एजेन्सी–अमेरिकी राष्ट्रपति डोनाल्ड ट्रम्प ह्वाइटहाउसको नियमित पत्रकार सम्मेलनमा पत्रकारसँग आक्रोशित भएका छन्। कोरोना भाइरस टास्क फोर्सको नियमित प्रेस ब्रिफिङमा सीबीएसकी पत्रकार पाउला रीडले सोधेको प्रश्नमा उनले आक्रोश व्यक्त गरेका हुन्।
पत्रकार रीडले ‘फेब्रुअरी महिनामा कोरोना भाइरस संक्रमण रोक्नका लागि के गर्नुभयो?’ भनेर सोधेको प्रश्नमा उनी पत्रकारमाथि खनिएका हुन्। सुरुमा पत्रकारको प्रश्नको जवाफ दिन अस्वीकार गरिरहेका ट्रम्पले अन्ततः रीडप्रति आक्रोशित हुँदैं भने–तपाईंलाई थाहा छ तपाईं झुटा हुनुहुन्छ? के तपाईंलाई थाहा छ तपाईंको कभरेज नक्कली छ?’
ट्रम्पले केही दिनदेखि संक्रमणको संख्या स्थिर भएको दाबी पनि गरे। ‘न्युयोर्क, न्युजर्सी, मिसिगन र लुसियानाजस्ता हटस्पटमा अस्पताल भर्ना हुने दर घटेको छ, अमेरिकीले गाइडलाइन्स पालना गरेकै कारण यस्तो भइरहेको छ,’ उनले भने, ‘तपाईं चार्ट हेर्न सक्नुहुन्छ, पहिले एक लाखभन्दा बढी मृत्यु हुने आँकलन गरिएको थियो, यो घट्दै छ।’ बिस्तारै संख्यामा कमि आउनुमा कारण सरकारको आक्रामक नीति भएको दावी उनले गरे। पत्रकार सम्मेलनमा कोरोना भाइरसको समाचार संकलनका विषयमा उनले निरासा व्यक्त गरे ।
उनले एक भिडियो देखाउदै सञ्चारमाध्यमले फेक न्युज प्रसारण गरिरहेको दाबी गरे । अमेरिकी राष्ट्रपति ट्रम्पले आफू आलोचनासँग नडराउने तर गलत आलोचनाको भने जवाफ दिने बताए।
पत्रकार सम्मेलनमा संक्रामक रोग विशेषज्ञ डा एन्थोनी फौसीले पनि ट्रम्पको भनाइको सर्मथन गरे । उनले पनि कोरोना भाइरसको संक्रमण दरमा कमि आएको छ र योभन्दा अघिल्लो हप्ता खराब अवस्था रहेको उनले दावी गरे।
उनले आइबार एक अन्तर्वार्तामा अमेरिका पहिलै सतर्क हुन सकेको भए मृत्युमा कमि आउन सक्ने बताएका थिए । उनको यो भनाइपछि ट्रम्प निकै रिसाएका थिए । यस्तोमा उनलाई जिम्मेबारीवाट हटाउने आशंका गरिएको थियो । पत्रकार सम्मेलनमा त्यसको बचाउ गर्दै फौसीले उनीसँग कल्पनिक प्रश्न सोधिएको बताए । अमेरिकामा ३० लाख मानिसको परीक्षण भइसकेको र हरेक दिन एक लाख १५ हजारको परीक्षण भइरहेको उनले बताए । अमेरिकामा हालसम्म ५ लाख ७७ हजार ३ सय ७ संक्रमित रहेका छन भने २३ हजार भन्दा बढीले ज्यान गुमाएका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
