काठमाडाैं- सुदूरपश्चिम प्रदेश सरकारले दशगाजा क्षेत्रमा अल्पत्र परेका नेपालीहरुलाई सम्बन्धित जिल्लामा पठाउने निर्णय गरेको छ। सुदूरपश्चिम प्रदेश मन्त्रिपरिषद्काे मंगलबार बसेको बैठकले त्रिनगर नाकाको दशगजा क्षेत्रमा रोकिएका नेपालीहरुको लगत संकलन गरेर सम्बन्धित जिल्लाका प्रमुख जिल्ला अधिकारीको जिम्मामा पठाउने निर्णय गरेको हो।
बैठकपछि पत्रकार सम्मेलन गर्दै सामाजिक विकासमन्त्री कृष्णराज सुवेदीले दशगजामा रहेका नेपालीहरुलाई आफनो स्थानमा पुर्याउन प्रदेश सरकारले बसको व्यवस्था गर्ने जानकारी दिए। उनले भने, ‘उनी (सीमामा रहेका नेपालीहरुलाई) सम्बन्धित जिल्लाका प्रमुख जिल्ला अधिकारीको जिम्मा लगाइन्छ। प्रजिअ तथा सम्बन्धित स्थानीय तहहरुले नै आफ्नो क्षेत्रमा आइसोलेसनमा राख्नेछन्।’ उनले अहिलेसम्म नाकामा कैलाली, कञ्चनपुर, अछाम, डोटीलगायतका १९ जिल्लाका नेपालीहरु रहेका छन्।
नाकामा भारतका बैंगलुरु, मुम्बई, दिल्लीलगायतका स्थानमा काम गरिरहेका नेपालीहरु सोमबारदेखि अल्पत्र अवस्थामा छन्। अहिले पनि भारतका अन्य स्थानमा यस क्षेत्रका नेपालीहरु आउने क्रम जारी रहेको जनाइएको छ। मन्त्री सुवेदीले भने, ‘म सञ्चारकर्मीहरुमार्फत् भन्न चाहन्छु। जो जहाँ हुनुहुन्छ त्यहीँ बस्नुहोस्। यो कठिन घडीमा सबै एक भई महामारीसँग लड्नुपर्छ।’
यस्तै, प्रदेश सरकारले जोखिम न्यूनिकरण, रोकथाम, उपचार तथा आइसोलेसन निर्माणका लागि सेती र महाकाली प्रादेशिक अस्पताललाई ५०/५० बेडको आइसोलेसन बनाउन ११ करोड ५० लाख रकम उपलब्ध गराउने निर्णय गरेको छ। मन्त्री सुवेदीले कोराना भाइरस व्यवस्थापन, रोकथाम, नियन्त्रणका लागि स्थानीय तहलाई रकम उपलब्ध गराउने निर्णय गरिएको जानकारी दिए। उनका अनुसार प्रदेश सरकारले उपमहानगरपालिकालाई पाँच लाख, नगरपालिकालाई चार लाख र गाउँपालिकालाई तीन लाख रुपैयाँ उपलब्ध गराउने निर्णय गरेको छ।
प्रदेशमा एक उपमहानगपालिका, ३३ नगरपालिका र ५३ गाउँपालिका गरी ८८ स्थानीय तह रहेका छन्।
प्रदेश राहत कोष व्यवस्थापनमा मुख्यमन्त्री तथा मन्त्रीहरुले एक महिनाको पारिश्रमिक दिने निर्णय भएकाे छ। मन्त्री सुवेदीले कोरोना भाइरसको नियन्त्रण तथा उपचारमा सहयोग पुगोस् भनेर सो निर्णय भएको बताए। यस्तै, कुनै व्यक्ति वा पदाधिकारीलाई अत्यावश्यक वस्तुमा बाधा पुगाउनेलाई कानुनी कारबाहीमा ल्याइने निर्णय गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
