काठमाडौं – कोरोनाको संक्रमित र आशंका गरिएकाको उपचार तथा परीक्षणका क्रममा चिकित्सक तथा स्वास्थ्यकर्मीका लागि अनिवार्य मानिने व्यक्तिगत सुरक्षात्मक उपकरण (पिपिई) कै अभाव देखिएको छ।
मास्क, हेल्मेट, हेड कभर, बुट, गाउन, पञ्जा, चस्मा पिपिई अन्तर्गत पर्दछ। जसले स्वास्थ्यकर्मीलाई बिरामीबाट हुन सक्ने संक्रमण तथा जोखिमबाट सुरक्षा प्रदान गर्छ। तर विरामीको सिधा सम्पर्कमा पुग्ने नेपालका स्वास्थ्यकर्मीका लागि पर्याप्त पिपिई छैन। यसकै अभाव हुन थालेको छ।
सरकारले कोरोना संक्रमितको उपचारका लागि एक हजार आइसोलेसन वार्ड र २ सय ३५ आइसियु शय्याको व्यवस्था गर्दैछ। तर त्यही आइसोलेसनमा उपचार गर्नका लागि अनिवार्य मानिएको पिपिईको अभाव देखिएको छ। काठमाडौंको प्रमुख सरकारी अस्पतालमा पनि पिपिईको अभाव हुन थालेको छ। कतिपयले मागेर चलाएका छन् भने कति अस्पतालले जसोतसो जोहो गरिरहेका छन्।
शुक्रराज ट्रपिकल तथा सरुवा रोग अस्पताल, वीर अस्पताल, त्रिवि शिक्षण अस्पताल, पाटन स्वास्थ्य विज्ञान प्रतिष्ठान, सिभिल अस्पताल, कान्ति बाल अस्पताल र प्रसुति गृह अस्पतालमा पिपिईको अभाव देखिएको छ।
शुक्रराज ट्रपिकल तथा सरुवा रोग अस्पतालका निर्देशक डा. सागरराज भण्डारीका अनुसार मुश्किलले करीब दुई हप्तालाई पुग्ने पिपिई मात्र छ। तर, बिरामीको संख्या बढे हाल रहेको पिपिईले नपुग्ने उनले बताए। उनले भने, ‘कन्जुसाई गरेर प्रयोग गर्यो भने १०/१५ दिनलाई पुग्ने पिपिई मात्र छ। यदि केस बढ्यो भने धान्न मुश्किल पर्छ।’
बजारमा पिपिई नपाइने भएकाले खरिद गर्न पनि सहज नभएको उनले बताए। तर, जसरी हुन्छ, थप पिपिई ल्याउने तयारी भएको उनको भनाई छ।
‘बजारमा सजिलै नपाइने भएकाले कसरी ल्याउने भन्ने छ,’ उनले भने, ‘हामी थप पिपिई ल्याउन तयारी गर्दैछौ।’
पाटन स्वास्थ्य विज्ञान प्रतिष्ठानमा कोरोनाका शंकास्पद बिरामीको उपचार हुन्छ। यस अस्पतालमा पनि पिपिई कसरी र कहाँबाट ल्याउने भन्ने विषयले नै चिन्तित बनाएको छ। हाल अस्पतालमा पिपिईको अभाव छैन। शंकास्पद बिरामीको उपचार भइरहेको छ। तर, एकै पटक धेरै बिरामी आए के गर्ने? विकल्प देखिन्न।
अस्पतालका निर्देशक डा. विष्णुप्रसाद शर्मा भन्छन्, ‘अहिले जसोतसो काम भइरहेको छ। अभाव भइसकेको छैन। अभाव हुन नदिन थप पिपिई ल्याउने तयारी हुँदैछ। तर, कहाँबाट कसरी ल्याउने हामी छलफल गर्दैछौ।’
वीर अस्पतालले सीमित बिरामी मात्र उपचार गर्न सक्ने पिपिई भएको बताएको छ। उपकुलपति डा. डीएन शाहका अनुसार हाल अस्पतालमा पिपिईको अभाव छैन। तर, एकैपटक धेरै बिरामी आए उपचार गर्न सक्ने पनि पिपिई अस्पतालसँग छैन। डा. शाह भन्छन्, ‘अहिले केही पिपिई हामीसँग छ। तर, एकैपटक धेरै बिरामी आयो भने समस्या हुन्छ। थप पिपिई खरिद गर्न हामी तयार छौं। तर, बजारमा पाइएको छैन।’ थप पिपिईका लागि स्वास्थ्य मन्त्रालयलाई आग्रह गरिएको उनले बताए।
महाराजगञ्जस्थित त्रिवि शिक्षण अस्पतालमा पनि पिपिईको अभाव छ। उपचारलाई असर हुन नदिन पिपिई मागेर चलाएको अस्पतालका निर्देशक डा. प्रेमकृष्ण खड्गाले बताए। उनले भने, ‘पिपिईको अभाव छ। अहिले मागेर काम चलाएका छौं। सवैतिर माग्दैछौं। खरिद गर्नका लागि बजारमा पनि अभाव छ।’
पिपिई खरिदका लागि स्वास्थ्य मन्त्रालय तथा अन्य दातृ संस्थासँग अनुरोध गरिएको उनले बताए। कान्ति बाल अस्पतालमा हाल पिपिईको अभाव छैन। अस्पतालले पिपिईको अभाव हुन नदिन ५० वटा गाउन सिलाएको छ। ओपिडिमा रुघाखोकी र ज्वरो परीक्षण गर्ने चिकित्सकका लागि २० वटा पिपिई रहेको अस्पतालका निर्देशक डा. कृष्णप्रसाद पौडेलले बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।