काठमाडाैं- उपराष्ट्रपति नन्दबहादुर पुनले नयाँ वर्ष २०७७ ले काेराेना भाइरस (कोभिड–१९) विरुद्धको सङ्घर्षमा अभूतपूर्व राष्ट्रिय एकता प्रदर्शन गर्न सबै नेपालीलाई प्रेरणा दिने बताएका छन्। नयाँ वर्ष २०७७ को अवसरमा शुभकामना दिँदै उनले नयाँ वर्षको प्रारम्भिक महिनाहरूमै कोरोना महामारी नियन्त्रण हुने र देश पुनः ‘समृद्ध नेपाल, सुखी नेपाली’को राष्ट्रिय आकाङ्क्षा पूरा गर्न पुरानै लयमा छिट्टै फर्कने विश्वास व्यक्त गरे।
कोभिड–१९ विरुद्धको सङ्घर्ष सरकार, चिकित्सक तथा स्वास्थ्यकर्मी र सुरक्षाकर्मीको प्रयासले मात्रै नजितिने भन्दै उनले यसमा आम जनताको पूर्ण साथ र सहयोगको खाँचो औँल्याए। जस्तोसुकै अप्ठ्याराेमा धैर्य गर्ने र उच्च मनोबलका साथ चुनौतीको सामना गरेर परिस्थितिलाई अनुकूलतामा बदल्ने हाम्रो विगत भएको स्मरण गर्दै उनले सन्देशमा कोभिड–१९ रोकथाम तथा नियन्त्रणमा सरकारको निर्णयमा पूर्ण साथ दिन सबैमा अपिल गरे।
'विषम परिस्थितिका बीच हाम्रो घर आँगनमा आइपुगेको नयाँ वर्ष २०७७ सबै नेपालीका लागि सम्झनायोग्य हुने मैले विश्वास लिएको छु', सन्देशमा उपराष्ट्रपतिले भनेका छन्, ' वि.सं. २०७६ को अन्त्य भने सुखद हुन सकेन।'
उनले लकडाउनका कारण विभिन्न स्थानमा मजदुरी गर्नेहरु हप्ता दिनको पैदल यात्रापछि घर पुगेका दृष्यहरु हृदयविदारक भएकाे बताए। 'कठिन परिस्थिति उत्पन्न छन् र हुने छन्। तर, संक्रमण नियन्त्रणका लागि लकडाउनको विकल्प देखिदैन', उनले भने, 'यो महामारीविरुद्धको मोर्चामा चिकित्सक तथा स्वास्थ्यकर्मी र सुरक्षाकर्मी नै अग्रभागमा हुनुहुन्छ। हाम्रा चिकित्सक तथा स्वास्थ्यकर्मीहरु क्षमतावान, अनुभवले खारिनुभएका मात्रै होइन देशभक्तिपूर्ण भावले ओतप्रोत र उच्च मनोबलका साथ हुुनुहुन्छ। हामी यो मोर्चा जित्नेछौं। चिकित्सक, स्वास्थ्यकर्मी, सुरक्षाकर्मी, ग्रामिण स्वयम्सेविका लगायत यो महामारीविरुद्ध अग्रमोर्चामा रहनुभएका सबैप्रति म यस अवसरमा उच्च सम्मान व्यक्त गर्दछु।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
