लन्डन- विदेशमा रहेका अधिकांश नेपालीले स्वदेश फर्किने इच्छा देखाएका छन्। गैरआवासीय नेपाली संघ (एनआरएनए)ले गत आइतबारदेखि सुरु गरेको चाैबीसै घन्टा हेल्पलाइनमा फोन गर्ने मध्यका ७७ प्रतिशतले नेपाल फर्किन चाहेको र त्यसको लागि आवश्यक प्रबन्ध गरिदिन आग्रह गरेका छन्।
गैरआवासीय नेपाली संघका महासचिव डा. हेमराज शर्माका अनुसार संघमा प्राप्त फोनकलका आधारमा सबैभन्दा धेरै समस्या मध्यपूर्वका गैरआवासीय नेपालीमा रहेको देखिएको छ। त्यहाँ रहेका अधिकांश नेपालीले नेपाल फर्किन चाहाना राखेका छन्।
हटलाइनमा प्राप्त सूचना अनुसार ७७ प्रतिशत गैरआवासीय नेपालीले स्वदेश फर्किन चाहेका छन् भने ११ प्रतिशतले विदेश जानको लागि आवश्यक प्रक्रिया पूरा गरिदिन आग्रह गरेका छन्। अन्य समस्या हुनेमा १२ प्रतिशत गैरआवासीय नेपाली छन्।
मध्यपूर्वमा धेरै नेपालीको जागिर छुटेको वा कम्पनीबाट राजीनामा दिएर नेपाल जानको लागि तयारी अवस्थामा रहेको देखिएको छ। महासचिव शर्माका अनुसार गैरआवासीय नेपालीका बारेमा नेपालमा रहेका अभिवाभकहरु धेरै चिन्तित देखिएका छन्। तीमध्ये धेरैले विदेशमा रहेको आफ्नो छोराछोरीलाई तत्काल नेपाल फर्काउन चाहेको र त्यसको लागि सहजीकरण गरिदिन संघ समक्ष आग्रह गरेका छन्।
सोमवार साँझसम्म संघलाई प्राप्त टेलिफोनमध्ये भारतको मुम्बई, हैदरावाद, नैनिताल, हरियाणा, नयाँ दिल्लीमा नेपालीको ठूलो समूह खान बस्नसमेत नपाएर अलपत्र परेका छन्।
युएई, भारत, मलेसिया, साउदी अबर, दक्षिण कोरिया, मोजाम्कि, फिनल्यान्ड, अमेरिका, बेलायतगायतका देशमा बसोवास गर्ने गैरआवासीय नेपालीले संघ समक्ष आ–आफ्ना समस्या टिपोट गरेकाे महासचिव डा. शर्माले जानकारी दिए ।
विदेशबाट छुट्टीमा नेपाल गएका धेरैको भिसा सकिएपछि तत्काल विदेश जाने व्यवस्था गरिदिनसमेत उनीहरुले गैरआवासीय नेपाली संघ समक्ष आग्रह गरेका छन्। गैरआवासीय नेपालीबाट प्राप्तभएका सुझाव र समस्यालाई तत्कालै समाधान गर्न एनआरएनएकाे राष्ट्रिय समिति र विदेशस्थित नेपाली कूटनीतिक नियोगसँग समन्वयन गरी कामअघि बढाइएको संघका अध्यक्ष कुमार पन्तले बताए।
यसअघि गैरआवासीय नेपाली संघ (एनआरएनए)ले अध्यक्ष कुमार पन्तको संयोजकत्वमा कोभिड–१९ उच्चस्तरीय समिति गठन गरेको थियो। समितिले कोरोना भाइरसबाट प्रभावित नेपालीको तथ्यांक संकलन गर्ने, स्वास्थ्यसम्बन्धी सामग्री नेपाल पठाउने, गैरआवासीय नेपालीबाट राहत संकलन तथा वितरण गर्ने काम गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
