैयाँ बीमाङ्क बराबरको कोरोना बीमा गर्दा व्यक्तिगत भएमा एक हजार रुपैयाँ र परिवार भएमा थप प्रतिव्यक्ति ६०० रुपैयाँका दरले भुक्तानी गरे पुग्छ। त्यस्तै ५० हजार रुपैयाँ बीमाङ्क बराबरको बीमा गर्दा व्यक्तिगत भएमा ५०० रुपैयाँ र परिवारभित्र गर्ने भएमा थप प्रतिव्यक्ति ३ सय रुपैयाँका दरले प्रिमियम भुक्तानी गर्नुपर्छ।
बीमित बढ्न थालेपछि बीमा समितिको निगरानी
दिनदिनै कोरोना बीमा लेख बढ्दै गएपछि बीमा समितिले सुक्ष्म रुपमा निगरानी बढाएको छ। एकातिर कोरोना भाइरसबाट संक्रमण बढ्दै गएको छ भने अर्कोतर्फ बीमित बढ्दै गएपछि भोलिका दिनमा हुनसक्ने जोखिमलाई मूल्याङ्कन गर्ने काम भइरहेको बीमा समितिका कार्यकारी निर्देशक राजुरमण पौडेलले बताए।
जीवन बीमा कम्पनीहरुले आफ्नो बीमा पोलिसी बिकाउन कोरोना बीमा सित्तैमा भन्दै प्रचार गर्न थालेपछि सोमबार एउटा निर्दैशन जारी गर्दै रोक लगाइएको छ। यदि पोलिसी धेरै नै बिक्री भयो र भाइरसको संक्रमण पनि नियन्त्रणभन्दा बाहिर गयो भने बीमा कम्पनीले बीमितको उपचार गर्न सक्दैनन्। यदि सरकारले संक्रमित बीमितको उपचार गरिदियो भने भोलिका दिनमा खासै समस्या नहोला तर सरकारले उपचार गरिदिएन भने बीमा समिति जवाफदेही हुनुपर्ने पौडेलले जानकारी दिए। उनले भने‚ ‘भोलि बीमा कम्पनीहरुले बीमितको दाबी तिर्न नसक्ने अवस्था आयो भने बीमा समिति जवाफदेही हुने भएकाले पछिल्लो समय सुक्ष्म निगरानी बढाइरहेका छौं।‘
अहिले बिक्री भएको पोलिसी मार्फतको प्रिमियमले ५ सयभन्दा धेरैको दाबी भुक्तानी गर्न सक्ने अवस्था रहन्छ। तर महामारीको रुपमा संक्रमण फैलिदै गयो भने बीमा कम्पनीहरुले सबैको उपचार गर्न सक्दैनन्। बीमा सिद्धान्त नै धेरैको बीमा गरेर थोरैको दाबी भुक्तानी गर्ने हो। अहिलेसम्म कोरोना लाग्न सक्ने जोखिम सबैमा छ। तर सबैलाई लाग्छ भन्ने निश्चित छैन। यसकारण बीमा समितिले थोरैको दाबी पर्ने मूल्याङ्कनसहित न्यूनदरको प्रिमियममा यो पोलिसी जारी गरेको हो। तर जोखिम बढ्दै गयो भने यो प्रिमियम बीमा कम्पनीका लागि घाटाको व्यवसाय पनि हुन सक्छ। यस आधारमा बीमा समिति पछिल्लो समय चिन्तित देखिएको छ। यदि संक्रमण सामान्य अवस्थामा फैलियो भने खासै समस्या पर्नेछैन। तर नियन्त्रणभन्दा बाहिरको अवस्थामा बीमा कम्पनीहरुका लागि यो सबैभन्दा घाटाको व्यवसाय हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787120506.png)
-1786602170.png)
-1786513116.png)
