एजेन्सी–लकडाउन लागू गर्न असफल भएपछि टर्कीका गृहमन्त्री सुलेमान सोयलुले राजीनामा दिएका छन्। उनी राष्ट्रपति रेसेप तायिप इर्दोगानका निकट मानिन्छन।
टर्की सरकारले शुक्रबार ४८ घण्टाका लागि सबै ३१ सहरमा लकडाउन घोषणा गरेको थियो। शुक्रबार मध्यरातबाट मानिसलाई घरबाट निस्कन निषेध गरिएको थियो। तर लकडाउन घोषणालगत्तै टर्कीका मानिसहरुको पसल र बेकरीमा भीड लाग्यो। हेर्दाहेर्दै भागदौडको स्थिति सिर्जना भयो। यद्यपि प्रशासनले खाद्यान्न र मेडिकल पसलको किनबेचमा कुनै रोक नभएको प्रष्ट पारेको थियो। तर पनि स्थिति सम्हाल्न प्रशासनलाई गार्हो भएको थियो।
अचानक कर्फ्यु लगाइएको भन्दै जनता र विपक्षी नेताहरुले सरकारको आलोचना गरे। इस्तानबुलमा डेढ करोड मानिस अचानक सामान किन्न बाहिर निस्किए। सहरका मेयरले ट्वीटरमा भिडियो पोस्ट गर्दै लकडाउनका विषयमा पहिल्यै सूचित नगराएको भन्दै असन्तुष्टि व्यक्त गरे।
यही विषयमा जिम्मेवारी लिँदै गृहमन्त्री सुलेमानले ट्वीटरमा राजीनामा घोषणा गरेका हुन्। उनले ट्वीटरमा लेखेका छन्, ‘मैले जनताको सुरक्षाका लागि फैसला गरेको थिएँ, यो कदम संक्रमण रोक्नका लागि थियो।’ यद्यपि राष्ट्रपति इर्दोगानले राजीनामा स्वीकार गरेका छैनन्।
टर्कीमा कोरोना भाइरसको संक्रमण तीव्र गतिमा बढेको छ। त्यहाँ हालसम्म ५६ हजारभन्दा बढी मानिसमा संक्रमण देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
