काठमाडौं- इंग्लिस क्लब म्यानचेस्टर युनाइटेडमा प्रशिक्षक ओले गुनार सोल्सकरका लागि एउटा महत्वपूर्ण जितको खोजी भइरहेको थियो। जहाँ म्यानचेस्टर सिटीविरुद्धको जित सोल्सकरलाई प्रमाणित गर्ने अवसर मिल्यो।
प्रिमियर लिग सिजनमा म्यानचेस्टर युनाइटेडले म्यानचेस्टर सिटीलाई दुवै खेलमा हराएको सन् २००९–१० पछि अहिले नै हो। अझ प्रशिक्षक सर एलेक्स फर्गुसनपछि देखिइरहेको कमि विस्तारै पूरा भइरहेको विश्लेषण पनि म्यानचेस्टर युनाइटेड बुझ्नेहरु गरिरहेका छन्।
म्यानचेस्टर युनाइटेडले जोसे मोउरिन्होलाई प्रशिक्षकबाट हटाएपछि २०१८ को डिसेम्बरमा सोल्सकरले अर्को प्रशिक्षक नआउँदासम्मका लागि टिम सम्हाल्ने अवसर पाएका थिए। तर २२ डिसेम्बरमा कार्डिफ सिटीलाई ५–१ हराउँदा सोल्सकरलाई हेर्ने दृष्टिकोण फेरियो। म्यानचेस्टर युनाइटेडले पाँच गोल गरेको त्यो २०१३ पछि थियो। त्यसपछिका चार खेल पनि जित्दा त उनीमाथिको आश निकै बढ्यो। एकपछि अर्को खेलमा मिलेको सफलताले सोल्सकर २०१९ जनवरीका लागि प्रिमियर लिगमा उत्कृष्ट प्रशिक्षक पनि बने।
सोल्सकरले टिम सम्हालेको पहिलो च्याम्पियन्स लिगमा अन्तिम १६ को खेलमा म्यानचेस्टर युनाइटेड पिएसजीसँग घरेलु मैदानमा नै २–० ले पराजित भएको थियो। जुन सोल्सकरको पहिलो हार थियो। तर अवे मैदानमा ३–१ ले खेल जित्दै युनाइटेड अवे गोलका आधारमा क्वाटरफाइनल पुग्यो। घरेलु मैदानको नराम्रो हारपछि पनि अवे मैदानको ‘कमब्याक’ ले प्रशिक्षक सोल्सकर अझ उम्दा देखिए। त्यसैले हुनुपर्छ २०१९ मार्च २८ मा उनी म्यानचेस्टर युनाइटेडको प्रशिक्षकका रुपमा तीन वर्षको सम्झौतामा रहे।
जारी २०१९–२० को प्रिमियर लिग सिजन भने म्यानचेस्टर युनाइटेडका लागि अपेक्षाकृत भइरहेको थिएन। अहिले शीर्ष चारमा पर्ने संघर्ष गर्नुपरिरहेको टिममा नयाँ उत्साहको खोजी भइरहेको थियो। जुन लिगमा म्यानचेस्टर सिटीलाई दुवै खेलमा हराएपछि देखिएको छ।
प्रिमियर लिग खेलमा आइतबार राति एन्थोनी मार्सियल र स्कट म्याकटोमिनेको गोलमा म्यानचेस्टर युनाइटेडले म्यानचेस्टर सिटीलाई २–० ले हरायो। त्यसअघि सिजनको पहिलो भेटमा म्यानचेस्टर युनाइटेडले म्यानचेस्टर सिटीलाई २–१ ले हराएको थियो। जहाँ एन्थोनी मार्सियलसँगै मार्कस रासफोर्डले गोल गरेका थिए।
यसै सिजन लिग कपको पहिलो लेगमा म्यानचेस्टर सिटीसँग ३–१ हारेको युनाइटेडले दोस्रो लेग १–० ले जितेको थियो। यो सबैले सोल्सकरले आफूमाथिको शंका घटाउने काम गरेका छन्। अहिले लगातार १० खेलमा अपराजित रहनुले उनले सिजनको अन्त्यसम्म आफूलाई प्रमाणित गर्नेछन् भन्ने देखाएको पनि छ।
अहिले ४५ अंकसहित तालिकामा पाँचौँ स्थानमा रहेको युनाइटेड चौथो स्थानको चेल्सीभन्दा तीन अंक पछि, तेस्रो स्थानको लेस्टरभन्दा पाँच अंक र दोस्रो स्थानको म्यानचेस्टर सिटीभन्दा १२ अंक पछि छ। शीर्ष स्थानमा रहेको लिभरपुललाई अरु टिमले उछिन्ने असम्भव देखिइसकेको छ। ३० वर्षपछि लिभरपुल उपाधिनजिक रहँदा युनाइटेड शीर्ष स्थानबाट ३७ अंकले पछि छ।
सिजनको सुरुमा देखिएका नराम्रा अवस्थाबाट युनाइटेड अहिले बाहिर निस्कँदै छ। प्रशिक्षक सोल्सकरको विश्लेषण सिजनको अन्त्यमा म्यानचेस्टर युनाइटेड कहाँ रहन्छ भन्नेमा निर्भर हुनेछ। त्यसैका लागि अहिलेका हरेक खेल सोल्सकरको प्रशिक्षण शैलीमाथिको प्रश्न या जवाफ हो।
क्रिस्टल प्यालेसबाट ४५ मिलियन पाउण्डमा ल्याइएका राइट ब्याक आरोन वान बिसाका अहिलेका लागि मात्रै होइन भविष्यसम्मका लागि राम्रो लगानी हुन् भन्ने देखिएको छ। जसको लिभरपुलका ट्रेन्ट अलेक्जेण्डर आर्नोल्ड र चेल्सीका रिस जेम्ससँग तुलना भइरहेको छ। म्यानचेस्टर सिटीका रहिम स्टर्लिङविरुद्ध मैदानमा अब्बल देखिएका डिफेन्डर उनै बिसाका नै हुन्।
स्पोर्टिङ लिस्बोनबाट ४७ मिलियन पाउण्डमा ल्याइएका ब्रुनो फर्नान्डेज पनि सोल्सकरका लागि अर्को बलियो हतियार हुन्। उनले जति रकम म्यानचेस्टर युनाइटेडबाट लिएका छन् उनको उपलब्धी त्योभन्दा अझ बढी देखिएको छ।
युनाइटेडमा अहिले फर्नान्डेज ‘गेम चेन्जर’ का रुपमा देखिएका छन्। फर्नान्डेजको उल्भरह्याम्टनसँगको पहिलो खेलदेखि अहिलेसम्म हेर्दा सबैभन्दा धेरै गोलमा संलग्न उनी नै छन्। अहिले पोउल पोग्बाको कमि पनि उनैले पूरा गरिरहेको देखिन्छ।
यति मात्रै होइन सोल्सकरको डिफेन्स लाइन पनि अहिले तालमेल मिलेको देखिन्छ। सबै प्रतिस्पर्धामा हेर्दा पछिल्लो १० खेलमा हेर्दा म्यानचेस्टर युनाइटेडले दुई गोल मात्रै खाएको छ।
जारी सिजन उम्दा प्रशिक्षक पेप गार्डिओलालाई तीन पटक परास्त गर्न सक्नुले पनि सोल्सकरको नयाँपन फुटबल मैदानमा देखिन्छ नै। त्यसले फर्गुसनले छाडेदेखि कमजोर अवस्थामा नै बढिरहेका म्यानचेस्टर युनाइटेडका समर्थकले पनि खुसी सञ्चार गर्न पाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
