लेख-विश्लेषण

फुटबल फाइनलअघि रंगशालामा मजाक

ऋग्वेद शर्मा मंगलबार, मंसिर २४, २०७६ १४:१५

काठमाडौं– १३औं सागमा पुरुष फुटबलको फाइनल खेल दिउँसो ३ बजे नेपाल र भुटानबीच हुँदैछ। फाइनलपछि सागको समापन कार्यक्रम रंगशालामा नै हुँदैछ। फाइनल खेल सुरु हुन दुई घन्टा बाँकी रहँदा सांसद र संसद सचिवालयका कर्मचारीबीच रंगशालामा नै फुटबल चल्यो।

सांसद र कर्मचारीबीच फुटबल खेलाएपछि फाइनल खेल्ने भुटानका म्याच कमिस्नार मिन्दु दोर्जीले असन्तुष्टि जनाए। हुन पनि फुटबलको कुनै पनि खेलअघि कम्तिमा ४ घन्टा पहिले नै मैदान खाली हुनुपर्ने अन्तर्राष्ट्रिय नियम छ। तर पनि आजै एकताको सन्देश दिन कर्मचारी र सांसदलाई फुटबल नखेली भएन।

संसद सचिवालयका कर्मचारीले सांसदलाई चार गोल हानेर हराए। खेल र गोलभन्दा पनि महत्वपूर्ण समयमा सांसद र कर्मचारीलाई बिग्रन थालेको रंगशालाको चौरमा राखेपले किन उफार्‍यो, अचम्म छ।

रंगशालामा १५ हजारभन्दा बढी कलाकारले पहिलो दिन उद्घाटन समारोहमा प्रस्तुति दिएका थिए। त्यसपछि पनि पुरुष फुटबलका सबै खेलहरु रंगशालामा नै भएका छन्। त्यसले रंगशालाको चौरको अवस्था नाजुक देखिइसकेको छ। त्यसमा मंसिर २८ गतेबाट रंगशालामा नै ‘ए’ डिभिजन लिग हुँदैछ। त्यसका लागि पनि रंगशाला राम्रो राखिराख्न चुनौती छ।

टिकट काटेर नै रंगशाला जानेलाई ‘ठगीको फरार अभियुक्त’लाई जस्तो व्यवहार भइरहेको छ। समाचार संकलनमा गएका पत्रकार कुटिएका छन्। त्यो पनि साग सुरक्षा समितिको संयोजकमा प्रहरी महानिरीक्षक सर्वेन्द्र खनाल छन्, तर उनैको नेतृत्वमा खटिएका प्रहरीले पत्रकार पिटिरहेका छन्।

सुरक्षामा खटिएकाहरु आफ्नो मान्छे रंगशाला पसाउन नपाएर तनावमा छन्। सञ्चारमाध्यमका लागि छुट्टाइएको स्थानको टिकट बिक्री गरिएका छन्। त्यस्तोमा सांसद र कर्मचारी भने रंगशालाको चौरमा फुटबलमाथिकै भद्दा मजाक गरिरहेका छन्।
एकताको सन्देशका लागि मैत्रीपूर्ण फुटबल खेलेर रंगशालाको ट्रयाकमा बसेर बर्गर खाइरहेका छन्। जब कि ट्रयाकमा कुनै पनि त्यस्तो गतिविधि गर्न पाइँदैन।