काठमाडौं – चालू आर्थिक वर्ष (२०८०/०८१) को जेठ मसान्तसम्म (११ महिना) मा देशको कूल व्यापारमा २ प्रतिशतले गिरावट आएको छ। सो अवधिमा १५ खर्ब ९२ अर्ब ९६ करोड रुपैयाँ बराबरको वैदेशिक व्यापार भएको केन्द्रीय भन्सार विभागले जनाएको छ।
गत वर्षको सोही अवधिमा १६ खर्ब २४ अर्ब ५६ करोड रुपैयाँ बराबरको वैदेशिक व्यापार भएको थियो। जसअनुसार देशको कूल व्यापारमा १.९५ प्रतिशत गिरावट आएको हो।
यस्तै चालू आर्थिक वर्षको जेठसम्ममा १४ खर्ब ५३ अर्ब ७० करोड रुपैयाँ बराबरको आयात भएको छ। जुन गत आर्थिक वर्षको सोही अवधिको तुलनामा १.८४ प्रतिशतले कम हो। गत आर्थिक वर्षको ११ महिनामा १४ खर्ब ८० अर्ब ९८ करोड रुपैयाँबरबरको आयात भएको थियो।
विभागका अनुसार यो अवधिमा आयात मात्रै होइन निर्यात पनि घटेको पाइएको छ। चालु आर्थिक वर्षको ११ महिनामा नेपालबाट १ खर्ब ३९ अर्ब २६ करोड रुपैयाँ बराबरको निर्यात भएको छ। जुन गत आर्थिक वर्षको सोही अवधिको तुलनामा ३.०१ प्रतिशतले घटेको छ। गत आर्थिक वर्षको सोही अवधिमा नेपालबाट १ खर्ब ४३ अर्ब ५८ करोड रुपैयाँ बराबरको निर्यात भएको थियो।
आयात निर्यातमा आएको गिरावटसँगै नेपालको वैदेशिक व्यापारमा घाटा पनि बढ्दै गएको छ। जेठ मसान्तसम्म नेपालको वैदेशिक व्यापार घाटा १३ खर्ब १४ अर्ब ४४ करोड रुपैयाँ पुगेको छ।
यो गत आर्थिक वर्षको सोही अवधिको तुलनामा १.७२ प्रतिशत कम हो। गत आर्थिक वर्षको सोही अवधिमा १३ खर्ब ३७ अर्ब ३९ करोड रुपैयाँ बराबर रहेको थियो।
३ खर्बको पेट्रोल भित्रियो
जेठ मसान्तसम्ममा सबैभन्दा धेरै पेट्रोलियम पदार्थ आयात भएको छ। पेट्रोलियम पदार्थमात्रै ३ खर्ब रुपैयाँ बराबरको आयात भएको विभागको तथ्यांकमा उल्लेख छ। यस्तै ८० अर्ब ५८ करोड रुपैयाँ बरार सवारी साधनको आयात भएको छ। आइरन र स्टीलको आयात १ खर्ब ९७ अर्ब रुपैयाँको भएको छ।
५४ अर्ब रुपैयाँ बराबरको प्लाष्टिकजन्य वस्तु आयात भएको छ। ४४ अर्ब ६२ करोड रुपैयाँ बराबरको पाम तथा प्रसोधित तेलघ्यू आयात भएको छ। ४३ अर्ब ८० करोड रुपैयाँ बराबरको मोती आयात भएको छ। ४८ अर्ब रुपैयाँ बढीको फलफूलतरकारीजन्य वस्तुको आयात मात्र भएको छ। चिया र कफीको आयात १० अर्ब ४२ करोड रुपैयाँ बराबरको भएको छ।
१७ अर्ब २८ करोड रुपैयाँ बराबरको धागो निर्यात भएको छ। १२ अर्ब ३५ करोड रुपैयाँको चियाकफी निर्यात भएको छ। १५ अर्ब ८२ करोड रुपैयाँ बराबरको फलाम तथा फलामजन्यवस्तु निर्यात भएको छ। १० अर्ब ५६ करोड रुपैयाँ बराबरको नेपाली गलैँचा निर्यात भएको छ।
८ खर्ब बढी भारतसँग व्यापार घाटामा
चालू आर्थिक वर्षको जेठमसान्तसम्ममा नेपालको १७० देशसँग वैदेशिक व्यापार भएको छ। उक्त देशमध्ये १३५ देशसँग व्यापार घाटामा छभने ३५ देशसँग मात्रै व्यापार नाफामा रहेको छ।
चालू आर्थिक वर्षको सो अवधिमा नेपालको व्यापार सबैभन्दा धेरै भारतसँग भएको छ।
भारतबाट ९ खर्ब ८ अर्ब रुपैयाँ बराबरको वस्तु आयात भएको छ। नेपालबाट भारततर्फ ९४ अर्ब रुपैयाँ बराबरको सामान निर्यात भएको छ। भारतसँगमात्रै नेपालको व्यापारघाटा ८ खर्ब १३ अर्ब बढी रहेको छ।
यस्तै चीनबाट नेपालमा २ खर्ब ७२ अर्ब रुपैयाँको आयात भएको छ। नेपालबाट चीनतर्फ भने मात्र २ अर्ब ४० करोड रुपैयाँको मात्र व्यापार भएको छ। जसअनुसार चीनसँग डेढ खर्ब बढी व्यापार घाटा देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
