नेपालमा पर्यटन आगमन: भारतीय र चिनियाँ घटे, अमेरिकी बढे

पर्यटन-उड्डयन

नेपाल लाइभ मंगलबार, कात्तिक २०, २०८१ १३:४६

फाइल तस्बिर ।

काठमाडौँ- सन् २०२४ को १० महिनामा ९ लाख ४० हजार सात सय ३२ विदेशी पर्यटक नेपाल भित्रिएका छन्। नेपाल पर्यटन बोर्डको तथ्याङ्क अनुसार अक्टोबरमा कूल एक लाख २४ हजार तीन सय ९३ विदेशी पर्यटक आए। यो सङ्ख्या अघिल्लो वर्षको सोही अवधिको तुलनामा ६ दशमलव चार प्रतिशतले बढी हो।

सन् २०२३ को अक्टोबरमा एक लाख १७ हजार तीन सय छ पर्यटक आएका थिए। कोभिड–१९ (कोरोना महामारी) पूर्व अर्थात सन् २०१९ को तुलनामा ९२ दशमलव ९६ प्रतिशतले पर्यटकको सङ्ख्यामा पुनरुत्थान भएको बोर्डले जनाएको छ। सन् २०१९ को अक्टोबरमा एक लाख ३४ हजार ९६ विदेशी पर्यटक आएका थिए।

बोर्डका निर्देशक मणिराज लामिछानेका अनुसार समग्रमा विदेशी पर्यटक आगमन सन्तोषजनक छ। उनले भने, “समग्रमा पर्यटक आगमन सकारात्मक देखिन्छ। अक्टोबरमा आशातित पर्यटक आउन सकेनन्, किनकी महिनाको सुरुआतमै अविरल वर्षाले विपद्जन्य घटना भयो। अबको दुई महिनामा पर्यटक बढ्ने अनुमान गर्न सकिन्छ।”

भारतीय र चिनियाँ घटे
बोर्डको विश्लेषणमा अगष्ट, सेप्टेम्बार र अक्टोबरमा भारतबाट आउने पर्यटक घटेका छन्। पछिल्ला दुई महिनामा चीनबाट आउने पर्यटक पनि घटे। अक्टोबरमा भारतबाट १६ हजार तीन सय १३ पर्यटक आएका छन्।

गत सेप्टेम्बरमा भारतबाट २२ हजार ९ सय ८४ पर्यटक आएका थिए। यो करिब १३ प्रतिशत गिरावट हो। अगस्टमा २५ हजार आठ सय ३२ भारतीय पर्यटक आएका थिए। अक्टोबरमा चीनबाट आएका सात हजार सात सय ५० पर्यटकले नेपाल भ्रमण गरेका छन्। सेप्टेम्बरमा आठ हजार ४२ र अगस्टमा चीनबाट ६ हजार छ सय १४ चिनियाँ पर्यटक आएका थिए। मनसुनका कारण भारतीय र चिनियाँ पर्यटक घटेको अनुमान गरिएको छ।

अमेरिकी पर्यटक बढे
अक्टोबरमा अमेरिकाबाट आउने पर्यटकको सङ्ख्या अघिल्लो महिनाको तुलनामा १२ दशमलव ८८ प्रतिशतले बढेर कूल १६ हजार २३ पुगेको छ। सेप्टेम्बरमा १० हजार ८४ अमेरिकी पर्यटक भित्रिएका थिए। बेलायतबाट आठ हजार १९ पर्यटक नेपाल भित्रिएका छन्।

अष्ट्रेलियाबाट ६ हजार ९ सय २९, जर्मनीबाट छ हजार १८ र फ्रान्सबाट पाँच हजार चार सय ८५ पर्यटक आएका छन। बङ्गलादेशबाट चार हजार चार सय ७६, श्रीलङ्काबाट तीन हजार एक सय १२ र इटालीबाट दुई हजार छ सय ३५ पर्यटक आएका छन्।

मार्चमा सबैभन्दा बढी एक लाख २८ हजार एकसय ६७ पर्यटक आएका छन् भने सबैभन्दा कम जुलाईमा ६४ हजार पाँच सय ९९ पर्यटकले नेपाल भ्रमण गरेका छन्। अक्टोबरमा एक लाख २४ हजार तीन सय ९३ अप्रिलमा एक लाख ११ हजार तीन हजार ७६ पर्यटक आए।

सेप्टेम्बरमा ९६ हजार तीन सय पाँच, जनवरीमा ७९ हजार एक सय, फेब्रअरीमा ९७ हजार चार सय २६, मेमा ९० हजार दुई सय ११, जुनमा ७६ हजार सात सय ३६ र अगस्टमा ७२ हजार सात सय १९ पर्यटक नेपाल आएका छन्।

-रासस

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

त्रिकोणात्मक सिरिज खेल्न स्कटल्याण्ड जाने नेपाली टोलीको बिदाई

हसन राईको ‘नायुमा’ म्युजिक भिडियो सार्वजनिक

सुनकाे मूल्यमा सामान्य वृद्धि, कतिमा हुँदैछ कारोवार ?