लेख-विश्लेषण

कोरोनाको डरमा खेल उत्सव : तयारी पूरा तर अन्योल

सराेज तामाङ बुधबार, फागुन २१, २०७६ १८:२५

काठमाडौं- कोरोना भाइरसको डर बढ्दै जाँदा त्यसको असर विश्व खेलकुदमा पनि देखिएको छ। ठूला खेल उत्सवहरु बन्द रंगशालामा गर्नेदेखि खेल नै स्थगितसमेत भइरहेका छन्। तर कोरोनाको उच्च जोखिममा रहेको भनिएको नेपालमा भने खेल उत्सवहरु नियमित नै छन्।

सहिद स्मारक ‘बी’ डिभिजन लिगदेखि मोफसलका फुटबल प्रतियोगितासँगै अन्य खेल गतिविधि पनि चलिरहेका छन्। विश्वका स्टार खेलाडीहरु भेला गरेर चैत १ गतेदेखि एभरेस्ट प्रिमियर लिग (इपिएल) क्रिकेट आयोजना गर्ने तयारी पनि भइरहेको छ। ठूलो तयारी भइसकेकाले नै आयोजक भनिरहेका छन्- ‘यहाँ डर छैन, प्रतियोगितालाई असर गर्दैन।’

तर ठूला सभा सम्मेलन र जमघट नगर्न र उच्च सतर्कता अपनाउन सरकारले नै आग्रह गरिरहेको छ। विद्यालयको वार्षिक परीक्षा छिटो सकाउनेदेखि सार्वजनिक स्थानहरुमा विशेष चनाखो हुन, अनावश्यक भिडभाडमा नजान सूचना प्रवाह भइरहेका छन्।

यस्तोमा सबैभन्दा धेरै दर्शक देखिने नेपाली क्रिकेटमा क्रिस गेल, ड्वायन स्मिथ, उपुल थारङ्गा, कोरी एन्डर्सन जस्ता स्टार खेलाडी हेर्न कीर्तिपुर मैदानमा दर्शक ठूलो संख्यामा आउने नै छन्। अहिले खेलकुद भनेकै दर्शक जस्तो भएका बेला दर्शकबिनाको खेल खेलाउने सम्भावना पनि रहँदैन नै।

चीनबाट फैलिएको कोरोना भाइरसले अहिलेसम्म ३१ सय भन्दा बढीको ज्यान लिइसकेको छ। ७० भन्दा बढी देशमा फैलिएको भाइरसका कारण विश्व समुदाय डरमा छ। ९२ हजारभन्दा बढी व्यक्तिलाई संक्रमण भएको बताइन्छ।

बी डिभिजनमा टुसाल युथ क्लब भर्सेस सातदोबाटो युथ क्लबबीचको खेल।

खेलकुदका गतिविधि नहुनु नराम्रो देखिने भए पनि स्वास्थ्यका विषयमा हेलचक्र्याइँ गर्नु झनै भुल हुन सक्छ। इपिएलका प्रबन्ध निर्देशक आमिर अख्तर भने प्रतियोगिता नरोकिने दाबी गर्छन्। ‘इपिएल हुन्छ। कोरोनाले केही असर गर्दैन।’

अख्तरले कुनै अनुसन्धान र जाँचमा आधारित रहेर बोलेको नभई आफ्नो ठूलो तयारी खेर जाने डरले प्रतियोगितालाई केही हुँदैन भनेको स्पष्ट छ। तर अरु विषयमा गम्भीर देखिएको सरकारी निकाय खेलकुद गतिविधिमा के गर्ने र सञ्चालन गर्ने नै भए कसरी गर्ने भन्नेमा स्पष्ट हुनु जरुरी छ।

हुन पनि अहिले त इपिएलको तयारी अन्तिम अवस्थामा पुगिसकेको छ। कुन टिमले कस्ता विदेशी खेलाडीहरु ल्याउने लगभग पक्कापक्की भइसकेका छन्।

कोरोनाको बढ्दो डरकै कारण सर्वोच्च अदालतमा परेको रिटमा फागुन १९ गते सर्वोच्च अदालतले कोरोना भाइरसको संक्रमण नियन्त्रण गर्न सरकारलाई अन्तरिम आदेशसमेत दिएको छ। यस्तै सरकारले पनि चैत्र ५ गतेभित्रै कक्षा ९ सम्मका सम्पूर्ण विद्यालयका वार्षिक परीक्षा सकाउन निर्देशन दिएको छ। त्यस्तै, ठूला कार्यक्रम, सभा तथा पार्टी नगर्न स्थानीय तहमा समेत निर्देशन भइरहेका छन्।

यो सबैका बीच इपिएल के हुने भन्नेमा अन्योल आएको इपिएलकै एक टिम ललितपुर प्याट्रियोट्सका प्रशिक्षक राजु बस्न्यात बताउँछन्। ‘अब हाम्रो टिम त तयारी अवस्थामै छ। विश्वमै परेको प्रकोपविरुद्ध जोखिम लिन सकिँदैन। यसरी नै भाइरस नरोकिएर झन फैलिँदै गयो भने प्रतियोगिता सार्नु पर्ने अवस्था आउँछ’ उनले भने।

यता, काठमाडौं किंग्स इलाभेनका म्यानेजर विजयकुमार धिताल विश्वका चर्चित खेलाडी आउने हुँदा मिति सार्न नहुने तर्क गर्छन्।

‘अन्तर्राष्ट्रिय क्रिकेटको खेल तालिका मिलाएर चर्चित खेलाडी आइरहेका छन्। तर हामीले खेल तालिका सार्दा नेपाल आएका विश्व चर्चित खेलाडीको लागि त्यो खेल तालिका उपयुक्त नहुन सक्छ’, म्यानेजर धिताल थप्छन्, ‘बरु सरकारले आयोजकलाई कोरोनाविरुद्ध यो–यो कुरा पूरा गरेर प्रतियोगिता आयोजना गर्नु भनेर दिए हुन्छ कि। यो मेरो विचार हो। अब सरकारले हैन इपिएल पनि रोक्नु पर्छ भन्छ भनेर कसको के लाग्छ र!’

अहिले थाइल्यान्डमा जारी एसिसी टि–२० पूर्वी क्षेत्रीय छनोट क्रिकेट प्रतियोगितामा पनि म्यानमार, चीन र भुटानले भाग लिएनन्। कारण कोरोना भाइरसको डर नै हो। तर त्यहाँ नेपाल निर्धक्क सहभागी भएको छ।

विश्व खेलकुदका विभिन्न गतिविधि सञ्चालन गर्ने अधिकार प्राप्त निकायहरु नेपालमा जस्तो अनिर्णयमा भने देखिँदैनन्। बन्द रंगशालामा खेल गराउनेदेखि कतिपय खेलहरु स्थगितसमेत भएका छन्। उदाहरणका लागि भ्यालेन्सिया र एटलान्टाबीचको च्याम्पियन्स लिगको प्रिक्वाटरफाइनल खेल खाली रंगशालामा आउँदो हप्ता हुँदैछ।

यसैले बी डिभिजन लिगदेखि इपिएल जस्ता प्रतियोगिता के गर्ने भन्नेमा सम्बन्धित निकायले छिटो निर्णय गर्नुपर्ने देखिन्छ।