काठमाडौं-सरकारले एक साताका लगाएको लकडाउन सर्वसाधारणले पालना गरेको पाइएको प्रहरीले जनाएको छ। छिटफुट बाहेकका सवारी साधन र सर्वसाधारणबाहेक अधिकांश सडक खाली रहेकाले यसको पुष्टि गर्ने नेपाल प्रहरीका प्रवक्ता डिआइजी शैलेश थापा क्षेत्रीले नेपाल लाइभलाई जानकारी दिए।
‘भारतलगायत देशमा सरकारले लगाएको लकडाउनका खासै प्रभावकारिता देखिएको थिएन। तर त्यो तुलनामा यहाँ लकडाउनमा नागरिकले राम्रोसँग साथ दिएको भन्न मिल्छ’ प्रवक्ता क्षेत्रीले भने।
यद्यपि राजधानीसहित देशका विभिन्न स्थानमा यसको उल्लघंन गर्दै मान्छेहरु सडकमा ननिस्केका भने होइनन्। यसरी अत्यावश्यक कामविना सडकमा निस्कने व्यक्तिलाई प्रहरीले सम्झाउँदै घर पठाउने गरेको छ। अटेर गरेर सवारी चलाउनेलाई भने प्रहरीले कारबाहीको दायरामा समेत ल्याएको छ।
झापाको दमक ट्राफिक प्रहरीले भने लकडाउन उल्लघंन गर्दै सवारी गुडाएको भन्दै मोटरसाइकल र अटो रिक्साको चाबी थुतेर राखेको छ।
‘उनीहरुलाई सम्झाउँदासमेत नमानेपछि चाबी थुतेर केही समय राखेर घर फिर्ता पठाउन थालेका छौं’ दमकका ट्राफिक सई यज्ञराज शर्माले भने।
दमक प्रहरीले लकडाउन उल्लघंन गर्ने करिब ८० सवारी साधनलाई नियन्त्रणमा लिएको छ।
उता कैलालीमा पनि लकडाउन उल्लघंन गर्ने करिब १०० सवारी साधनलाई नियन्त्रणमा लिइएको प्रहरीले जनाएको छ।
हाइ अलर्टमा रिजर्भ फोर्स
लकडाउन अनुगमनमा धेरैजसो प्रहरी खटिएका छन्। सँगै प्रहरी हेडक्वाटरले रिजर्भ फोर्सको रुपमा पनि प्रहरीलाई हाइअलर्टमा राखेको जनाएको छ।
कोरोना संक्रमण फैलिएको अवस्थामा यी रिजर्भ फोर्सलाई तत्कालै खटाउन सकिने प्रवक्ता क्षेत्रीले बताए। संक्रमण फैलिन थालेपछि सम्बन्धित क्षेत्रलाई प्रहरीले घेरा हालेर सर्वसाधारणको आवतजावतलाई समेत रोक लगाएर औषधि उपचार गर्ने व्यवस्था मिलाईको छ। सोही अनुसार हाइ अलर्टमा राखिएका प्रहरीले काम गर्ने हेडक्वार्टरले जनाएको छ।
प्रहरी हेडक्वार्टरसहित सातवटै प्रेदेशमा प्रहरीले आइसोलेशन वार्डको व्यवस्था मिलाइसकेको छ। हेडक्र्वाटरमा ३० तथा प्रहरी अस्पताल महाराजगञ्जमा ५० बेड तयारी अवस्थामा राखिएको छ।
त्यसैगरी हरेक प्रदेशमा कम्तीमा पनि २५ भन्दा घटी नहुने गरी आइसोलेशन वार्डको तयारी राख्न हेडक्वाटरले यसअघि नै पत्राचार गरिसकेको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
