काठमाडौं- जगदम्बा सिमेन्टको आम्दानी गत वर्षको भन्दा ३५ करोड ५० लाख रुपैयाँले बढेको छ। शुभ श्री जगदम्बा सिमेन्ट मिल्सले गत वर्ष ५ अर्ब ९० करोड रुपैयाँको आम्दानी गरेको छ। विगत तीन वर्षको अवधिमा कम्पनीले उत्पदन बिक्रीमार्फत ३२ प्रतिशतले आम्दानी सुधार गरेको छ।
अन्य कम्पनीहरुको नाफा तथा आम्दानीमा गिरावट देखिदै आएकोमा जगदम्बा सिमेन्टको भने नाफा तथा अन्य आम्दानीमा सुधार देखिएको हो। यसै अवधिमा कम्पनीले उत्पादन क्षमता बढाएको छ। प्रतिदिन १२ सय टन उत्पादन क्षमता रहेको कम्पनीले २६ सय टन पुर्याएको छ। क्षमता बढाउने क्रममा कम्पनीले दुई अर्बभन्दा माथिको कर्जा लिएको छ।
हाल कम्पनीको अल्पकालीन तथा दिर्घकालीन संयुक्त कर्जा दुई अर्ब ६१ करोड रुपैयाँ छ। नेपाल राष्ट्र बैंकले ५० करोड रुपैयाँभन्दा माथिको कर्जाका लागि अनिवार्य रेटिङ गर्नुपर्ने व्यवस्था गरेको छ।
इक्रा नेपालले गरेको रेटिङअनुसार दिर्घकालीन कर्जाका लागि 'इक्रा एनपि एल डबल बि प्लस' र अल्पकालिन कर्जाको लागि 'इक्रा एनपि ए फोर प्लस' प्राप्त गरेको छ। रेटिङ एजेन्सीका अनुसार उक्त कर्जा डुव्न सक्ने सम्भावना धेरै कम छ। यदि वित्तीय दायित्व समयमा पूरा गरेको खण्डमा मध्यम किसिमको कर्जाको संकेत गर्दछ।
कम्पनीका दुई मुख्य प्रवर्द्धक सौरभ ग्रुप र शंकर ग्रुप रहेका छन्। नेपालको उद्योग व्यवसायमा राम्रो पकड जमाएका दुई ग्रुपका कारण पनि उक्त कर्जाको रेटिङ केहि राम्रो देखिएको हाे। केहि समयदेखि क्लिन्करमा नेपाल आत्मनिर्भर भएकोले पनि नेपाली उद्योगलाई सहज भएको रेटिङ एजेन्सीले जनाएको छ।
भारतबाट क्लिन्करसमेत आयात गर्नुपर्ने अवस्थाले गर्दा नेपालमा सिमेन्टको मूल्य धेरै थियो। कच्च पदार्थ पनि नेपालमै भएको हुँदा सिमेन्ट उद्योग अघिल्ला वर्षमा जस्तो जोखिममा छैनन्। तर, नेपालमा ६० वटाभन्दा धेरै सिमेन्ट उद्योग छन्। कम्पनी धेरै हुँदा बजारमा प्राइस वार भैरहेको छ। कतिपय ठूला कम्पनीले धेरै लामो समयसम्म उधारोमा सिमेन्ट उपलब्ध गराउदा साना सिमेन्ट उद्योग समस्यमा छन्।
केहि साना कम्पनीहरुले बजार व्यवस्थापन गर्न नसक्दा लिएको कर्जाको व्याज भुक्तानीका लागि पनि थप ऋण खोज्नु पर्ने वाध्यतामा छन्। यसै अवस्थामा जगदम्बाको भने नाफा सुधार भएको छ। पछिल्लो समय अन्य सिमेन्ट उद्योगको नाफा तथा आम्दानीमा गिरावट आउँदै गर्दा यसको भने सुधार भएको हो। तर, क्षमता दोब्बरले भन्दा बढी बढाउँदा आम्दानी भने ६ प्रतिशतले मात्रै सुधार भएको देखिन्छ।
सिमेन्ट तथा छड उद्योगहरु तरल पैसाको अभावले धेरै समस्यामा छन्। धेरै लामो समय बजारमा सामान होल्ड भएर बस्ने। बजारमा प्रतिस्पर्धाका लागि लामो समयसम्म उधारोमा सामान दिनुपर्ने जस्ता कुराले यस्ता कम्पनीहरु सहज अवस्थामा छैनन्। नेपालम विकासका पूर्वाधार निर्माणको काम अझै बाँकी रहेको हुँदा यस्ता उद्योगको व्यवसाय विस्तारको रुम अझै बाँकी छ।
तत्कालका लागि क्यास फ्लोमा केहि समस्या देखिए पनि दिर्घकालीन रुपमा हेर्दा यस्ता कम्पनीको सम्भावना धेरै रहेको एजेन्सीले प्रतिवेदनमा उल्लेख गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1783579045.png)
-1764146706.png)
