कृषि उद्यम केन्द्रको घोटालामा अख्तियारले थाल्याे छानबिन

अनुसन्धान

उत्तम काप्री आइतबार, माघ १३, २०७५ १५:५४

काठमाडौं–नेपाल उद्योग वाणिज्य महासंघअन्तर्गतको ‘कृषि उद्यम केन्द्र’को बजेटमा भएको घोटालाको विषयमा अख्तियार दुरुपयोग अनुसन्धान आयोगले छानबिन थालेको छ। ‘कृषि उद्यम केन्द्र’को बजेटमा लामो समयदेखि करोडौं रुपैयाँ घोटाला हुँदै आएको तथ्य नेपाल लाइभले प्रकाशन गरेसँगै अख्तियारले छानबिन थालको हो।

केन्द्रको बजेट आर्थिक हिनामिनामा महासंघकै पदाधिकारी जोडिएका थिए। केन्द्रको रकममा आर्थिक हिनामिना भएको भन्दै उजुरी परेपछि छानबिन थालिएकाे अख्तियारका प्रवक्ता रामेश्वर दंगालले जानकारी दिए। ‘रकम हिनामिनाको समाचार आउन थालेसँगै अख्तियारले पत्र पठाएर महासंघअन्तर्गतको केन्द्रसँग विवरण तथा कागजातसमेत मागेका थियौं,’ प्रवक्ता दंगालले भने, ‘महासंघले मागेको जावफसमेत दिइसकेको छ। यसबारेमा थप छानबिन गरिरहेका छौं।’

केन्द्रको स्थापना कालदेखिनै सुरु भएको आर्थिक हिनामिनाको सिलसिला आर्थिक वर्ष ०७१/७२ देखि भने अझै बढ्दो देखिएको छ। कुनै काम नगर्ने तर बजेट खर्च भएको देखाउने र हिसाब मिलान गर्ने कार्य त्यहाँ हुने गरेको थियो। महासंघका एक पदाधिकारीका अनुसार कृषि उद्यम केन्द्रले सञ्चालन गरेका विभिन्न कार्यक्रममा वार्षिक ७ करोड रुपैयाँभन्दा बढी घोटाला हुने गरेको छ। केन्द्रको रकममा घोटाला भएपछि कृषि तथा पशुपक्षी मन्त्रालयले बजेट दिनसमेत रोक्का गरेको छ। केन्द्रलाई मन्त्रालयले वार्षिक करिब ३० करोड रुपैयाँ दिँदै आएको थियो।

‘महासंघ जस्तो व्यावसायिक हित हेर्ने संगठनभित्र रहेको कृषि उद्यम केन्द्रमा आर्थिक हिनामिना हुनु सानो विषय हैन,’ महासंघ स्रोतले भन्यो, ‘कृषिको विकासका लागि भन्दा उद्यम केन्द्रका पदाधिकारी र कर्मचारीको व्यक्तिगत विकासमा रकम बढी खर्च भएको छ।’ केन्द्रले सञ्चालन गरेका विभिन्न परियोजनामा कूल बजेटको ६० प्रतिशतभन्दा बढी रकम तलब, दैनिक भत्ता तथा भ्रमण शिर्षकमा अनियमित रूपमा खर्च भएको देखिन्छ।

केन्द्रले तीन अलग–अलग परियोजना सञ्चालन गर्दै आएको थियो। केन्द्रअन्तर्गत तीनै परियोजनाको बेग्लाबेग्लै लेखा परीक्षण (आन्तरिक) गर्दा आर्थिक हिनामिना भएको फेला परेको महासंघका पदाधिकारी बताउँछन्।