काठमाडौं- रसियालाई २०१८ मा भएको विश्वकप फुबटल र कतारले २०२२ मा गर्ने विश्वकप फुटबल आयोजनाको अधिकार दिँदा फिफाका केही अधिकारीले २०१० मा घुस खाएको अमेरिकी अनुसन्धानबाट खुलेको छ।
अमेरिकाको ‘फेडेरल ब्यूरो अफ इन्भेस्टिगेसन’ (एफबिआई) को अनुसन्धानले यस्तो निश्कर्ष निकालेको हो। अनुसन्धानले फिफाका केही पूर्वअधिकारीलाई घुस दिने प्रस्ताव आएको र केहीले घुस लिएको खुलासा भएको बिबिसीले उल्लेख गरेको छ।
अनुसन्धान विभागले दक्षिण अमेरिकामा फुटबलको उच्च निकायका पूर्वअध्यक्ष निकोलस लियोज र ब्राजिल फुटबल फेडेरेसनका पूर्वप्रमुख रिकार्डो टेइसिराविरुद्ध घुस लिएको आरोप लगाएको छ। उनीहरुले २०२२ को विश्वकप कतारमा गर्न दिन पैसा खाएको बताइएको छ।
यस्तै रसियालाई विश्वकप दिनका लागि ट्रिनिडाड एण्ड टोबागोका फिफाका पूर्वउपाध्यक्ष समेत रहेका ज्याक वार्नरले विभिन्न कम्पनीहरु मार्फत चार मिलियन पाउण्ड लिएको बताइएको छ। २०१८ को विश्वकप आयोजना गर्न रसियाले इंग्ल्याण्डलाई पछि पारेको थियो। वार्नर फिफाको उत्तर र मध्य अमेरिका साथै क्यारेबियन महासंघका अध्यक्ष हुन्।
ग्वाटेमालाका फुटबल पूर्वप्रमुख राफेल सालग्युएरोले पनि विश्वकप आयोजनाका लागि मत दिँदा ठूलो रकम लिन सहमति गरेको खुलेको छ।
टेलिभिजन अधिकारका लागि रकम दिएका टिभि र अन्य केही व्यापारिक कम्पनीहरु पनि अनुसन्धानको दायरामा परेका छन्। रसिया र कतारलाई विश्वकप आयोजना गर्न दिएको समय १० वर्ष बितिसक्दा अनुसन्धान अन्तिम चरणमा पुगेको हो।
रसियामा विश्वकपको आयोजना सफल भइसकेको भए पनि यो अनुसन्धानले कतारले गर्ने विश्वकप संकटमा पर्ने विश्लेषण आइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772284174.png)
-1764146706.png)
-1772271039.png)
