काठमाडौं- नेपाली कांग्रेस महासमिति सदस्य एवं संविधान सभा सदस्य उषा गुरुङले कोशीमा कांग्रेसको भागमा आएको मुख्यमन्त्री कांग्रेसले लिँदा केन्द्रीय नेतृत्वलाई किन टाउको दुखेको भन्दै प्रश्न गरेकी छन्। ‘महामन्त्रीको प्रतिवेदनमा आएको कोशी प्रकरण आपत्तिजनक छ,’ गुरुङले भनिन्।
ललितपुरको गोदावरीमा जारी महासमिति बैठकमा प्रतिवेदनमाथिको छलफलमा बोल्दै उनले कांग्रेसको भागमा आएको मुख्यमन्त्री माओवादीलाई दिनेहरुलाई किन कारबाही गर्न नसकेको भन्दै प्रश्न गरिन्। उनले महामन्त्रीहरुको प्रतिवेदन पनि एक भएर आउन नसकेको भन्दै आलोचना गरिन्।
‘नेपाली कांग्रेसको भागमा आएको मुख्यमन्त्री पद माओवादीलाई दिन खोज्नेहरुलाई किन कारबाही भएन? प्रतिवेदन एक ठाउँमा अडिन सकेन? कोशीमा अहिले जे भयो राम्रो भएको छ,’ उनले भनिन्।
उनले हारेकाहरुलाई मात्र पटक पटक पद दिने हो भने पार्टी भित्र न्याय र समानता कसरी हुन्छ भन्दै प्रश्न गरिन्।
‘केन्द्रीय सदस्य पदमा मनोनित गर्नुछ भने महाधिवेशनमा भाग लिन नदिउँ न। केन्द्रीय समितिमा हार्ने अनि फेरि मनोनित? यो मानमर्दन भयो, न्याय अन्याय छुट्याउनु पर्छ। यसको जवाफ दिनुपर्छ,’ उनले भनिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
