काठमाडौं- गैरआवासीय नेपाली संघ (एनआरएनए) अष्ट्रेलियाले गैरआवासीय नेपाली नागरिकतालाई प्रभावकारी बनाउन नेपाल सरकारसँग माग गरेको छ।
अष्ट्रेलियाको भ्रमणमा रहेका परराष्ट्र मन्त्री एनपी साउदलाई एक ज्ञापनपत्र बुझाउँदै संघले गैरआवासीय नेपाली नागरिकता प्रापकले अनेकौं समस्या झेल्नुपरेको, संविधानले दिएको अधिकार प्राप्त नभइसकेको भन्दै सम्पत्ति खरिद बिक्री र भिसामा छुटको व्यवस्था मिलाउन सम्बन्धित मातहतका निकायलाई निर्देशन जारी गर्न आग्रह गरेको छ। नीतिगत सुधारहरु गरेर नेपालमा लगानीको वातावरण निर्माण गर्न पनि ज्ञापनपत्रमा आग्रह गरिएको छ।
एनआरएनए अष्ट्रेलिया अध्यक्ष अनिल पोखरेलले मन्त्री साउद र आवसीय राजदूत कैलाशराज पोखरेललाई भेटेर ज्ञापनपत्र बुझाएका हुन्।
ज्ञापनपत्रमा विशेषगरी दूताबासले प्रदान गर्ने सेवाहरु प्रभावकारी बनाउन माग गरिएको छ। क्यानबेरास्थित नेपाली दूतावासले सीमित स्रोतसाधनमा प्रशंसनीय काम गरेको भएपनि कन्सुलर सेवाहरु प्रदान गर्न सकस परिरहेको अवस्थामा कन्सुलर र ग्राहक सेवालाई सम्बोधन गर्न दूतावासलाई थप स्रोतहरूको व्यवस्थापन गर्न आग्रह गरिएको छ। क्यानबेराबाट टाढा रहेका नेपालीहरुले राहदानी नवीकरणमा सास्ती झेलिरहेको भन्दै उक्त समस्या सम्बोधन गर्न माग गरिएको छ।
त्यस्तै नयाँ दिल्लीबाट नभई नेपालस्थित अष्ट्रेलियाली दूतावासमार्फत नै भिसाका आवश्यक प्रक्रियाका कामहरुको बन्दोबस्त गर्न पहल गर्न माग गरिएको छ। एनआरएनए अध्यक्ष पोखरेलले शिक्षा क्षेत्रमार्फत अष्ट्रेलियाको अर्थतन्त्रमा नेपालको विशेष भूमिका रहेको उल्लेख गर्दै नेपालको अर्थतन्त्रमा लगानी वा सहयोग प्रदान गर्न अष्ट्रेलिया सरकारसँग लबिङ गर्न आग्रह गरेका छन्।
त्यस्तै उनले नेपाली विद्यार्थीहरुका लागि छात्रबृत्तिको आकार बढाउन अष्ट्रेलिया सरकारसँग कूटनीतिक पहल गर्न माग गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
