काठमाडाैं- शैली थिएटर र ईसानको सहकार्यमा पहिलो राष्ट्रिय बाल कविता महोत्सव २०७७ आयोजना हुने भएको छ। विद्यालयस्तरको याे कविता प्रतियोगितामा शैक्षिक सत्र २०७६ काे एसइईमा सहभागी विद्यार्थी वा सोभन्दा तल्लो कक्षामा अध्यनरत विद्यार्थीहरु मात्र सहभागी हुन पाउने आयाेजकले जनाएकाे छ।
शैली थिएटरका अनुसार कविताको शीर्षक वा विषयवस्तु छान्न प्रतियोगी स्वतन्त्र हुनेछन् भने राष्ट्रियतामा आँच आउने खालका विषयवस्तु तथा भाषा प्रयोग भएका कवितालाई समावेश गरिने छैन। महोत्सव संयाेजक सरस्वती अधिकारी भन्छिन्, 'प्राविधिक कारणबस यो पटक कविता नेपाली भाषामा मात्र राखिएको छ। अंग्रेजी र नेपालका अन्य भाषामा आएका कवितालाई प्रतियोगितामा समावेश गर्न सक्ने छैनौं।'
महोत्सव सहनिर्देशक सुवास सुवेदीले महोत्सव बाल नाटक महोत्सव जस्तै हरेक वर्ष शैली थिएटरले गर्ने छ। सुबेदीले भने, 'कविता नितान्त नयाँ हुनुपर्ने छ। पाठ्यक्रममा समावेश भएका वा पहिले नै प्रकाशित भइसकेका कवितालाई प्रतियोगितामा समावेश गरिने छैन।'
आयोजकका अनुसार कविता पठाउँदा लिखित र बाचन गरेको भिडियोसहित पठाउनु पर्ने छ भने भिडियोको गुणस्तरलाई मूल्यांकनको आधार बनाइने छैन। मोबाइलले कैद गरेको भिडियो बढीमा तीनदेखि चार मिनेटसम्म मान्य हुने छ।
कविता २०७७ बैशाख १० गतेभित्र आईसक्नु पर्ने छ। समय सीमा नाघेर आएका कवितालाई प्रतियोगितामा समावेश गरिने छैन। समयभित्र आएका भिडियोसहितका कवितालाई निर्णायक मण्डलले दिएको अंकको आधारमा पुरस्कृत गरिने छ। सहभागी प्रतियोगीलाई प्रमाणपत्र प्रदान गरिने छ। महोत्सवमा सहभागी सम्पूर्ण कविताको भिडियोलाई शैली थिएटरले आफ्नो युट्युब च्यानलमा राख्ने छ। सहभागी हुन कुनै शुल्क लाग्ने छैन।
महोत्सव निर्देशक नवराज बुढाथोकीले निर्णायक र दर्शकको भोटका आधारमा निर्णय गरिने बताए। उनले भने, 'उत्कृष्ट ५ कवितालाई पुरस्कृत गरिनेछ, पुरस्कार वितरण शैली थिएटरले आयोजना गर्ने आगामी राष्ट्रिय बाल नाटक महोत्सवमा गरिनेछ।' उत्कृष्ट २० कवितालाई राष्ट्रिय बाल नाटक महोत्सवमा बाचन गरिनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791448938.png)
-1786602170.png)
-1791388337.png)
