कक्षा ११ र १२ मा अन्तर्राष्ट्रिय स्तरको शिक्षा दिन सूर्योदय र पिएचसिएबीच सहकार्य

नेपाल लाइभ | २०७६ असार २५ बुधबार | Wednesday, July 10, 2019 १८:२०:०० मा प्रकाशित

काठमाडौं- सूर्योदय माध्यामिक विद्यालय, मैतिदेवीले प्यासिफिक हस्पिटालिटी एन्ड कुलिनरी एकाडेमी (पिएचसिए)सँगको सहकार्यमा कक्षा ११ र १२ को कक्षा सञ्चालन गर्ने भएको छ।

३५ वर्षअघि स्थापना भएको विद्यालयले यसै वर्षबाट कक्षा ११ र १२ को अध्यापन गराउने सरकारबाट अनुमति पाएको छ। सोहीअनुरुप सूर्योदयले पिएचसिएसँग सहकार्य गर्दै पहिलो वर्ष कक्षा ११ मा होटल म्यानेजमेन्ट, म्यानेजमेन्ट र कम्प्युटर साइन्स विषय पढाउन भर्ना खुलाएको छ।

काठमाडौंको मैतिदेवीमै रहेको पिएचसिएले पछिल्लो ३ वर्षदेखि हस्पिटालिटी र कुलिनरी विषयमा अन्तर्राष्ट्रिय स्तरका कक्षा तथा तालिमहरु सञ्चालन गर्दै आएको छ। प्राविधिक शिक्षा तथा व्यावसायिक तालीम परिषद् (सिटिइभिटी)को सम्बन्धन तथा अष्ट्रेलियाको अष्ट्रेलियन इन्टरनेसनल कुलिनरी सर्भिस(एआइसिएस)सँगको समन्वयमा पिएचसिएले दक्ष जनशक्ति उत्पादन गरिरहेको छ।

विद्यार्थीहरुलाई अन्तर्राष्ट्रिय स्तरको सिप सिकाइसहितको शिक्षा दिने उद्देश्यले कक्षा सञ्चालन गर्न लागिएको सूर्योदय फाउन्डेसनका संस्थापक तथा सूर्योदय माविका प्रधानाध्यापक लक्षबहादुर केसीले बताए।

‘३५ वर्षदेखि हामीले माध्यामिक तहमा गुणस्तरीय शिक्षा दिँदै आएका छौं। सरकारले २०७२ देखि नयाँ व्यवस्था ल्याउँदै १२ कक्षासम्मै माध्यामिक तह तोकेपछि सूर्योदय पनि सोही अवधारणामा अगाडि बढेको हो,’ प्रधानाध्यापक केसीले भने, ‘यस वर्षबाट सरकारको अनुमति लिई ११ कक्षामा अध्यापन सुरु गर्न लागेका हौं। हाम्रो जोड शिक्षा, सिप र प्रविधिलाई समानन्तर रुपमा अगाडि लैजानेमा छ।’

शिक्षा, सिप र प्रविधिलाई समानन्तर रुपले अघि बढाउन पिएचसिएसँग सहकार्य भएको उनले स्पष्ट पारे।

साविकको उच्च माध्यामिक शिक्षा परिषद्‌ले तय गरेको कोर्षअनुरुप यस वर्ष कक्षा ११ का लागि भर्ना आह्वान गरिएको छ। सिप सिकाइलाई केन्द्रमा राखेर सुरु गर्न लागिएको कक्षामा सातामा ५ दिन औपचारिक र १ दिन प्रयोगात्मक सिकाइको कक्षा हुने विद्यालयले जनाएको छ। प्रयोगात्मकअन्तर्गत बेलायतको बेभरेज स्ट्यान्डर्ड एसोसियसन(बिएसए)बाट मान्यताप्राप्त कफी मेकिङको कक्षा, अष्ट्रेलियाको एआइसिएसबाट मान्यता प्राप्त कमर्सियल कुकरीको कक्षा, बेकरी तथा अन्य साधारण सिपमुलक कक्षा सञ्चालन हुने बताइएको छ।

यस बाहेक अंग्रेजी तथा चिनियाँ भाषाको समेत कक्षा सञ्चालन गरिने विद्यालयले जनाएको छ।

बिहानी सत्रमा कक्षा सञ्चालन गर्ने बताएको विद्यालयले नेपालको शैक्षिक गुणस्तरलाई सिपमुलक तथा प्रविधिक रुपमा पनि समृद्ध बनाउने लक्ष लिएको पिएचसिएका अन्तर्राष्ट्रिय संयोजक विकास केसीले बताए। विदेशको शिक्षाको स्तरलाई नेपालमा लागू गराउन यस्तो कक्षाले महत्वपूर्ण भूमिका खेल्ने उनको भनाइ छ।

स्वदेशमै पूँजी र प्रविधिको उपयोग गरी होटल व्यवस्थापन विषयमा अन्तर्राष्ट्रियस्तरको शिक्षा दिन चितवनका गणेश केसी र विकास केसीले सन् २०१६ मा पिएचसिए सञ्चालनमा ल्याएका हुन्।

