भूकम्पबाट चीनमा कम्तिमा ९ जनाको मृत्यु, आपतकालीन प्रतिक्रिया सक्रिय

समाचार

नेपाल लाइभ मंगलबार, पुस २३, २०८१ ०९:४८

काठमाडौं – नेपाल–चीन सीमा क्षेत्रमा गएको भूकम्पबाट चीनमा कम्तिमा ९ जनाको मृत्यु भएको छ। केही घरहरु भत्किएका छन्।

चीनको सरकारी टेलिभिजन च्यानल सीजीटीएनले सरकारी अधिकारीहरुलाई उद्धृत गर्दै ९ जनाको मृत्यु भएको जनाएको छ।

चीनको राज्य परिषद्को भूकम्प राहत विभाग र आपतकालीन व्यवस्थापन विभागले ३ तहको आपतकालीन प्रतिक्रिया सक्रिय गरेको छ र उद्धार र राहत कार्यमा मार्गदर्शन गर्न कार्यदल पठाएको छ।

आज बिहान नेपाली समय अनुसार ६ बजेर ५० मिनेटमा चीनको जिजाङ्ग प्रान्तको सिगात्से केन्द्रविन्दु भएर शक्तिशाली भूकम्प गएको थियो।

नेपालको भूकम्प मापन केन्द्रले ७ म्याग्निच्युडको भूकम्प गएको रेकर्ड राखे पनि चीनको भूकम्प नेटवर्क केन्द्रले ६.८ तीव्रता मापन गरेको छ। यो भूकम्प १० किलोमिटर गहिराइमा थियो।

चिनियाँ सञ्चार माध्यमहरुका अनुसार भूकम्पका कारण दिङ्गी काउन्टीको चाङ्गसुओ क्षेत्रका गाउँमा घरहरु भत्किएका छन्।

चीनको भूकम्प नेटवर्क केन्द्रका अनुसार आज भूकम्प गएको स्थानदेखि २०० किलोमिटर वरपरको क्षेत्रमा विगत पाँच वर्षको अवधिमा ३ म्याग्निच्युड माथिका २९ वटा भूकम्प गएको रेकर्ड छ। तर आज बिहानको भूकम्प सबैभन्दा शक्तिशाली हो।

भूकम्पको धक्का काठमाडौँ उपत्यकासहित आसपास, तराई एवं पूर्वी नेपालका झापा, मोरङ, सुनसरी, उदयपुर, खोटाङ, ओखलढुङ्गा, भोजपुर, धनकुटा, तेह्रथुम, पाँचथर, इलाम, सोलुखुम्बु, सङ्खुवासभा, ताप्लेजुङ लगायत जिल्लामा महसुस गरिएको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

माओवादीलाई तह लगाउन शान्ति प्रक्रियाका बाँकी काम टुंगो लगाइएन: अध्यक्ष प्रचण्ड

इटहरीको अम्बे सहकारी समस्याग्रस्त घोषित

खोखो विश्वकप खेल्ने नेपाली टोलीको घोषणा