मेलम्ची- कोरोना भाइरसको प्रकोप सुरु भएपछि केही समय बन्द रहेको मेलम्ची खानेपानी आयोजनाको काम पुनः सुचारु भएको थियो। राष्ट्रिय गौरवको आयोजनाको रुपमा चलिरहेको मेलम्ची खानेपानी आयोजनको काम नरोक्ने सरकारको निर्णयसँगै लकडाउनको अवधिमा पनि त्यहाँ काम हुनथाल्यो। आयोजना अन्तिम चरणमा रहेकाले यसलाई नरोक्ने निर्णय उच्च स्तरीय समितिले गर्दै कामदारहरु फर्काएर केही हप्तादेखि काम चलिरहेको थियो।
पुनः सुचारु भएको आयोजनाको कामले जोखिम बढाएको भन्दै स्थानीयहरुले भने विरोध गर्दै आएका थिए। दैनिक सयौं गाडीहरु चल्ने र नयाँनयाँ मानिसको हिँडडुल हुने गरेकाले कोरोना भाइरस फैलने जोखिम उच्च रहेको भन्दै आयोजनाको काम बन्द गर्न उनीहरुले दबाब दिँदै आएका थिए।
स्थानीयले माग राख्दैमा आफूहरुले काम बन्द गर्न नमिल्ने आयोजनाले जवाफ दिँदै कामलाई सुचारु राखेको थियो।
दसैंसम्म काठमाडौं पानी लैजाने सोचका साथ तिब्र गतिमा हेडवर्क्सको काम गरिरहेको आयोजना अब भने समस्यामा पर्ने देखिएको छ। हेलम्बु नगरपालिकाको वडा नम्बर ४ ले आयोजनासहित सबै यातायात रोक्ने निर्णय गरेपछि आयोजनाको काममा अन्योल सिर्जना भएको हो।
संघ सञ्चालन गर्ने, वडा रोक्ने
केन्द्र र स्थानीय सरकारका बीचमा दुईथरी निर्णय हुँदा आयोजनाको काम अन्योलमा परेको छ। केन्द्रले काम सञ्चालन गर्ने भने पनि वडासचिवले त्यस्तो निर्णय नमान्न पत्र लेखेका छन्।
केन्द्रको निर्देशनलाई बेवास्ता गर्दै सिन्धुपाल्चोकको हेलम्बु गाउँपालिका ४ ले मेलम्ची खानेपानी आयोजनाको काम र यातायात सञ्चालनमा रोक लगाएको छ। वडाले अत्यावश्यक बाहेकको यातायात सञ्चालनमा रोक लगाउने र अनावश्यक हिँडडुल समेत गर्न नदिने भएको हो।
कोरोना संक्रमण बढेको र खानेपानीको गाडी धेरै चल्न थालेकाले बन्द गर्ने निर्णय गरिएको हेलम्बु ४ का वडा अधक्ष्य राजकुमार लामिछानेले जानकारी दिए। बिहीबार बिहानबाट लागू हुने गरी राष्ट्रिय गौरवको आयोजना मेलम्ची खानेपानीका सम्पूर्ण गाडी हेलम्बु प्रवेशमा रोक लगाइएको उनले बताए। उनका अनुसार, हेलम्बु प्रवेशद्वार तालामराङबाट हेलम्बु प्रवेशमा हिँडडुलमा, अत्यावश्यक सवारीसाधन प्रहरी, संचार, एम्बुलेन्स, तरकारीका र पास बाहेकका सम्पूर्ण यातायातमा रोक लगाइएको छ। बिहान ६ बजेबाट ९ बजेसम्म र बेलुका ४ बजे देखि ७ बजेसम्म खाद्यान्न र तरकारी पसलमात्र खुलाउन अनुमति दिइने छ।
स्थानीय विपत व्यवस्थापन समितिले बसेर निर्णय गरिएको गाउँपालिका अध्यक्ष निमा ग्याल्जेन लामाले बताए। अहिलेको आवश्यकता भनेको जनताको स्वास्थ्य भएकाले त्यसलाई गाउँपालिकाले पहिलो प्राथमिकता दिएर यस्तो निर्णय गरेको उनले बताए।
‘राष्ट्रिय गौरवको आयोजनाको काम रोक्ने निर्णय पक्कै राम्रो होइन तर अहिलेको महामारीको अवस्थालाई पनि हेर्न जरुरी छ’, अध्यक्ष लामाले भने, ‘जनतालाई बचाउन सकिएन भने आयोजना मात्र बनाउनुको अर्थ नभएकाले सबैसँगको छलफलमा यस्तो निर्णय गरिएको हो।’
उक्त निर्णयले खानेपानीको मात्र नभई सबै सवारी साधन रोकिएकाले यसलाई आयोजना रोक्ने नियतको रुपमा हेर्न नहुने उनको तर्क छ। आयोजना सञ्चालन भइरहेमा स्थानीय जनताको स्वास्थ्यमा गम्भीर असर पर्ने देखिएकाले नगरपालिकाले सबै पक्षलाई ख्याल गरेर यस्तो निर्णय गरेको उनले बताए।
आयोजनाका फिल्ड इन्जियियर शैलेश खनालले भने आयोजनाको सबै काम बन्द नगर्ने प्रयासमा आफूहरु रहेको बताए। ‘सिमेन्ट पनि छैन। दुईचार दिन सप्लाईको काम बन्द हुन्छ। भित्रको काम सञ्चालन गर्ने प्रयासमा हामी रहेका छौं’, खनालले भने.
भित्र रड बाध्ने लगायतका अन्य काम नरोक्ने प्रयासमा आयोजना रहेको उनले भनाई छ। हिजो सर्वदलीय बैठकपछि भएको निर्णय बारे आफूले आयोजना प्रमुखसँग समेत जानकारी गराएको उनले बताए। ढुंगा, बालुवा लगायत सामाग्री सप्लाई गर्ने सवारी चालकहरुले जथाभावी रुपमा रोक्ने र नियम पालना नगरेको गुनासो स्थानीयबाट धेरै आएपछि आयोजना यसका लागि तयार भएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786709750-1786775610.jpeg)
-1786771851.jpg)
-1786602170.png)
-1786513116.png)
