काठमाडाैं- प्रधानमन्त्री केपी शर्मा ओलीले सुशासन र आर्थिक विकास नै सरकारको मूल लक्ष्य रहेको बताएका छन्। मुलुकलाई सुशासन र आर्थिक विकासको बाटोमा अघि बढाउने गरी शैक्षिक नीति तथा कार्यक्रम तय गर्न पनि प्रधानमन्त्रीले सम्बन्धित निकायलाई निर्देशन दिएका छन्।
मंगलबार त्रिभूवन विश्वविद्यालयको साधारण सभालाई सम्बोधन गर्दै प्रधानमन्त्री ओलीले उक्त निर्देशन दिएका हुन्।
मुलुकलाई समृद्ध बनाउन आवश्यक शिक्षित, सक्षम र दक्ष जनशक्ति तयार गर्ने गरी शैक्षिक नीति तथा कार्यक्रम बनाउनुपर्ने आवश्यकता रहेको पनि प्रधानमन्त्रीले औंल्याए। त्रिभुवन विश्वविद्यालयका कूलपति समेत रहेका प्रधानमन्त्री ओलीले मानवोचित सभ्य र सुसंस्कृत समाज निर्माण हुने गरी राज्यले शैक्षिक नीति लिनुपर्ने पनि स्पष्ट पारे।
मुलुकलाई सुशासन र आर्थिक उन्नतिको बाटोमा अघि बढाउनुको विकल्प नरहेको उल्लेख गर्दै सबै क्षेत्रलाई सो लक्ष्य हासिल हुनेगरी अघि बढ्न पनि उनले आह्वान गरे।
प्रधानमन्त्री ओलीले दिगो विकासका लक्ष्य हासिल हुने गरी अघि बढ्न विश्वविद्यालयलाई सचेत गराए। सन् २०३० भित्र दिगो विकासका लक्ष्य हासिल गरिसक्ने प्रतिवद्धता नेपालले पनि जनाएकाले सोही अनुसारको काम, कारबाही अघि बढाउन विश्वविद्यालयका पदाधिकारीलाई आग्रह गरे।
कार्यक्रममा बोल्दै शिक्षा, विज्ञान तथा प्रविधिमन्त्री गिरिराजमणि पोखरेलले विश्वविद्यालयले अपेक्षित प्रगति गर्न नसकेको भन्दै असन्तुष्टि व्यक्त गरे। विश्वविद्यालयका पदाधिकारीको नियुक्ति कार्यक्षमताको आधारमा गर्ने उल्लेख गर्दै परिवर्तित समयलाई सम्बोधन हुने गरी काममा लाग्न पनि विद्यालयका पदाधिकारीलाई सचेत गराए।
विश्वविद्यालयका सहकूलपति समेत रहेका मन्त्री पोखरेलले विश्वविद्यालयलाई तदर्थवादको रुपमा चलाउन नहुने पनि स्पष्ट पारे।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।