‘अष्ट्रेलियाको अन्तर्राष्ट्रिय स्तरको शिक्षालाई नेपालमै उपलब्ध गराउन पिएचसिएको अवधारणा ल्याइएको हो। यसले पछिल्लो ३ वर्षदेखि राष्ट्रिय तथा अन्तर्राष्ट्रिय स्तरमा प्रतिस्पर्धा गर्न सक्षम जनशक्ति उत्पादन गर्दै आएको छ,’ केसीले भने, ‘यो तहको शिक्षा किशोरावस्थाबाटै लागू गरिनुपर्छ भन्ने लागेर सूर्योदयसँग सहकार्य गरेका हौं।’

गणेश केसी गैरआवासीय नेपाल सङ्घ अष्ट्रेलियाका पूर्वअध्यक्षसमेत हुन्।

सरकारले पनि प्राविधिक शिक्षालाई महत्व दिइरहेको अवस्थामा युवाहरुको पहलमा यस्तो कक्षा सञ्चालन हुनु स्वागतयोग्य रहेको सिटिइभिटीका पूर्व सदस्य-सचिव अग्निप्रसाद काफ्लेको बुझाइ छ।

किशोरकिशोरी तथा युवाहरुलाई प्राविधिक शिक्षा लिन जोड दिइरहेको पिएचसिएले कमर्सियल कुकरी, ब्रेकरी, पिजा मेकिङ, कफी मेकिङ विषयमा अन्तर्राष्ट्रियस्तरको शिक्षा तथा तालिम दिइरहेकोमा अब विद्यालय शिक्षामा समेत हात हालेकोमा उनले खुसी व्यक्त गरे। सरकारले नीति बनाउने तर कार्यान्वयनको तह फितलो हुने गरेकोमा सूर्योदय र पिएचसिएको सहकार्यले त्यो दूरी कम गर्न सघाउ पुग्ने काफ्लेले विश्वास जताए।

पिएचसिएका प्राविधिक सल्लाहकारसमेत रहेका काफ्लेले भने, ‘सरकारले आफ्नो नीतिमा विषयगत तथा प्रविधिक पक्षलाई सँगसँगै अघि बढाउन सकेको छैन। मलाई लाग्छ यो सहकार्यले त्यो खालीपन दूर गर्नेछ।’

विद्यालयले सरकारी शिक्षा प्रणालीलाई अंगिकार गर्दै सिपमुलक तथा प्राविधिक शिक्षालाई जोड दिने बताएको छ। नेपालमै उच्च तहको गुणस्तरीय शिक्षा दिने बताएको विद्यालयले उत्कृष्ट विषयगत शिक्षकले अध्यापन गर्ने र मध्यम वर्गीय परिवारले समेत आफ्ना छोराछोरीलाई सहजै पढाउन सक्ने शूल्क निर्धारण गरिएको विद्यालयका प्रधानाध्यापक लक्षबहादुर केसीले जानकारी दिए।

उनले भने, ‘मासिक ८ हजारको हिसाबले वर्षको करिब एक लाख मात्रै शूल्क निर्धारण गरेका छौं।’

विश्वमै प्राविधिक विषय अध्ययन गर्नेहरुलाई छोटो समयमै काम मिल्ने बताइन्छ। त्यसमाथि विश्वस्तरको शिक्षा दिइँदै आएकोले पिएचसिएका कतिपय विद्यार्थीले नेपाल तथा विदेशमा समेत आफ्नै लगानीमा व्यवसाय सुरु गर्नुका साथै तारे होटलहरुमा काम गरिरहेका पिएचसिएका संयोजक मनोज सापकोटाले बताए।

‘पिएचसिएमा एकैपटक करिब ४० जनाले पकाउन सक्ने अन्तर्राष्ट्रिय स्तरको किचन छ। पकाएका खानाको सजावट तथा व्यवस्थापनका लागि पनि विभिन्न उपकरण तथा प्रविधिको व्यवस्था गरिएको छ,’ संयोजक सापकोटाले भने, ‘एकैपटक १० प्रकारका खाना फरक तापक्रममा पकाउन/राख्न सकिने ओभन तथा खाना र बेभरेजलाई छुट्टाछुट्टै कुलिङ गर्न सकिने फ्रिज लगायतका साधनहरु उपलब्ध छन्। यी साधन तारे होटलको स्तरका हुन्।’

सन् २०११ पछि नेपालमा १ सय भन्दा बढी सुविधायुक्त होटलहरु खुलेको बताइन्छ। जसमा ५ हजारभन्दा बढी कोठाहरु छन्। नेपालमा थप तारे तथा अन्य होटलहरु पनि खुल्ने क्रम जारी रहेकोले होटल म्यानेजमेन्ट पढ्ने विद्यार्थीलाई यहीं पनि अवसर मिल्ने सम्भावना देखिन्छ। उता होटल तथा हस्पिटालिटी क्षेत्रमा विश्वभर वार्षिक करिब ३७ करोडको संख्यामा रोजगारीका अवसर सिर्जना हुने बताइन्छ।