नेपाल शिक्षक संघ ललितपुर महानगरको छैठौं प्रतिनिधिसभा सम्पन्न

समाचार

नेपाल लाइभ आइतबार, फागुन ४, २०८१ १०:३९

काठमाडौं – नेपाल शिक्षक संघ ललितपुर महानगरको छैठौं प्रतिनिधिसभा विविध कार्यक्रमका साथ सम्पन्न भएको छ । नेपाल शिक्षक संघ केन्द्रीय पूर्वउपाध्यक्ष एवं नेपाली कांग्रेस ललितपुर जिल्ला कार्यसमिति उपसभापति सुदर्शन घिमिरेको प्रमुख आतिथ्यतामा कार्यक्रम सम्पन्न भएको हो ।

नेपाल शिक्षक संघ ललितपुर महानगरपालिका स्थानीय कार्यसमितिको तर्फबाट महानगर अध्यक्ष उद्धव तिमल्सिनाले वार्षिक प्रतिवेदन पेस गरेका थिए ।
प्रमुख अतिथि घिमिरेले कार्यक्रममा आफ्नो धारणा राख्दै शिक्षक संघ बलियो भए मात्रै कांग्रेस बलियो हुन सक्ने बताएका थिए । ‘शिक्षक संघ बलियो बनाउन तपाईंहरूको सक्रियता महत्त्वपूर्ण छ । यसलाई थप गति दिनुहोला । पार्टीले तपाईंहरूलाई सम्पूर्ण रुपमा सहयोग गर्ने छ,’ उनले भने ।

कांग्रेसको क्रियाशील सदस्य शिक्षकहरू बन्न नपाउने भन्ने बहसको आफू विपक्षमा रहेको उनले बताएका थिए । शिक्षकले कांग्रेस जोगाएका कारण क्रियाशील सदस्यता लिन पाउनु पर्ने उनको धारणा थियो। त्यसका लागि आफूले सम्बन्धित निकायमा लविङ गर्ने उनको भनाइ थियो ।

यस्तै कार्यक्रममा आफ्नो धारणा राख्दै विशिष्ट अतिथि ललितपुर महानगरपालिका शिक्षा महाशाखा प्रमुख देवीप्रसाद उपाध्यायले शिक्षक समयसँगै अपडेट हुन सक्नुपर्ने धारणा राखेका थिए । त्यस्तो हुन सके मात्र गुणस्तरीय शिक्षा अभिवृद्धि गर्न सकिनेमा उनको जोड थियो ।

शिक्षक महासंघ ललितपुरका पूर्वअध्यक्ष लोकबहादुर खड्काले शिक्षकहरूको एकता गर्न सक्ने एउटा मात्रै संगठन शिक्षक संघ भएको धारणा राखेका थिए । उनले शिक्षक संघमा एकतावद्ध भएर अगाडि बढ्न र गुणस्तरीय शिक्षा दिन सबै शिक्षकलाई आग्रह गरेका थिए। उनी ललितपुर महानगरपालिकाका शिक्षा सल्लाहकार समेत हुन् ।

शिक्षक संघ ललितपुर जिल्ला कार्यसमिति अध्यक्ष सुरेशप्रसाद घिमिरेले हिउँदे अधिवेशनबाट शिक्षा ऐन जारी हुनुपर्ने धारणा राखेका थिए । यदि त्यस्तो हुन नसके शिक्षकले निर्णायक आन्दोलनमा उत्रिनुपर्ने उनको चेतावनी छ ।

‘स्थानीय तहदेखि केन्द्रसम्मै धर्नालगायत राज्यलाई असहयोगको आन्दोलन गरेर भए पनि शिक्षा र शिक्षकका समस्या समाधानमा राज्यलाई दवाव दिन आवश्यक छ । एसईईको कापी परीक्षण रोकेर भए पनि आन्दोलनमा जान पर्ने हुनसक्छ,’ उनले भने । उनले शिक्षकसँग भएका ३१ र ५१ बुँदे सहमति राज्यले तत्काल कार्यान्वयन गर्नुपर्ने धारणा राखेका थिए ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

तीनकुने घटनामा मृत्यु भएकाको परिवारलाई जनही १० लाख उपलब्ध गराइने

जम्मु-कश्मीरको पहलगाममा मारिएका नेपालीको शव ल्याइँदै

रघुजी पन्त शिक्षामन्त्री नियुक्त